Soromoni aaka Nyomba ya Ngai
3
1 Rîru Soromoni anjîîria gwaka Nyomba ya Mwathani Njerusaremu kîrîmaani kîa Moria, ara Mwathani aumîîrîîte îthe Ndaundi. Rwarî rwara rwa kûbûûrîra rwa Arauna Mûnjebusi, bantû ara Ndaundi oonanîîtie. 2 Aanjîîria gwaka ntugû ya ciîrî ya mweri wa îîrî mwankaani wake wa înna wathaniini. 3 Mûcingi ûra Soromoni eenjire wa gwaka Nyomba ya Ngai warî wa ûraaya bwa biiti mîrongo kenda na wariî bwa biiti mîrongo îthatû. 4 Kanyomba ka mûthûngîîro kaarî na ûraaya na waariî bwageneene bwa biiti ta mîrongo îthatû, nabu ûraaya bwa kuuma nthî gwîtia bwarî biiti mîrongo îthatû. Aakaanda nthingo ciako na thaabu îra ntheru mûno. 5 Nîo nyomba îra nene ya Nyomba ya Ngai, aaringîra mbaaû cia mîthithinda nthingooni, aacooka acikaanda na thaabu îra ntheru mûno na amîringa mbica cia nkîndû na nyororo. 6 Aagemia nyomba înu ya Ngai na maiga ma goro, na thaabu ya kuuma Paribaimi. 7 Aakaanda mîîto, mbureemu, nthingo na mîrango ya Nyomba ya Ngai na thaabu, na aacaa mbica cia kerubi nthingooni.8 Aaka bantû ara Atheru Mûno, ûraaya bwoogo bwaganeene na waariî bwa Nyomba ya Ngai, ûraaya, na waariî bwarî biiti mîrongo îthatû. Aakaanda ndeeni na kiro ngiri mîrongo îîrî na ithatû cia thaabu îra ntheru mûno. 9 Ûrito bwa wa kîra mûcumaarî bwarî bwa ta bwa nucu kiro ya thaabu. Acooka aakanda nthingo cia kanyomba ka îgûrû na thaabu.
10 Naku Bantû Ara Atheru Mûno aacaa mîbuanaano ya makerubi maîrî na amakaanda na thaabu. 11 Mathabu ma makerubi mamu monthe matambûrûkîîte maarî ma biiti mîrongo îthatû. Îthaabu rîmwe rîa kerubi ya mbere rîarî rîa ûraaya bwa biiti mûgwanja na nucu na rîatonga rûthingo rwa nyomba, na îthaabu rîra rîngî kinya rîo rîarî na ûraaya bwa biiti mûgwanja na nucu rîatongithia îthaabu rîa kerubi îra îngî. 12 Wa ta ûgu îthaabu rîa kerubi ya ciîrî rîarî na ûraaya bwa biiti mûgwanja na nucu na rîatongithia rûthingo rûra rûngî rwa nyomba, na îthaabu rîayo rîra rîngî, kinya rîo biiti mûgwanja na nucu rîatongithia rîa kerubi îra ya mbere. 13 Mathabu ma makerubi mama matambûrûkîîte monthe maarî ma ûraaya bwa biiti mîrongo îthatû. Makerubi mamu maarûngamîîte na magûrû maamo, meerekereete bwa mûrango.
14 Aarûtha ngoora ya gatani înthongi ya rangi ya mburuu, ya ûkûyû na întuune amîgemia na mbica ya kerubi.
15 Mbere ya Nyomba ya Ngai, aarûtha itugî biîrî bia ûraaya bwa biiti mîrongo îtaano, wa kîra gîtugî i kîarî na kathûmbî îgûrû ka biiti mûgwanja na nucu. 16 Aarûtha magemio ma mînyororo na ameekîra tûthûmbîîni tûtu twa itugî bibu. Aacooka arûtha mîbuanaano ya kûngûmanga îgana rîmwe na acigwatithania na mînyororo. 17 Aarûngîka itugî bibu mbere ya Nyomba ya Ngai, kîmwe rûteere rwa ûrîo, kîra kîngî rûteere rwa ûmotho. Kîra kîarî rûteere rwa ûrîo agîîta Njakini, na kîra kîarî rûteere rwa ûmotho, agîîta Mboasi.