Ûroria n'ûntû bwa Miisiri
19
1 Bûbû i bu ûroria îgûrû rîa Miisiri.Mwathani n'ayîîte arî îgûrû rîa îtu riugîîtie mûno
na aayîîte nthîgûrû ya Miisiri.
Mîbuanaano yonthe ya Miisiri yiinaine,
na nkoro cia Amiisiri bonthe igwatwe n'ûguaya.
2 “Naani nkeengîîra Mûmiisiri na ûra ûngî,
muntû na mûruagina bakaarûa,
mûtûûri na ûra ûngî bakaarûa,
taûni îkaarûa na îra îngî,
ûnene bûkaarûa na bûra bûngî.
3 Ngaatûma Amiisiri bakua nkoro,
na ntûme mîbango yao îtuîka ya mana.
Bakaûria ûkûrû kîrî ngai ciao cia mîbuanaano na irundu bia bara bakuû,
aringia na bara boonaga mantû.
4 Naani nkaarekeeria Amiisiri
njaraani cia mûnene ûkûbainyîîria,
mûnene ûtarî na kîao nabo n'we akabaatha,”
i bu Mwathani wa Njûûrî akuuga.
5 Rûûyî rwa îria rûkaabwa,
na rûûyî rwa mûûro wa Naero rûbwe cwe.
6 Tuuro tunthe tûnunke naaî,
na tuuro tunthe twa Miisiri tûbwee cwe.
Nthanje na nkengeyia ciûme,
7 na kinya mîtî îra îrî îkumbo rîa muuro wa Naero.
Mînda yonthe ya îkumbo rîa muuro wa Naero
îkaûma ng'û na îragare.
8 Ategi ba makûyû bonthe bakeegua naaî mûno,
bonthe bara bategaga na ndwano muurooni wa Naero,
na kinya bara bategaga na neeti bakaanyamaara.
9 Bonthe bara batumaga gatani îra nthongi bakaaga wîrîgîîro,
na kinya bara bookothaga ndigi bathire wîru.
10 Bara bo i bo itugî bia nthîgûrû bakaaga wîrîgîîro,
na bara boonaga mîcaara kuumania nabo bakue nkoro.
11 Atongoria ba Soani i biaa,
bara beeyaga Faraû ûkûrû bamweyaga mataaro matarî na gîtûmi.
N'ata baûmba kwîra mûnene,
“Ndî mûrutwa wa muntû ûra mûûgî
ûmwe wa nciarwa cia antû bara ba tene?”
12 Barîkû antû baaku bara baûgî îîndî?
I bakwoneerie na batûme ûmenye
Mantû mara Mwathani wa Njûûrî
abangîîte kûrûthîra Miisiri.
13 Atongoria ba Soani i batuîkîîte biaa,
atongoria ba Memufisia ibeeneereetue. Maiga ma koona ma mîîrîga yao imatûmîîte Miisiri îtaratara.
14 Mwathani n'abatûûrîrîîtie kîrundu kîa mbûgûûgû,
baatûma Miisiri îtûgûûga mantûûni monthe mara îkûrûtha,
wa ta bûra muntû ûmûtogoonu atarataraga agîtaîkaga.
15 Gûtirî bu Miisiri yûmba kûrûtha,
bûrî gîtûmi kana bûtarî gîtûmi, bûkûmenywa kana bûtakûmenyeka.
16 Ntugûûni inu Miisiri îgaakara ta aka, îkainainaga n'ûguaya n'ûntû bwa bûra njara ya Mwathani wa Njûûrî îkeegua yûkîîrîîte îgûrû rîao. 17 Antû ba Njunda bakamakia antû ba Miisiri mûno, na muntû wonthe ûra akeegagua Njunda îkîgwetwa akaamakanagia n'ûntû bwa bûra Mwathani wa Njûûrî abaangîîte.
18 Ntugû înu taûni itaano cia Miisiri îkaaria na rwaria rwa Kanaani na ithiîtie kwathîkîra Mwathani wa Njûûrî. Îmwe yacio îgeetagwa Taûni ya Kwînyangua.b
19 Kagiita gaku gûkeegua kûrî na kîthînjîro kîa Mwathani gatîgatî ka nthîgûrû ya Miisiri na gîtugî kîa Mwathani kîa maiga gîakîîtwe mwankaani. 20 Rûkeegua rûrî rwano na ûkûûyî kîrî Mwathani wa Njûûrî nthîgûrû ya Miisiri. Rîra bakaarîrîra Mwathani n'ûntû bwa bara babainyagîîria Mwathani akabatûmîra mûteethia wa kûbatuunyûkia. 21 Kwoogu Mwathani akeemenyithania kîrî antû ba Miisiri. Ntugû înu bakaamenya Mwathani na bamûrutîre igongwana na kinya îgongwana bia irio na bathiîtîrie Mwathani mîthiîtio na bamîûyûrie. 22 Mwathani n'we akaareteera antû ba Miisiri mûrimo na acooke aboorie. Bagaacookera Mwathani n'we akeegua maromba maao na aboorie.
23 Kagiita gaku gûkaagîta njîra îînene kuuma Miisiri kûthi Asîîria. Antû ba Asîîria bakaathi Miisiri na antû ba Miisiri nabo bakaathi Asîîria. Antû ba Miisiri na ba Asîîria bakaagongagîra amwe. 24 Antû ba Isiraeri bakeeriinganîra na Miisiri na Asîîria. Na Isiraeri îkeegua îrî kîthaarimo kîrî nthîgûrû. 25 N'ûntû Mwathani wa Njûûrî akabathaarima akiugaga, “Kîthaarimo i kîrî antû baakwa ba Miisiri. Kîthaarimo i kîrî Asîîria, ngûgî ya njara ciakwa. Kîthaarimo i kîrî Isiraeri, rûgai rwakwa!”