Kûgambithua kwa Njerusaremu na Njunda
3
1 Ta raithani bwone Mwathani wa Njûûrî,arî akubî kûthiria Njerusaremu na Njunda.
Kaumo na waigo bunthe bwa biakûrîa na rûûyî.
2 Muntû ûra ncamba na mûrûi wa ndûa
Agiiti magamba na iroria,
antû bara boonaga mantû mara makaaya na kinya akûrû.
3 Mûtongoria wa njûûrî ya antû mîrongo îtaano na muntû ûra ûrî îgweta,
mweyani wa kîrîra, muntû ûra ûrî ûtea na mûringia ûra mûnene.
4 Naani ngaatuîkithia antû baîthî atongoria baao,
nabo batue kwathagwa n'aana.
5 Antû bakainyanîîria mûno,
muntû akainyagîîria ûra ûngî,
na mûtûûri akainyagîîria ûra ûngî.
Antû bara baîthî bakaagîra akûrû gîtîîyo,
nabo akûrû ba ûkûrû bwa gatîgatî baagîre bara barî îgweta gîtîîyo.
6 Muntû agaatua kûthûûkagia mûruagina
wa kuuma mûciî wa îthe akamwîra,
“Woû ûrî na nguo ya ûnene, tuîka mûtongoria wetû,
n'ûntû kagiita gaka kûrî na thîîna îmbîî.”
7 Îndî wana we ntugûûni inu agaakaya akîbeeraga,
“Itû arî ntibûteethia.
Mûciî gwakwa gûtirî na biakûrîa
kana nguo ya gwîkîra,
itû menyaani bûntuîkithia mûtongoria wa antû.”
8 Njerusaremu îrîtaratara,
Njunda n'yo îkagwa.
Rwaria rwao na ngûgî ciao birî kîînyume na Mwathani,
n'ûntû ka barumaga Ngai.
9 Bûra moothiû maao moonekanaga i mo makûûyagîîra,
barûthaga meeyia maao mathingateene ta ma Sondomu,
batiithaga nwa mbi.
Bakoona thîîna,
n'ûntû beereteerete kînyamaara bongwa.
10 Îra bara batheru atî mantû maao makeegua marî meega,
n'ûntû bagaakeneera maciaro ma ngûgî ciao.
11 Bara bathûûku bakoona thîîna! Kînyamaara gîkabagwata!
N'ûntû bakaarîwa ngûgî îra njara ciao irutîîte.
12 Antû baîthî i bo bainyagîîria antû baakwa,
na aka nabo bakabaatha.
Antû baakwa, atongoria beenu i bo bakûbûta,
bakabûruta njîraani ira mbega.
13 Mwathani n'athûkîîtie kaanya gaake ga kûgambithania,
kaingo agambithia antû.
14 Mwathani akwanjîîria kûgambithania,
arîgambithia akûrû na atongoria ba antû baake akîbeeraga.
“I biû bûthirîîtie mînda ya mîcabiibû ya antû baakwa,
bira bûtuunyîîte nkîa birî nyomba cienu.
15 Bûtirî na watho bwa kwinyîîria antû baakwa
kana gûtuunya nkîa.”
Ûûgû i bu Mwathani akuuga, Mwathani wa Njûûrî.
Njerusaremu yakaanua
16 Mwathani ariuga ata rî, “N'ûntû aka ba Sayuuni n'ekumia,
bathiiyaga baûkîîrîîtie nkingo
na bakûûrîîte meetho.
Bakinyaga mpoora na wîkumia,
mbangiri ira beekîrîîte magûrû ikaaragia.
17 Kwoogu Mwathani agaatûma biongo bia aka ba Sayuuni biuma maronda,
biongo biao bienjûke bitigwe mpanda.”
18 Ntugû n'îyîîte îra Mwathani agaatuunya aka ba Njerusaremu into bionthe bira beekumagîria ta mbangiri cia gwîkîra magûrû, mîkathî na kinya tûnyamû twa gûkabia ntundu kîongo, 19 mina cia matû, mbangiri na itambaa bia kwîguîkîra, 20 na itambaa bia kîongo, mîkûng'i ya gwîkîra njara na mîcibi, mîcûûba ya maguta ma mîtaa na into bionthe bia kwîgemia, 21 mbete cia ûnene na mbete cia nyiûrû, 22 kanjû îthongi, nkoobia cia ûnene, tûbuuti, na mbeeti 23 na bioni na nguo cia gatani, na iremba.
24 Bantû a kûnunka mîtaa gûtuîke i kîrumba,
bantû a mûcibi i mwîndo.
Bantû a ntundu i ncanûre bwega wîgue i mpanda,
bantû a nguo inthongi wîgue i mathango,
bantû a ûthongi wîgue n'îgi.
25 Antû baaku bakaûragwa na rûûyiû,
na njûûrî yaku ya ndûa îthirîre ndûani.
26 Mîîrîga ya Sayuuni îkaarîra na îgwatwe i kîeba,
îkare ta mwekûrû akari nthî arî ûtheri.