2 MANTÛ MA KARAAYA
Mantû ma îbuku rîrî
Mbere ma, 1 Mantû ma Karaaya na 2 Mantû ma Karaaya rîarî îbuku rîmwe. Îbuku rîa 2 Mantû ma Karaaya rîanjîîrîîtie ara 1 Mantû ma Karaaya îthirîrîîte. Îbuku rîrî rîrîanjîîria ara Soromoni agûtuîka mûnene wa Isiraeri na ûnene bwake na kwathûrwa kwa nyomba yaimbia ya Ngai i mwanjîîrio wa mûtûûrîre waimbia wa antû. Nyuma ya Soromoni agûkua, (Gîcu. 9) îbuku rîrî rîonanagia kûrega kwathîka na gûtuîka kwa mîgongo ya rûteere rwa neegûrû rwa Isiraeri. Na kinya rîgatwîra mantû ma anene mwanya mwanya ba Njunda bûra bamwe baathîkagîra Ngai na bangî bakarega kûmwathîkîra, bamwe bakaregana na ngai cia mîbuanaano na bangî bakaigonga. Ngûgî îra yaarutirwe i mûnene Esekia na mûnene Njosia ya gûcookanîîria Nyomba ya Ngai n'înenkereetwe kaanya kaanene îbukuuni rîrî.
Îbuku rîrî rîrîîkîîtie na kwarîîria mantû ma kûgwa kwa Njerusaremu mwankaani wa 586/7 MKA, gûtaîwa na kwirwa gwa antû Mbabironi na bûra anene ba Pasia baarekangiirie antû baacooka kwao Njunda.
Îbuku rîrî i rîonanîîtie mwanya ûmwega mûno gatîgatî ka Îrema rîa Kûrîîkanaga rîra rîrî ndeeni ya Kuuma na Nyomba ya Ngai îra îrî ndeeni ya Mantû ma Karaaya. Mbesareri na Ooriabu (Kuuma 31:1-6a na 35:30-35) i ngerekano imbega cia Soromoni na Uramu-Abi (2 Mantû ma Karaaya 2:13 na 4:16). Kûremeerwa kwa anene mwanya mwanya gûtongoreeria antû na kûbacookia kîrî Mwathani i kîo gîtûmi kîînene gîa kûgwa kwa Njunda, nwe Ngai nwa mwanka akaanûkie antû bara beeyagia na bakarega kûmwathîkîra.
Gwookubî îbuku rîrî rîkari ûûgû:
Wathani bwa Mûnene Soromoni (1:1-9:31)
a. Mîanka ya mwanjîîrio (1:1-17)
b. Gwakwa kwa Nyomba ya Ngai (2:1-7:10)
c. Mîanka ya mûthiani (7:1-9:31)
Kwathûkana kwa mîîrîga ya bwa neegûrû (10:1-19)
Anene ba Njunda (11:1-36:23)
Kûgwa kwa Njerusaremu (36:23)