7
1 Soromoni akûrîîkia kûromba, mwanki wendama kuuma îgûrû na wabîîthia igongwana bia kûbîîthia na biewa; na ûkumio bwa Mwathani bwaûyûra Nyomba ya Ngai. 2 Athînjîri ba Ngai batikîûmba kûthûngîra Nyomba ya Mwathani, n'ûntû ûkumio bwa Ngai i bwarî bûkûûyûra ku. 3 Rîra Aisiraeri bonthe boonire mwanki wîndamîîte nthî na ûkumio bwa Mwathani bûrî îgûrû ya Nyomba ya Mwathani, baaturia maru batiirithîîtie moothiû maao nthî, baagonga na baacookeria Mwathani nkaatho bakiugaga,“Mwathani n'ûmwega,
wendo bwake bûtûûraga tene na tene.”
Nyomba ya Ngai yaathûrwa
(1Ane 8:62-66)
4 Rîru mûnene na antû bonthe baaruta igongwana mbere ya Mwathani. 5 Na mûnene Soromoni aaruta kîgongwana kîa ng'ombe ngiri mîrongo îîrî na ciîrî na ng'ondu ngiri îgana rîa mîrongo îîrî. Kwoogu mûnene na antû bonthe baathûra Nyomba ya Ngai. 6 Athînjîri ba Ngai baarûngama twanyaani twao, na kinya Arawi, barî na into biao bia kwinîra Mwathani bira mûnene Ndaundi aarûthîîte bia gûkumia Mwathani bakîmûcookeria nkaatho bakiugaga, “Wendo bwake bûtûûraga tene na tene.” Athînjîri ba Ngai baraithanîîte na Arawi, baaringa tûrumbeta twao, Isiraeri bonthe barûngi.
7 Soromoni aathûra gatîgatî ga kîarago agu mbere ya Nyomba ya Mwathani, ara aarutîîre igongwana bia kûbîîthia na maguta ma biewa bia ngwatanîro, n'ûntû kîthînjîro kîa rûthuku kîra aarî akûrûtha gîtikîganîra igongwana bia kûbîîthia, biewa bia irio na mathuunya.
8 Kagiitaani gaku, Soromoni aarûtha kîatho gîa ntugû mûgwanja, amwe na Isiraeri yonthe. Kîarî kîrîndî kîînene antû baayîîte kuuma Rebo-Amathi mwanka Wandi Miisiri. 9 Ntugû ya inyanya baarûtha kîûthûrano kîa mwanya, n'ûntû i baarî bagûkûngûîra kwathûrwa gwa kîthînjîro gwa kagiita ga ntugû mûgwanja na îruga rîa ntugû ingî mûgwanja. 10 Ntugû ya mîrongo îîrî na ithatû ya mweri wa mûgwanja Soromoni eera antû beenûke mîciî yao, bakeneete n'ûntû bwa mantû meega mara Mwathani aarûthîrîîte Ndaundi na Soromoni na antû baake Isiraeri.
Mwathani aumîîra Soromoni
(1Ane 9:1-9)
11 Rîra Soromoni aarîîkiirie gwaka Nyomba ya Mwathani na nyomba ya ûnene, na aûmbana kûrûtha monthe mara aathûgaanîîtie kûrûtha Nyomba ya Mwathani na nyomba yake ya ûnene, 12 Mwathani amuumîîra ûtugû amwîra,
“I mbîgîîtue maromba maaku na ndeethuurîra bantû aaga arî nyomba yakwa ya kûrutagîrwa igongwana.
13 Rîra nkainga îgûrû wîgue gûtarî na mbura, kana mbathe ngige ciînyangie nthî kana ntûme mûrimo kîrî antû baakwa, 14 ûkeegua antû baakwa, bara beetanîrîîtue na riîtwa rîakwa, bakeenyiia na barombe bacûe ûthiû bwakwa bagarûke batigane na mîtugo yao îmîthûûku, rîru nkeegua ndî îgûrû, na nkabarekera wîyia bwao na nkooria nthîgûrû yao. 15 Kwoogu meetho maakwa makaarancûkia na matû maakwa makaathikîîria maromba mara makûromberwa bantû aaga. 16 N'ûntû îîndî i nthuurîîte na ndaatheria nyomba îno kaingo riîtwa rîakwa rîkumagîrua oogo tene na tene. Meetho maakwa na nkoro yakwa îkeegagua rîonthe îrî oogo.
17 Wegua ûkaathingata njîra ciakwa na ûmma bwa nkoro yaku ta bûra abaagu Ndaundi, na warûtha bunthe bûra ngaakwatha, na wathîkîra mawatho maakwa, 18 nkaarûngîka gîtî gîaku kîa ûnene, wa ta bûra ndeeranire na abaagu Ndaundi rîra ndaugire, ‘Ûtikaaga muntû wa kwathana Isiraeri.’
19 Îndî ûkaaya kûûndûka ûgatiganîria mawatho na maathana maakwa mara nkwete, na ûthi kûgonga ngai cingî, 20 naani ngaakûûra Isiraeri kuuma nthîgûrû yakwa îra mbaete, na ndege nyomba îno yakwa îra mbathûrîîte kaingo ngoongerwa ku. Nkamîrutaruta meethooni maakwa, na mmîtuîkithie gîntû gîa kûthekagîîrwa n'antû ba mîgongo. 21 Na kinya wegua nyomba îno îîndî ûgu nîgûkaathwa, muntû wonthe ûgaakûrûkîîra oogo akaarigara aûrie, ‘I kî n'ûntû Mwathani aarûtha nthîgûrû îno na nyomba îno ûûgû?’ 22 Antû bagaacookia bauge, ‘N'ûntû ibatiganîrîtie Mwathani, Ngai wa biûyûûyû biao, ûra aabarutire Miisiri, na baathingata ngai ciingî, bacigonga na bacitûmîkîra. N'ûntû bwa ûgu aareeta kînyamaara gîkî kîonthe kîrî bo.’ ”