Soromoni eethîrania into bia gwaka Nyomba ya Ngai
(1Ane 5:1-18)
2
1 Soromoni abaanga gwaka nyomba ya kûgongera Mwathani na kwîbakîra nyomba ya ûnene. 2 Soromoni aataara antû ba kûruta ngûgî ngiri mîrongo mûgwanja na bangî ngiri mîrongo înaana ba gûcaa maiga irîmaani, na ngiri ithatû na magana mathanthatû ba kûbarûngamîîra.3 Rîru Soromoni aatûmana kîrî Iramu mûnene wa Turo amwîra,
“Ndûthîra tabûra waarûthîîre baaba Ndaundi, wamûtûmîra mîthithinda ya kwîbakîra nyomba. 4 Îîndî ndî akubî gwaka nyomba îra Mwathani Ngai wakwa akaagongagîrwa. Nkamînenkanîra kîrî we ya kûbîîthîrua macoco ma kûruta mûcinko ûmwega, kûrutîrwa mûgaate na mîgaate îra yaigagwa mbere yake, na kûrutagîra igongwana bia kûbîîthia bia rûkîîrî na ûgoro, na bia ntugû cia Sabatû, na bia kûyiûka kwa mweri na bia biatho bira biathûre bia Mwathani Ngai wetû. Bûbû i watho bwa kûthingatagwa n'Isiraeri tene na tene. 5 Nyomba ya Ngai îra ngaaka îkeegua îrî nene, n'ûntû Ngai wetû n'ûmûnene nkûrûki ya ngai ira ingî. 6 Îndî n'ûû ûûmba kûmwakîra nyomba, n'ûntû îgûrû rîneneete ûgu rîneneete, atiganîra ku? Niû ndî ûû wa kûmwakîra nyomba, tatiga arî bantû a kûrutagîra igongwana mbere yake? 7 Kwoogu îîndî, ntûmîra muntû arî na ûtea bwa ngûgî ya thaabu na ya fetha, ya rûthuku na ya îthaga, na ya kûgemia na rangi ya ûkûyû, na ya ndigi intuune, na mburuu, kinya arutanîîtwe mantû ma gûcaa mbica, baaye bagwatane na atea bara bangî ndî nabo Njunda na Njerusaremu, bara baaba Ndaundi eeyanire. 8 Ûntûmîre kinya mbaaû cia mîtarakwa, mîthithinda, na miarigamu ya kuuma Rebanoni, n'ûntû imbiyî aruti ngûgî baaku barî ûtea bwa gwatûra mbaaû cia Rebanoni. Aruti ngûgî baakwa bakaaruta ngûgî na aruti ngûgî baaku 9 bambatûrîre mbaaû imbingî, n'ûntû nyomba îra ngwaka ûkeegua îrî nene mûno na înthongi mûno. 10 Aruti ngûgî baaku, babu baatûraga mbaaû nkabaa nkunia ngiri mîrongo îna cia ngano îmbaraarie, nkunia ngiri mîrongo îna cia sayiri, mîtûngi ngiri magana maîrî ya ndibei, na mîtûngi ngiri magana maîrî ya maguta.”
11 Rîru Iramu mûnene wa Turo aacookia baarûani îra aatûmîîre Soromoni amwîra,
“N'ûntû Mwathani n'endeete antû baake nagûtuîkithîîtie mûnene wao.”
12 Iramu auga kaîrî,
“Mwathani Ngai wa Isiraeri arookumua, we ûra aûmbire îgûrû na nthîgûrû, we ûra apeere mûnene Ndaundi mwana ûmûûme, ûra arî na ûûgî na ûmenyo, ûra agaakîra Mwathani nyomba na eebakîre nyomba yake ya ûnene.
13 Ingûgûtûmîra Urami-Abi, muntû ûrî ûtea bûûnene, 14 ûra gina aumîîte Isiraeri wa mwîrîga wa Ndani na îthe aumîîte Turo. Narutanîîtwe kûruta ngûgî na thaabu na fetha na rûthuku na îthaga na maiga na mbaaû, na kinya kûruta ngûgî ya kûgemia na rangi ya ûkûyû na ya mburuu na ya ndigi intuune na gatani înthongi. Naiyî mîthemba yonthe ya gûcaa na nwa acae mbica yonthe apeewa. Kwoogu ka arutanîrie ngûgî na antû baaku ba gûcaa na ba mwathi wakwa Ndaundi abaagu.
15 Îîndî woû mwathi wakwa ûgaatûmîra aruti ngûgî baaku ngano na sayiri na maguta ma mîceituuni na ndibei îra uugire, 16 na tûgaatûra mbaaû wa ira ûkeenda kuuma Rebanoni, na tûkûretere tûcierereetie îriani mwanka Njopa; naawe ûthûkie wire Njerusaremu.”
17 Rîru Soromoni aatara ageni bonthe bara baarî Isiraeri, wa ta bûra îthe Ndaundi aabatarîîte. Oona baarî ngiri îgana na mîrongo îtaano na ithatû, na magana mathanthatû. 18 Ngiri mîrongo mûgwanja baao abaa ngûgî ya gûkamata mîrigo na ngiri mîrongo înaana beegua barî ba gûcaa maiga irîmaani, baarî na antû ngiri ithatû na magana mathanthatû ba kûbarûngamîîra baruta ngûgî.