Ûroria n'ûntû bwa Kusi
18
1 Bûkoona thîîna biû nthîgûrû îra îbatabatagia mathabu,aira irî mbarî ya miuro ya Kusi,
2 ira itûmaga athigaani na njîra ya rûûyî,
barî na matarû marûthîîtwe na nthanje.
Bakabeera, îthiini biû atûmwa barî mpwî,
bûthi kîrî antû babu baraaya na barî nkonde i ntenderu,
kîrî antû bara bakuthûke nthîgûrû yonthe.
Antû baang'entu na baaragia rwaria rûtakûmenyeka,
nthîgûrû yao îgaanîîtue i miuro.
3 Biû bwinthe antû ba nthî,
biû bara bûtûûraga nthîgûrû.
Rîra kîoneeria gîgaûkîîrua kîrîmaani,
bûgakîona,
na rîra coro îkaaringwa,
bûkamîîgua.
4 Ûûgû i bu Mwathani akûmbîîra,
“Ngaakira kii na mbûraithîîrie ndî gîkarooni gîakwa,
ta karugutîra ka mwathû,
ta îtu rîa maame kagiita ka maketha.”
5 Wana mbere ya maketha rîra marao maûrûrûka
marao maatuîka ncabiibû na cianjîîria kwîrua,
i rîo akaaria mpong'i na kayiû,
arute mpong'i ira cia Mbaari.
6 Cionthe igatigîrwa nyoni cia kîrîma ira irîîyaga nyama,
na nyamû cia kîthaka.
Nyoni i kaabarîa thaano yonthe,
na nyamû nacio ithwe maîndî kagiita ga mpîo.
7 Kagiita gaku, Mwathani wa Njûûrî akaareterwa biewa,
kuuma kîrî antû bara baraaya na barî nkonde i ntenderu,
kîrî antû bara bakuthûke nthîgûrû yonthe.
Antû baang'entu na baaragia rwaria rûtakûmenyeka
bara nthîgûrû yao îgaanîîtue i miuro.
Biewa bibu bikaareetwa kîrîmaani gîa Sayuuni bantû ara eetanîrîtue na riîtwa rîa Mwathani.