5
1 Rîra Soromoni aarîîkiirie ngûgî yonthe îra aarutaga n'ûntû bwa Nyomba ya Mwathani, aathûngîria into bira îthe Ndaundi aathûrîrîîte Mwathani, na aiga thaabu, fetha, na into bira bingî bionthe igîînaani bia Nyomba ya Ngai.Îthandûkû rîareetwa Nyomba ya Ngai
(1Ane 8:1-9)
2 Rîru Soromoni eeta akûrû ba Isiraeri, atongoria bonthe ba mîîrîga ya Isiraeri na atongoria ba mîciî ya Isiraeri beethîrana Njerusaremu. Baarî bareete Îthandûkû rîa Maathana rîa Mwathani, kuuma Sayuuni, Taûni ya Ndaundi. 3 Na Aisiraeri bonthe beethîrana mbere ya mûnene kagiita ga kîatho kîa mweri wa mûgwanja.a 4 Rîra akûrû ba Isiraeri baayire bonthe na Arawi baûkîîria îthandûkû rîa maathana. 5 Kwoogu baareeta îthandûkû, Îrema rîa Kûrîîkanaga, na into biitheru bionthe bira biarî îremaani. Athînjîri ba Ngai na Arawi babireeta Nyomba ya Ngai. 6 Mûnene Soromoni na kîrîndî gîa Isiraeri kîonthe, kîra kîethîranîîte amwe nwe, baarî mbere ya îthandûkû, bakîrutaga igongwana bia ng'ondu na ncamba imbingî mûno itaûmba gûtarîka. 7 Rîru athînjîri ba Ngai baareeta îthandûkû rîa maathana rîa Mwathani bantû aarîo, kanyomba ka ndeeni ka Nyomba ya Ngai, Bantû Ara Atheru Mûno, ruungu rwa mathabu ma akerubi. 8 N'ûntû akerûbi baataambûrûkîîtie mathabu îgûrû rîa bantû ara îthandûkû rîru rîaigagwa, nacio kerubi inu ciakunîkire îthandûkû rîru na mîaro yarîo ya kûrîkamata. 9 Itugî bibu biarî biiraaya bûra mîthia yabio muntû akîbiona arî Bantû ara Atheru mbere ya kanyomba ka ndeeni, îndî muntû atikîbiona arî bantû angî. Na birîogo kinya îîndî. 10 Gûtirî kîo kîarî îthandûkûûni rîru tatiga mbaariû ciîrî cia maiga ira ciandîkîîtwe maathana ma Mwathani ira Musa eekîrîîte ku arî Orebu, naara Mwathani aigire kîrîîkanîro na antû ba Isiraeri bakûrîîkia kuuma Miisiri.
11 Rîru athînjîri ba Ngai bauma bantû ara atheru. Athînjîri ba Ngai bonthe bara baarî agu i baarî ba kwîtheria, batakûmakîra ikundi biao. 12 Arawi bonthe bara baarî aini tabo: Asabu, Emani, Njenduthuni na nthaka ciao na antû baao baarûngama rûteere rwa uumîîro bwa riûa bwa kîthînjîro, beekîrîîte gatani înthongi bakîriingaga igamba, inaanda na inubi. Baarî amwe na athînjîri ba Ngai îgana na mîrongo îîrî bakîringaga wandîndî cia ndigi inyingî na tûrumbeta. 13 Tûyû twa tûrumbeta na aini twagwatanire, twakara ta kayû kamwe, ga gûkumia Mwathani na kûmûcookeria nkaatho. Na rîra rwîmbo rwainagwa na tûrumbeta na igamba na into bira bingî bia kwina baûkîîria tûyû twao bagîkumagia Mwathani bakiugaga,
“N'ûmwega;
wendo bwake bûtûûraga tene na tene.”