Ûroria îgûrû rîa Moabu
15
1 Bûbû i bu ûroria îgûrû rîa Moabu.Ari taûni îra irî Moabu n'înyangîîtue
na ûtugû bûmwe,
Kîrî taûni îra îrî Moabu n'înyangîîtue
na ûtugû bûmwe.
2 Antû ba Ndiboni bagwîtia kîromberooni,
bantû aago ara aûkîîru, i noo baathi kûrîrîra,
barîrîrîra Nebo na Mendeba taûni cia Moabu.
N'ûntû bwa kîeba bakeenja biongo,
na kinya ireru biao.
3 Bagîîkagîra nguo cia nkunia bakathi nacio njîraani ciao,
gûntû kûra gûkaraga antû baingî wana kinya rûûgûrû rwa nyomba,
bonthe bakaarîra
na kwîgwîthia nthî.
4 Esiboni na Eriare irîrîra
mwanka tûyû twao tûkeeguîgwa Njaasi.
Kwoogu njûûrî yonthe ya Moabu nîkûrîra
na nkoro ciao ciûyûri ûguaya.
5 Nkoro yakwa nîkûrîrîra Moabu,
antû baake barîkuthûka bakathi mwanka Soari,
kûthi mwanka Egirathi-Serisiya.
Na kinya kûthi Ruithi,
bakîrîraga wabathiîte.
Kinya barî njîraani ya kûthi Oronaimu,
kîrîro nwa gîkwîguîka.
6 Rûûyî rwa Nimurimu irûbwete
na nyaki yaûma.
Kîthaka kîonthe kîaûma,
na gûtirî gantû karirimu gatigeere.
7 Kwoogu ûtonga bunthe bûra baracereetie na baiga
barîkamata bira bakûûmba bakaringanîria nabio kauro ka mîare.
8 Mbu yao îrîîguîka mwanka mwankaani wa Moabu,
gûkaya kwao gûkeeguîka mwanka Egiraimu,
kîrîro kîao gîgakinya mwanka Beeri-Erimu.
9 Rûûyî rwa muuro wa Ndimonia rûûyûri nthakame,
na ntirî mbarû, nkaareetera Ndiboni kînyamaara kîngî
nkaaretera antû ba Moabu cimba
bonthe bara bagaakuthûka na bara bagaatigwa nthîgûrû înu.