Soromoni aarîria antû
(1Ane 8:12-21)
6
1 Rîru Soromoni auga, “Mwathani augîîte agaakara îtuuni rîra rîrumanu, 2 îndî ngûgwakîra nyomba înthongi mûno, bantû aaku a gûkara tene na tene.”“Mwathani arookumua, Ngai wa Isiraeri, ûra aûyûria wîrane bwake bûra aanenkeere baaba Ndaundi na kanyua gaake auga, 5 ‘Kuuma ntugû îra ndaarutire antû baakwa nthîgûrû ya Miisiri, ntaataara taûni nwa îmwe kuuma mwîrîgaani nwa ûrîkû wa Isiraeri îra ngaaka nyomba yakwa, kaingo riîtwa rîakwa rîkumithîrua ku, na gûtirî we ndaathuura ta mûtongoria wa antû baakwa Isiraeri, 6 îndî i nthuurîîte Njerusaremu kaingo riîtwa rîakwa rîkumithua ku, na ndaathuura Ndaundi aatha antû baakwa Isiraeri.’ 7 Baaba Ndaundi n'athûgaanîîtie gwaka nyomba ya kûgongera Mwathani Ngai wa Isiraeri, 8 îndî Mwathani amwîra, ‘N'warûthire bwega kûthûgaania kûmbakîra nyomba, 9 îndî ti woû ûkambakîra yoo, i mwan'waku agaaka n'ûntû bwa gûntîîya.’
10 Îîndî Mwathani akûûyûria wîrane bwake bûra aigire, n'ûntû i nthûkîîtie kaanya ka baaba Ndaundi, ndaatuîka mûnene wa Isiraeri, wa ta bûra Mwathani eeranire, na ndaaka nyomba ya kûgongera Mwathani Ngai wa Isiraeri nyomba. 11 Noo mbaigîîte îthandûkû, rîra rîrî na kîrîîkanîro kîa Mwathani kîra aarîîkanîîre na antû ba Isiraeri.”
Îromba rîa Soromoni
(1Ane 8:22-53)
12 Rîru Soromoni aarûgama mbere ya kîthînjîro kîa Mwathani, mbere ya kîrîndî kîonthe gîa Isiraeri, na aûkîîria njara ciake. 13 Soromoni n'arûthîîte bantû aûkîîru a rûthuku, a ûraaya bwa biiti mûgwanja na nucu na waariî bwa biiti mûgwanja na nucu na gwîtia îgûrû naku biiti inya na nucu na aigîîra agu gatîgatî ga kîarago kîa Nyomba ya Ngai. Aatwa oogo rîru aaturia maru mbere ya kîrîndî gîa Isiraeri na aûkîîria njara ciake bwa îgûrû. 14 Rîru auga,
“Îî Mwathani, Ngai wa Isiraeri, gûtirî Ngai ûngî îgûrû na nthîgûrû ûkari ta woû, n'ûyûragia kîrîîkanîro gîaku na ûkoonania wendo kîrî antû baaku bara bathiiyaga na mbere gûkwathîkîra na nkoro yonthe. 15 Nwaûyûriirie wîrane bwaku kîrî mûruti ngûgî waku baaba Ndaundi, weeranire na kanyua gaaku na n'ûûyûrîîtie na njara yaku îmunthî.
16 Îîndî woû Mwathani Ngai wa Isiraeri, ûyûria wîrane bûra weeranire na baaba Ndaundi. Wamwîra ûkeegagua rîonthe kûrî na mûnene wa kwatha Isiraeri kuuma mûciî wake, bunka wegua bakaathîkîra maathana maaku bwega, wa ta bûra Ndaundi aarûthaga. 17 Îîndî Mwathani, woû Ngai wa Isiraeri, ûyûria kiugo gîaku kîra weerire mûruti ngûgî waku Ndaundi.
18 Îndî Mwathani rî, nwa ûtûûre nthîgûrû na antû? Kinya îgûrû rîrî rînene bûra rîrî rîînene ûtiganîra ku. Î nyomba îno ngwakîrîîte î, ti niini mûno! 19 Îndî amwe na ûgu, woû Mwathani Ngai wakwa, thikîîria îromba na kwerekana gwakwa niû mûruti ngûgî waku ûmbîgîîrue kîao, îgua kîrîro na îromba rîra mûruti ngûgî waku akûromba arî mbere yaku. 20 Meetho maaku marooraithîîria nyomba îno mûthenya na ûtugû, bantû aaga waugire riîtwa rîaku rîkaagongerwa. Ûroîgua îromba rîra mûruti ngûgî waku akaarombaga amîraithîîte. 21 Na ûthikîîrie kwerekana kwa mûruti ngûgî waku na antû baaku ba Isiraeri, rîra bakaaromba beerekereete bantû aaga. Ûroîgua ûrî îgûrû gîkarooni gîaku na ûtûrekere.
22 Muntû akaaya kûbîtîria ûra ûngî na akeerwa anyue muuma na akaaya akathiîtia arî mbere ya kîthînjîro nyomba îno yaku, 23 ûroîgagua ûrî îgûrû, na ûkarûtha ûntû, ûgambithie aruti ngûgî baaku, ûkaanûkie ûra arî na mabîtia bûra abatîîrue na ûra n'we atarî na mabîtia ûmûrûthîre wega bûra abatîîrue na arekeerue.
