Gûcooka kuuma ûkombooni
14
1 Mwathani akeegîîrua Njakubu kîao,na kaîrî athuure Isiraeri,
na abacookie nthîgûrû yao yongwa.
Ageni bara bakaathiiyania nabo
bakeeringanîra bonthe na mûciî wa Njakubu.
2 Mîgongo îgaatûma antû ba Mwathani
bacooka nthîgûrû yao yongwa.
Na ageni bara bakaayania nabo bakeeringanîra na antû ba nyomba ya Isiraeri
batuîke nkombo ciao cia arûme na cia aka nthîgûrû ya Mwathani.
Bagaatuîkithia bara baabataîte atae baao
na baathe bara babainyagîîria.
3 Ntugû înu Mwathani akabûthaûra kuuma kwinyîîruani, kînyamaaraani na ûkombooni. 4 Rîru i rîo ûkaarîria mûnene wa Mbabironi na njuno ûkiugaga,
“Muntû ûra aratwinyagîîria agûkinya mûthia,
marûrû maake makûthira.
5 Mwathani akuunanga mûthanju wa bara bathûûku,
mîraagi ya ûnene ya bara baratwathaga.
6 Bara barabûûraga antû ba mîgongo,
mpûûrwa îtarî ntîîri na mûthûûro ûtakûthira,
bakîathaga mîgongo na marûrû maingî
matarî mûthia.
7 Mûthiani nthîgûrû yonthe n'înogokeete na îrî na ûkiri,
nwaka îkwina.
8 Kinya mîtarakwa na mîthithinda ya Rebanoni
nwaka îgûgûkumia îkiugaga ata rî,
‘Kuuma rîra wagwîthiirue nthî,
gûtirî mûtemi wa mîtî ûûyaga gûtûtema.’ ”
9 Îcamaarîro i rîkeneete gûkwambîîria,
i riindûkîrîîtie irundu bia bara baakuire,
bara baarî atongoria nthîgûrû îno,
bauma itîîni biao bia ûnene bakûthookia.
10 Bonthe bagagûcookeria bakwîre,
“Wana woû n'ûraarî ûmûthûûku wa ta tiû.”
11 Kwîneneyia gwaku kûringîîtwe nthî mwanka îcamaarîro,
amwe na tûyû twa wandîndî,
magaagû i mo maarîîtwe ruungu rwaku,
na mîthoro n'yo mûrîngîti waku wa kwîguîka.
12 Ta raitha wone bûra ûgwîte nthîgûrû kuuma îgûrû,
woû nthata ya rûkîîrî. Mwana wa gûkîereerûka!
Ûgwîthîîtue nthîgûrû buru
woû ûra ûrainyagîîria mîgongo!
13 Ûrebîîraga nkorooni yaku,
“Ngeetia mwanka nkinye îgûrû,
nkaiga gîtî gîakwa kîa ûnene,
îgûrû rîa nthata cia Ngai,
nkare kathûmbîri ga kîrîma,
kîra ngai ciîthîranaga.
14 Mbîtie îgûrû nkûrûke matu,
ndîîbuanaanie na Ûra Arî Îgûrû Mûno.”
15 Îndî n'warûkîîtue nthîgûrû mwanka nthikooni
mwanka mborokerooni cia îrinya.
16 Bara bagaakwonaga bagagûkûûragîra meetho
bagagûcûûba bwega bakaûrania,
“Muntû ûyû n'ûra ûrainainagia nthîgûrû yonthe,
agatûma mîgongo yiinaina?
17 Ûra watuîkithiirie nthîgûrû rwanda,
ûra womorangire taûni cionthe,
atikîrekeeria bara aagwatire mîgwate bacooka kwao?”
18 Anene bonthe ba mîgongo i bamaami mooneneeni maao
wa kîra ûmwe nthikooni yake.
19 Îndî woû ûteetwe naagu ome ya nthiko,
ûkari ta rwong'i rwa mûtî rûra rûtemeetwe rûgateegwa.
Ûkabîîtwe n'antû bara baûrage,
bara baûragîîtwe na rûûyiû,
bara beendamaga marinyaani mara marî maiga nkona,
ta kiimba kîra gîkinyangîre nthî.
20 Ûtiithikwa ta anene bara bangî
n'ûntû n'wenyangiirie nthîgûrû yaku
na waûraga antû baaku.
Nciarwa cia antû bara bathûûku
itikaagwetwa kaîrî.
21 Thuuranîraani bantû a kûûragîra aana baake
n'ûntû bwa meeyia ma booyûûe.
Batikaaye gûûkîîra baathana kaîrî,
baaka taûni ciao nthîgûrû.
22 Ûûgû i bu Mwathani wa Njûûrî akuuga,
“Naani ngaûkîîra na ndî na ûthû nabo,
nthirie îgweta rîa Mbabironi na nciarwa cionthe na matigari maayo.”
I bu Mwathani akuuga.
23 “Naani ngaatuîkithia nthî ya Mbabironi ûtûûro bwa ntundu,
na nthîgûrû ya îrimba
mmîciate na gîciati gîa kûmîînyangia.”
I bu Mwathani wa Njûûrî akuuga.
Mwathani akaathiria Asîîria
24 Mwathani wa Njûûrî n'athiîtîîtie auga,
“Na mma wa bûra nthûgaanîîtie i bu gûgaakarîka,
na wa bûra mbangîîte i bu gûkaarûthwa.
25 Nkaathiria Asîîria nthîgûrû yakwa,
mbakinyangîre nthî irîmaani biakwa.
Ndute antû baakwa îcoki rîake
na mîrigo yake yuume iturooni bia antû baakwa.”
26 Ûyû nuu mûbango ûra ndî nau kîrî nthîgûrû yonthe,
n'ûntû inya yakwa îkinyagîra mîgongo yonthe.
27 Nûntû Mwathani, Mwathani wa Njûûrî n'abangîîte rî, n'ûû ûmûtîîria?
Njara înu yake îtambûrûkîîte rî, n'ûû ûmîcookia?
Mwathani akaathiria Afirisiti
28 Mwankaani ûra mûnene Aasi aakuire nuu ntûmwa îno yambûyîîre.
29 Afirisiti bwinthe menyaani bûkena,
n'ûntû bwa kwîthîrwa mûraagi ûra ûrakûringîîte nûraunîkire.
N'ûntû waagu mîriini înu ya njoka,
gûkauma tûyoka tûngî tûrî na cûmû nkûrûki.
30 Nacio nkîa ikoona biakûrîa,
na bara barî na ûbatu bakaanogokaga barîîkîîrîîtie.
Na nthirie rûciaro rwaku na yûûra,
na mbûrage matigari mara magaatigara.
31 Kaya mûno woû mwîrîga! Naawe taûni ûrîre!
Naabi Afirisiti bwinthe bûgwatwe n'ûguaya!
N'ûntû îtu rîa ntoogo i riumîîte bwa n'egûrû,
njûûrî îtarî muntû nwa ûmwe wa tong'oo.
32 N'îcookio rîbi tûgaacookeria athigaani ba mûgongo ûyu?
Bûbeere ata rî,
“Mwathani n'arûngîkîîte Sayuuni,
na i ku antû baake bara banyamaaragua bakoona bantû a kûnogoka.”