Into bia Nyomba ya Ngai
(1Ane 7:23-51)
4
1 Mûnene Soromoni aarûtha kîthînjîro kîa rûthuku kîa ûraaya bwa biiti mîrongo îthatû, wariî bwa biiti mîrongo îthatû woogu na ûraaya bwa kuuma nthî kûthi îgûrû bwa biiti îkûmi na ithatû. 2 Acooka arûtha îtangi rîa rûthuku rîkari ta karia, rîa kîthiûrûûrî, rîa biiti îkûmi na itaano wariî, na gwîtia bwa îgûrû naku biiti mûgwanja na nucu na rîkîthimwa mûthiûrûûko warîo kûrû warî wa biiti mîrongo îna na itaano. 3 Na ruungu rwa rûreengo rwarîo i kwarî na mîbuanaano ya ikuru biruthiûrûkîrîîtie. Mîbuanaano înu ya ikuru yarî raini ciîrî na yaarûthîîtwe na rûthuku wa rûru rwarûthîîte îtangi.4 Îtangi rîru rîategeetwe îgûrû rîa mîbuanaano ya ncamba îkûmi na ciîrî, ithatû icûûbîîte rûteere rwa îgûrû, ithatû rûteere rwa ûthwîro bwa riûa, ithatû rûteere rwa iti na ithatû inu ingî rûteere rwa uumîîro bwa riûa. Karia karîîkîîrîîtwe îgûrû rîacio. Ara ya wa kîra îmwe yacio yarî bwa ndeeni. 5 Ûmatu bwa rîo bwarî inci ithatû na nucu; rûreengo naru rwarûthîîtwe ta rûreengo rwa gîkombe, ta yûûa; narîo rîaganagîra rûûyî rwa mîtûngi ngiri ithatû.
6 Aacooka arûtha iraî îkûmi bia kûthambîra, na aiga bitaano rûteere rwa njara ya ûrîo, na bitaano bira bingî rûteere rwa njara ya ûmotho, kaingo into bira bigaatûmîka n'ûntû bwa igongwana bia kûbîîthia bithambîrua ku. Îndî karia kaarî ga kûthambîrwa n'athînjîri ba Ngai.
7 Aarûtha itugî bia gûcuuria taa îkûmi bia thaabu kûringana na bûra eerîîtwe, na abiaiga Nyomba ya Ngai, bitaano rûteere rwa îgûrû na bitaano rûteere rwa iti. 8 Aarûtha kinya meetha îkûmi na aciaiga Nyomba ya Ngai, itaano rûteere rwa njara ya ûrîo, na itaano rûteere rwa njara ya ûmotho. Na aarûtha iraî îgana bia thaabu. 9 Aarûtha kîarago kîa athînjîri ba Ngai, na kîarago kîînene, na mîrango yaabio amîkaanda na rûthuku. 10 Aigîîra îtangi rîru aakubî na koona îra îrî njara ya ûrîo ûkiumagarûka nyomba înu.a
11 Na kaîrî Iramu aarûtha nyûngû, iciko bira binene, na mbakûri. Aarîîkia ngûgî îra aarutagîra Soromoni ya Nyomba ya Ngai.
12 Aarûthire itugî bibu biîrî,
mbakûri inu ciîrî, tûthûmbî twîrî tûra twarî îgûrû ya itugî
na magemio ma raini ciîrî cia nyororo mara maagemeetie iraî bira biarî îgûrû rîa tûthûmbî tûra twarî îgûrû rîa itugî bibu.
13 Mîbuanaano ya kûngûmanga magana mana ya kûgwatithania na mîraini îîrî ya nyororo îra yaagemeetie mbakûri ira ciîrî ciarî tûthûmbîîni tûra twarî itugîîni bibu.
14 Aarûtha kinya ikinyithio, na iraî birî îgûrû yabio,
15 îtangi rîra rîmwe na mîbuanaano ya ncamba ira îkûmi na ciîrî irî ruungu rwarîo,
16 nyûngû, iciko bira binene, iciko bia kûgarûrîra nyama na into bia mûthemba ûyu bionthe bira Uramu-Abi aarûthîrîîte mûnene Soromoni birî bia nyomba ya Ngai biarûthîîtwe na rûthuku rûûkembe. 17 Kîbondeeni kîa Njorondani noo mûnene aabirûthithagîria, bantû kwarî na yûûmba gatîgatî ga Sukothi na Serenda. 18 Soromoni aarûtha into bibi bionthe kwa wingî mûno, bûra kinya ûrito bwa rûthuku rûra rwatûmîîrwe rûtaamenyekanaga bûra rwagana.
19 Kwoogu Soromoni aarûtha into bionthe bira biarî Nyomba ya Ngai tabio: Kîthînjîro kîa thaabu, meetha cia mîgaate îra yarutagîrwa Ngai, 20 itugî bia gûcuuria taa na taa cia bio cia thaabu îra ntheru mûno cia kûthararîra Bantû Ara Atheru Mûno wa ta bûra kwathanîîtwe; 21 maûa, taa, na mîgwati, bionthe biarûthîîtwe na thaabu îra ntheru mûno; 22 magati, na mbakûri, na tûbakûri twa gwîkîra macoco, na tûbakûri twa gûkamata mwanki. Bionthe biarûthîîtwe na thaabu îra ntheru mûno. Mîrango ya nyomba înu, ûgu i ta kuuga mîrango ya ndeeni buru ya Bantû Ara Atheru Mûno, kinya mîrango ya Nyomba ya Ngai, yarî ya thaabu.