Kîrîma kîa Mwathani
2
1 Gîkî i kîo kîoneki kîra Isaya mwana wa Amoci ooniirue îgûrû rîa Njunda na Njerusaremu.2 Ntugû ciiyîîte,
kîrîma kîa Nyomba ya Mwathani
gîkaarûngîkwa ta kîrîma kîra kîraaya,
gîûkîîre îgûrû rîa tûrîma tunthe,
mîgongo yonthe i noo îkeerekera.
3 Antû baingî bakaaya bauge,
“Ncûûni tûthi kîrîmaani kîa Mwathani,
Nyomba ya Ngai wa Njakubu.
Kaingo atûrutana njîra ciake
na kaingo tûûmba kûthi na njîra ciake.”
Watho bûkaumaga Sayuuni,
na kiugo kîa Ngai gîkaumaga Njerusaremu.
4 Akaagambîra mîgongo,
na athirie magamba ma antû baingî.
Bature mpiû ciao macembe,
na matumo maao bature tûyiû twa kwaria mîtî.
Gûtirî mûgongo ûkaumîîra ûra ûngî,
kana wîrutana ndûa kaîrî.
Ntugû ya Mwathani
5 Ncûûni biû ba mûciî wa Njakubu,
tûthiîreeni werûûni bwa Mwathani.
6 N'ûntû i bûtiganîîte na njîra cia antû beenu,
antû ba mûciî wa Njakubu.
Bwagwatana na mawîthîre ma kuuma bwa uumîîro bwa riûa,
bwatua kûroragia ta Afirisiti,
bwatua gûkeethanagia na njara na antû bara bagongaga ngai iingî.
7 Nthîgûrû yao yûûyûri fetha na thaabu,
na ûtonga bûtarî mûthia.
Nthîgûrû yao yûûyûri mbaraathi,
na nkaarî cia ndûa itatarîka.
8 Nthîgûrû yao yûûyûri ngai cia mîbuanaano,
bagongaga ngûgî cia njara ciao bongwa
ngûgî îra barutîîte na biara biao.
9 Antû babu bonthe bakaagwatwa i kîeba,
na bonthe bagîe îgi,
n'ûntû Mwathani atibarekera.
10 Îthûngîraani makurunguuni,
bwîbithe naagu ndeeni
bûkuthûke îmakania rîa Mwathani
na buumaume mbere ya ûkumio bwake.
11 Rîra Mwathani akaaya
rwîkumia rwa antû bara eekumia rûkaanyiiua,
Mwathani wenka n'we agaatîîywa ntugû înu.
12 Gûkaagîta ntugû îmwe ya Mwathani wa Njûûrî,
îra akaagambithia eekumia na bara beebûkagîîria.
13 Akaagambithia mîthithinda yonthe ya Rebanoni, îmîraaya na îmîkubî
na mipuru yonthe ya Mbasani,
14 na irîma bionthe bira biraaya
na tûrîma tunthe tûra tûûkîîru.
15 Na irîngo bionthe bira biûkîîru
na rûthingo runthe rûrî na inya.
16 Kîrî îtarû rîonthe rîa biacaaraa
na îgûrû rîa gîntû kîonthe kîra kîthongi.
17 Kwîbûkîîria kwa muntû gûkeendamua,
na wîkumia bwa antû bûthirue.
I Mwathani wenka agaûkîîrua ntugû inu,
18 na ngai cia mîbuanaano cionthe îkaûra cwe.
19 Antû bagaakuthûka bakîthûngagîra makurunguuni ma maiga,
na mîrinyaani îra îrî nthîgûrû.
Bakuthûkîîte imakania bia Mwathani
na baumauma mbere ya ûkumio bwa ûnene bwake,
rîra agaûkîîra kwinainia nthîgûrû.
20 Ntugû înu antû bakaagerera mbea na ndeere
ngai ciao cia mîbuanaano ya fetha na ya thaabu
ira baarûthire cia kûgongaga.
21 Kaingo baûmba kûthûngîra makurunguuni na mbacacîîni cia maiga.
Bakuthûkîîte imakania bia Mwathani
na baumauma mbere ya ûkumio bwa ûnene bwake,
rîra agaûkîîra kwinainia nthîgûrû.
22 Tigaani gwîtîgagia muntû,
mwoyo wake ûkaraga mîrukeeni îra yuumagîîra nyiûrûûni.
Îîndî we arî gîtûmi kîbi?