ISAYA
Isaya oonua bioneki bia Njunda kûrega kwathîkîra Ngai
1
1 Bibi i bioneki bira Isaya mwana wa Amoci ooniirue îgûrû rîa Njunda na Njerusaremu. Oonire bioneki bibi magiitaani mara Usia, Njothamu, Aasi na Esekia anene ba Njunda baathanaga.Mûgongo ûtakwathîka
2 Îgua woû îgûrû! Naawe nthîgûrû ûthikîîrie!
N'ûntû Mwathani augîîte,
“I ndereete aana na ndabakûria,
îndî i bandemeete.
3 Ncamba ya ng'ombe n'iyî mwene,
Îng'ooi iriiyî rûkongoro rwa mwene rîo,
îndî Isiraeri gûtirî bu aiyî,
antû baakwa batigûciûkîrwa.”
4 Yîî i mûgongo wa wîyia,
antû baûyûrîtwe i mabîtia,
rûrîîyo rwa antû bara barûthaga wîyia,
aana bara beendeete ngukumo!
i batiganîrîîtie Mwathani
baagîria gîtûmi Ûra Mûtheru wa Isiraeri
na bamûûndûkîria mûgongo.
5 I kî n'ûntû bûkaraga bûkîîretagîra thîîna?
I kî n'ûntû rîonthe bûthiiyaga na mbere kûrema?
Kîongo gîaku kîonthe n'ironda bitheri,
nkoro yaku yonthe n'îngurarie.
6 Kuuma rwayo mwanka kîongo kûra îgûrû
gûtirî bantû eega.
Kunthe n'ironda na matooyo,
bitarî bithambie kana biogwa,
kana biakwa maguta.
7 Nthîgûrû yenu n'îganjo,
na taûni cienu n'imbîîthie na mwanki,
Nthîgûrû yenu yenyangua
n'ageni
ba kuuma kûngî wa bûraithîîte.
8 Mwarî wa Sayuuni agaatigwa akari ta kaganda
mûndaani wa mîcabiibû,
kana kanyomba ka mûkaria wa mûnda wa matanka
kana taûni încîgîîrie.
9 Ûkeegua ti Mwathani wa Njûûrî
watûtigarîîrie matigari maakai,
twayaga gûkara ta taûni ya Sondomu,
kana ta ya Ngomoora.
10 Îguani kiugo kîa Mwathani
biû atongoria ba Sondomu.
Thikîîriani watho bwa Ngai wetû,
biû antû ba Ngomoora.
11 “Ndî na igongwana biingî mûno,
bia ntûrûme na nyamû ira noru mûno.
Na ntikenaga i nthakame ya ng'ombe, mbûri na ng'ondu.
12 Rîra bûûyaga mbere yakwa,
n'ûû wîthagîrwa abwîtîîte,
n'ûntû bûûyaga gûkinyanga kîarago gîakwa?
13 Tigaani kûndeetera igongwana bitarî na gîtûmi,
macoco meenu i mûgiro kîrî niû.
Biatho bia kûyiûka kwa mweri, Sabatû na biûthûrano,
niû ntiûmîîria moothûûku ma biûthûrano bibu bienu.
14 Nkoro yakwa n'îbithwîre
biatho bia kûyiûka kwa mweri na biatho bingî bienu bira bitue,
i bituîkîîte mûrigo kîrî niû,
na inogeete i kûbikamata.
15 Rîra bwatambûrûkia njara cienu bûkîromba,
i nkaitha meetho maakwa ntikaabwone.
Wana kinya bwaromba maromba maingî ata,
ntimathikîîria.
Njara cienu ciûyûrîîte nthakame ya antû batarî na mabîtia.
16 Thambaani na bwîtherie.
Rutarutaani ngûgî cienu inu nthûûku
ûthiûni bwakwa!
Tigaani kwîyia.
17 Îîrutaneeni kûrûthaga bwega,
ceriani ûmma,
îkîraani bara bainyîîrîîtue wîru.a
Rûagîîraani nkîa ira itarî na beethe,
na bûkagambîîra ntigwa ira itarî na arûme.”
18 “Ncûûni twaranîrie tûrî amwe,”
i bu Mwathani akuuga.
“Kinya ûkeegua meeyia meenu i maatuune tunî,
makaayerûua ce ta îra,
na kinya meethîrwa marî matuune ta nthakame,
magaakara ta bamba.
19 Wegua bûkeenda kûmbathîkîra,
bûkaarîîyaga biega bia nthî.
20 Îndî wegua bûgaatuîka ndemi na bûrege kûmbathîkîra,
bûkaathirua i rûûyiû.”
N'ûntû i Mwathani wengwa akuuga.
21 “Ta raitha wone bûra Njerusaremu, taûni îra îraarî mbîtîgua,
îratuîkire îrwaya!
Kûrî rîo aarî mwîtîgua mûno,
ûtheru bûratûûraga ndeeni yake,
îndî îîndî ûûgû n'aûragani.
22 Fetha ciaku n'înyaarîîte,
na ndibei yaku yacaabûrwa na rûûyî.
23 Atongoria beenu n'antû baathûûku,
bara bagwatanagîra na aamba.
Beendeete ngukumo,
na beenganaga na kwegwa biewa.
Batigambagîîra nkîa ira itarî na beethe,
kana bathikîîria ntigwa ira itarî na arûme.”
24 Kwoogu Mwathani wa Njûûrî Ngai wa Isiraeri ariuga,
“Yîî, Ngetûûrîria anthû baakwa mûthûûro wakwa,
na ndîîrîîrie kîrî bo.
25 Nkabûthûkîria îtagaaria,
mbûtherie ta bûra cuuma îtheragua,
mbûrute rûko runthe.
26 Na ngaacookia agambi beenu wa ta ntugû cia mbere,
na eeyani ûkûrû mbacookie wa ta mwanjîîrio.
Na nyuma ya ûgu bûgeetagwa taûni ya ûtheru,
Njerusaremu taûni îra mbîtîgua.
27 Sayuuni îgaakûûrwa na ûmma,
na bara barî ku bakeerira bakûûrwe na wagîru.
28 Îndî aregi na eeyia bakaathirîrua amwe,
na bara baregeete Mwathani bathire.
29 Bûkaagîa îgi n'ûntû bwa mîpuru
îra bûrakumagia,
na bûgwatwe i kîeba
n'ûntû bwa mînda îra bwegwatîîre.
30 Bûkare ta mûpuru ûmûûrûrûku mathangû,
kana mûnda ûtarî rûûyî.
31 Muntû ûra ûrî na inya agaakara ta gîntû gûtarî,
na ngûgî yake îkare ta ndathe.
Bonthe bakaabîîra amwe i mwanki ûtakîoreka.”