Kwînyangua kwa Mbabironi
13
1 Îno i ntûmwa îra Isaya mwana wa Amoci aagwatire kuuma kîrî Ngai mantûûni ma kwînyangua kwa Mbabironi.2 Ûkîîria kîonanîîria îgûrû rîa karîma gatarî nwa mûtî,
baugîîrie nainya,
na ûbooneerie na njara
bathûngîre na mîîrîga îra îthûngagîra na anene.
3 Naani i mbathîîte antû baakwa bara batheru,
na ndeeta njûûrî yakwa yîîya kûûyûria mantû ma mûthûûro wakwa,
bara bakenagîîra ûûmbani bwakwa.
4 Thikîîria gîtuma irîmaani,
gîkari ta gîa antû baingî.
Thikîîriani gîtuma mooneneeni ma mîgongo,
taka mîgongo îkwîthîrana amwe.
I Mwathani wa Njûûrî ûkwîthîrania njûûrî
yake ya ndûa.
5 Baumîîte nthîgûrû cia kûraaya,
kuuma mîthia ya nthî
i bo bakamatîîte mûthûûro wa Mwathani na i mathaga maake ma ndûa
ma kûthiria nthîgûrû yonthe.
6 Rîraani n'ûntû ntugû ya Mwathani îrî akubî
îkeegua îkari ta kwînyangua kuuma kîrî Mwene Inya.
7 N'ûntû bwa ûgu njara cionthe ikaathira inya,
na nkoro cionthe imake.
8 Ûguaya bûkabathiûrûûka,
ûrûrû na kînyamaara bikabagwata.
Ûrûrû ta bwa mwekûrû akîenda kûgîa na mwana.
Bakaaraithanaga na kîao
na moothiûni maao bakoonekaga bamakîîte.
9 Raithaani bwone ntugû ya Mwathani n'îyîîte,
ntugû înthûûku ya marûrû na mûthûûro ûmûnene,
îra îgaatuîkithia nthîgûrû îganjo,
na îthirie eeyia bonthe bara barî ku.
10 Nthata cia îgûrû na ntundu cia cio
itiithararia.
Riûa rîkaagîa mwindu
na Mweri ûtiithararia.
11 Ngaakaanûkia kîrîndî kîa nthîgûrû n'ûntû bwa ûthûûku bwakîo,
na bara bathûûku n'ûntû bwa meeyia maao.
Naani ngaakinyithia mûthia kwîbona kwa eekumia
na mbîndamie bara bamakanagia bakare ta gîntû gîtarî gîtûmi.
12 Ngaatûma antû bagîta mûûro kinya nkûrûki ya thaabu îra îkembeetwe,
kinya nkûrûki ya thaabu ya kuuma Ofiri.
13 Kwoogu ngaatûma îgûrû riinaina,
na nthîgûrû yiinaina yuuma ara îkaraga,
n'ûntû bwa mûthûûro wa Mwathani wa Njûûrî,
ntugû înu ya marûrû maake maanene.
14 Wa ta nthia îmbugie i wathi,
kana ng'ondu itarî na mûrîîthi,
woora ûmwe agaacooka kîrî antû baake
akuthûkîre nthîgûrû yao yongwa.
15 Ûra akaagwatagwatwa n'akaûragwa.
Bara bakaagwatwa bakaûragwa na rûûyiû.
16 Twana twao tûra tûniini tûgaaturanagua nthîgûrû tûgatwîkanga macuncî macuncî bakîonaga.
Into bia nyomba yao bitaîgwe na eekûrû baao beenyangue.
17 Mwathani ariuga ata rî,
“Ngaûkîîria Amendia îgûrû rîa Ambabironi,
n'ûntû bo batienda fetha,
kana bakenua i thaabu.
18 Bakaarathanga nthaka ira irî na inya,
batiîgîîrua twana tûnyi kîao,
wana kinya tûgenke.
19 Mbabironi ûkumio bwa moonene,
wega na wîkumia bwa Akarindea,
îkeenyangua i Mwathani
wa ta Sondomu na Ngomoora.
20 Îtikooro îtûûrwa kaîrî
kinya i nciarwa ira ikaaya.
Gûtirî Mûarabu akeenjîra îrema rîake agu,
kana mûrîîthi araaria ûrîîthi bwake ku.
21 Îndî nyamû cia rwanda ikaamaamaga ku,
nyomba ciao ciûyûre mbwe,
I ku ntundu na nyaga igaakaraga,
na mbûri cia kîthaka,
i ku ikaayaga kwinîra.
22 Mbiti ikaaragia irî mwîrîgaani wayo.
Na mbwe igaakaraga nyomba cia ûnene ira nthongi mûno.
Kagiita ka Mbabironi i gaakinyu
na ntugû ciake n'intare.”