Ûroria îgûrû rîa Ndamasiki
17
Bûbû i bu ûroria îgûrû rîa Ndamasiki.1 “Raithaani bwone Ndamasiki îtiîgua îrî taûni kaîrî,
îgaatuîka îganjo.
2 Taûni cia Aroeri ikaarûkîrwa,
itigîrwe nyamû cia ndîîthia,
imaamage ku gûtarî we agûciûria.
3 Taûni cia Eburaimu ira mbirigîre na nthingo ikaûra buru,
na kinya ûnene bûkaathira Ndamasiki.
Matigari ma Aramu
magaakara ta ûkumio bwa Isiraeri,”
i bu Mwathani wa Njûûrî akuuga.
4 “Ntugû n'îyîîte îra ûkumio bwa Njakubu bûkaathira
na mwîrî wake ûyu mûnoru ûboobe.
5 Isiraeri îgaakara ta bûra mûkethi akethaga irio
bûra akethaga agatiga rûûa rûrûûngi
wa bûra muntû akethûragia mathuke
mûndaani ûra ûrî kîguuruuni kîa Refaimu.
6 Amwe na ûgu matigari magaatigara
wa ta maciaro ma mûceituuni ûrî mwinainie.
Bûra ûtigaragia mbarîki ciîrî kana ithatû twong'iini tûra tûrî îgûrû buru,
inya kana itaano n'itigaraga ncaurîraani ira iciere mûno,”
i bu Mwathani Ngai wa Isiraeri akuuga.
7 Kagiitaani gaku antû bagaaceria mûûmbi wao
na bagarûkîre Ûra Mûtheru wa Isiraeri.
8 Batimûceria ithînjîrooni,
n'ûntû i ngûgî ya njara ciao,
kana batîîya itugî bia Aseraa kana ithînjîro bia kûbîîthîria macoco,
into bira birûthîîtwe na njara ciao.
9 Ntugû înu taûni ciao ira mbake mûno, ira bathaamire n'ûntû bwa Isiraeri, ikeegua ikari ta gûntû kûra kûrûûkîre kwauma nyaki. Kunthe gûkari ta îganjo.
10 Ibûriganîrîîtue i Ngai ûra ûbwonokagia,
bwariganîrua i rwara rûra rûbûrigagîîria.
Kwoogu kinya ûkaanda mbeû ira nthongi mûno,
kana mîcabiibû îra mîega ya kuuma kûngî.
11 Wana kinya îkauma ntugû wa îra wamîanda,
na îkaraûka kûraa rûûni.
Gûtirî maketha ûkoona,
ntugû îra îkeegua îrî ya mûrimo na ûrûrû bûtakîthira.
12 Mîgongo nîkûruruma,
îrîruruma ta bûra rûûyî rwa îria rûrurumaga,
Yîî antû baingî i bakûringa gîtuma
barîgondoka ta rûûyî rûûnene!
13 Kinya wegua antû i bakûgondoka ta rûûyî rûûnene,
Mwathani abagondokera bagaakuthûka bathi kûraaya mûno,
bakari ta maûngû rîra magûrûkîîtue i ruuo,
kana rûko rîra rûgûrûkîîtue i kîbuubani.
14 Ûgoro gûkeegagua kûrî na ûguaya!
na mbere kwereerûka bûkaathira!
Ûgu i bu gûgaakarîka kîrî bara batwithûkagîra,
ûyu nuu mûcaara wa bara batwiyaga into bietû.