16
1 Nenkanîraani tûgondu tûrî ûgooti,kîrî mwathi wa nthîgûrû,
kuuma Sera gûkûrûkîîra rwanda,
mwanka Njerusaremu, mwarî wa Sayuuni.
2 Wa ta bûra nyoni ira ciereeraga ikaraga,
kana nyoni imbînyangîrie ntara,
nwa ta bu eekûrû ba Moabu
bagaakara mariûkooni ma muuro wa Arinoni.
3 “Tweeni ûkûrû,
twîreeni bûra tûkûrûtha.
Ûtûkunîkîre ta bûra mûtî ûrîîkaga mûgunye wau
mûthenya gatî.
Withe bara beengatie kwao,
na ûtigaakunyanîre antû.
4 Tiga antû ba Moabu bakare amwe naawe
ûbarigîîrie kîrî mwînyangia.”
5 Rîru i rîo gîtî kîa ûnene gîkaarûthwa na wendo bwaku bûra bûtathiraga,
na ûmwe mwîtîgua agîkarîre,
n'we akeegua arî wa mûciî wa Ndaundi.
Ûra akaagambagîra antû na ûmma
na akîthingataga njîra ira ciagîrîîte.
6 Itwîgîîtue mantû ma wîkumia bwa Moabu
atî n'eebonaga mûno,
wîkumia na kwîbona gwake
îîndî gûtirî kîo kîrî oogo.
7 Kwoogu nthîgûrû ya Moabu nîrîre,
muntû wonthe narîrîre Moabu
rîraani na bûgwatwe i kîeba
n'ûntû bwa kwaga mîgaate îra îrugîîtwe na ncabiibû ya kuuma taûni ya Kiri-Aresethi.
8 Mînda ya Esiboni n'îtiganîrîîtue yaûma,
wana kinya mîcabiibû ya Sibuma.
Atongoria ba nthîgûrû
i bakinyangîrîîte ncabiibû ira mbega nthî.
Ira irakinyîîte mwanka Njaseri
na ciataamba bwa rwanda.
Mîrîîyo yacio yatamba
yathi mwanka îriani.
9 Kwoogu ndîrîra wa ta bûra Njaseri îkûrîra,
n'ûntû bwa mîcabiibû ya Sibuma.
Meethori maakwa marîîtîga n'ûntû bwaku
Esiboni na woû Eriare!
Kûgwîrua gwaku n'ûntû bwa matunda maaku mara maraarî meeru
na kinya n'ûntû bwa maketha,
ikwînyangîîtue.
10 Ikeno na kûgwîrua ibiûrîîte,
gûtirî kwina kûra kwîgagua kûrî mûndaani wa mîcabiibû.
Gûtirî muntû ûrî kîbibiini gîa kûbiba ncabiibû,
n'ûntû inkinyithîîtie gîkeno gîkî mûthia.
11 Nkoro yakwa n'îkûrîrîra Moabu
na kîeba kîînene mûno ta kînanda,
na ndeeni yakwa nkarîrîra Kiri-Aresethi.
12 Rîra Moabu îthiiyaga gûntû kwayo kûra gûûkîîru,
i kwînogia yîînogagia mana,
rîra athiiyaga ithînjîrooni biake kûromba,
i ngûgî ya ûtheri eegagua akîruta.