24 Antû baaku Isiraeri bakaaya gûturwa ndûani n'anthû baao n'ûntû ibeeyîîtie mbere yaku na bagûcookere baaye nyomba îno, beenyiîtie bagîkûrombaga ûrekeri, 25 ûroîgua ûrî îgûrû, na ûrekere antû baaku Isiraeri meeyia maao, na ûbacookie kaîrî nthîgûrû îra wabeere amwe na biûyûûyû biao.
26 Rîra îgûrû rîkaingwa wîgue gûtarî na mbura n'ûntû ibeeyîîtie mbere yaku, na bacooke barombe beerekereete bantû aaga, beerire bagarûke kuuma wîyiani bwao n'ûntû n'ûbapeete îkaanûkia, 27 ûroîgua ûrî îgûrû, ûrekere aruti ngûgî baaku wîyia bwao, tabo antû baaku Isiraeri, rîru ûbarutane njîra îmbega îra baagîrîîte kûthiîra, na uurithie mbura nthîgûrû îra ûpeete antû baaku rûrî rûgai rwao.
28 Kagiita kamwe nwa kwagîe na yûûra kana mîrimo nthîgûrû, kana ruuo rwa kûbîîthia irio mîndaani, kana kwora kwa irio, kana ngige, kana maginyo, kana bakaaya gûcîgîîrua n'anthû baao ntûûraani ciao; kana thîîna cia mûthemba woora ûkeegua ûrî, kana mîrimo ya mîthemba yonthe. 29 Gûgakarîka ûgu, îromba rîonthe kana kwerekana kwa muntû nwa ûrîkû kana antû baaku bonthe Isiraeri, bonthe bakîmenyaga kûthîîna kwao na kîeba rîru bataambûrûkie njara ciao beerekereetie nyomba îno, 30 ûroothikîîria ûrî îgûrû, bantû ara ûkaraga. Ûbarekere, na ûrûthîre woora muntû kûringana na bûra bunthe arûthaga, n'ûntû nwiyî nkoro yake n'ûntû i woû gwenka wiyî nkoro cia antû. 31 Rîru bagagûtîîya na bathiîre njîraani ciaku kagiita konthe kara bagaatûûra nthîgûrû îra wapeere biûyûûyû bietû.
32 Kîrî ageni, bara batarî ba antû baaku Isiraeri, baumîîte nthî ya kûraaya beegîîtue nkuma ya riîtwa rîaku rîînene, na mantû ma inya yaku, rîra bakaaya barombe beerekereete nyomba îno, 33 ûthikîîrie maromba maao ûrî îgûrû, na ûbarûthîre bûra bunthe bagaakûûria, kaingo antû bonthe ba nthîgûrû bamenya riîtwa rîaku na bagûtîîya, wa ta antû baaku Isiraeri, na bamenya riîtwa rîaku i rîgongagwa nyomba îno ngwakîrîîte.
34 Ûkaatha antû baaku baumagarûke bathi bakarûe na anthû baao, na barombe beerekereete taûni îno ûthuurîîte na nyomba îno yaku ngwakîrîîte kaingo riîtwa rîaku rîgongerwa ku, 35 ûthikîîrie îromba na kwerekana kwao ûrî îgûrû, na ûbaûmbanîre.
36 Bakaaya kwîyia mbere yaku, n'ûntû gûtirî we ateeyagia, na ûthûûre i bo ûbapeeyane kîrî mûnthû, na bagwatwe barî mîgwate bairwe nthî ya kûûraaya kana gûûkubî; 37 wegua bakaagarûka mathûgaania barî nthîgûrû înu barî mîgwate, na beerire bakwereke barî wa naagu nthîgûrû yao ya ûkombo bakwîre, ‘Itwîyîîtie, twarûtha ûthûûku,’ 38 na bakeerira na nkoro ciao cionthe barî nthîgûrû înu ya ûkombo bairirwe, na barombe beerekereete nthîgûrû yao, îra wapeere biûyûûyû biao, taûni îra ûthuurîîte, na nyomba îra ngwakîrîîte, 39 ûthikîîrie îromba na kwerekana kwao ûrî îgûrû ûbeegîîrue kîao, na ûbarekere meeyia maao.
40 Îîndî Mwathani, ka meetho maaku maraithe, na matû maaku mathikîîrie meegue maromba mara makûrombwa bantû aaga.
41 Ûkîîra, woû Mwathani Ngai, na ûûye bantû aaku a kûnogoka,
woû na îthandûkû rîaku rîa kîrîîkanîro rûra rûrî rwano rwa inya yaku.
Athînjîri baaku woû Mwathani Ngai, barooîkîrwa wonokio ta nguo,
atheru baaku barookeneera wegaani bwaku.
42 Îî Mwathani Ngai, ûtikaarege mwîtûûrîrua maguta waku.
Ririkana wendo bûûnene bûra weeranire kîrî Ndaundi mûruti ngûgî waku.”