Ngûgî ingî cia Soromoni
(1Ane 9:10-28)
8
1 Mîanka mîrongo îîrî îkûthira, kagiita kara Soromoni aathûkiirie gwaka Nyomba ya Ngai na nyomba yake ya ûnene, 2 Soromoni aacookeeria taûni ira mûnene Iramu aarî akûmwa, rîru aatûma Aisiraeri baathi gûtûûra ku. 3 Soromoni aarûa na antû ba taûni ya Amathi-Soba, na agwata taûni înu. 4 Aaka taûni ya Tandimori rwanda na aaka bianda bionthe bira birî Amathi. 5 Aaka Bethi-Oroni ya bwa îgûrû na ya Bethi-Oroni ya bwa iti, irî taûni imbirigîre na nthingo na acirûthîra mîîrîga îkîûmba kwingwa, 6 amwe na taûni ya Baarathi na bianda biayo bionthe, na taûni cionthe cia nkaarî ciake cia mbaraathi na mbaraathi ciake. Soromoni aaka kîonthe kîra eendire gwaka Njerusaremu, Rebanoni na nthî îra aathaga yonthe.7 Antû bara bangî bonthe baatigeere ba Aiti, Amori, Aperisi, Aibi, na Anjebusi ûgu i ta kuuga bara bataarî ba Isiraeri, 8 nciarwa ciao ira ciatigarîîte nthîgûrû înu, bara Aisiraeri bataathirîîtie, baba Soromoni aatuîkithia nkombo ciake cia kûruta ngûgî mwanka îmunthî. 9 Îndî antû ba Isiraeri Soromoni ataabatuîkithia nkombo cia kûmûrutîra ngûgî. Aabatuîkithiirie antû ba ndûa, na anene ba atongoria baake ba ndûa, na atongoria ba nkaarî ciake cia ndûa, na athiithia ba mbaraathi. 10 Kwarî na anene ta babu magana maîrî ma mîrongo îtaano bara baathuurîîtwe i mûnene Soromoni ba kûrûngamîîra antû.
11 Soromoni aareeta mwekûrû wake mwarî wa Faraû kuuma ntûûra ya Ndaundi amûreeta nyomba îra aamwakîrîîte, n'ûntû augire, “Mwekûrû wakwa atitûûra Taûni ya Ndaundi mûnene wa Isiraeri, n'ûntû gûntû kûra Îthandûkû rîa Kîrîîkanîro rîa Ngai rîthûngîrîte i kûûtheru.”
12 Rîru Soromoni aarutîra Mwathani kîgongwana gîa kûbîîthia kîthînjîrooni kîa Mwathani kîra aakîîte agu mbere ya kanyomba ka mûthûngîîro wa Nyomba ya Ngai, 13 kûringana na bûra Musa aathanîîte kûrûthagwe n'ûntû bwa biatho bia Sabatû, na kûyiûka kwa mweri, na biatho bithatû bia mwanka, tabio biatho bia mîgaate îtarî miimbithie, biatho bia maketha, na biatho bia tûganda. 14 Kûringana na watho bwa îthe Ndaundi, Soromoni n'aagaîrîîre athînjîri ba Ngai ngûgî ciao. N'aagaîrîîre kinya Arawi ngûgî ya gûtongoria antû mantûûni ma gûkumia Mwathani na gûteetheeria athînjîri ba Ngai ngûgîîni ciao cia wa kîra ntugû. Na akaria ba mîîrîga baagaîrwa ngûgî yao ya gûkaria. 15 Nabo bataatigana na kûthingata maathana mara mûnene apeere athînjîri ba Ngai na Arawi mantûûni monthe kinya mantû meegiî kîgîîna.
16 Kwoogu ngûgî ya Soromoni yonthe yaarutîka kuuma ntugû îra mûcingi wa Nyomba ya Mwathani wenjirwe mwanka yaarîîkia buru.
17 Rîru Soromoni aathi Esioni-Ngeberi na Erothi îkumbo rîa îria, nthîgûrû ya Endomu. 18 Mûnene Iramu amûtûmîra meeri ciatongoreetue n'aruti ngûgî baake, antû bara baiyî mantû ma îria. Baba, barî amwe na antû ba Soromoni, baathi bwa Ofiri na baaretera Soromoni kiro ngiri îkûmi na itaano cia thaabu, ira baaneenkeere mûnene Soromoni.