Mûnene wa Seba aariûngîra Soromoni
(1Ane 10:1-13)
9
1 Rîra mûnene wa mûka wa Seba eegiirue mantû ma nkuma ya Soromoni, aaya Njerusaremu kûmûthima na kûmûûria biûria biûmo. Aakinya na gîkundi kîînene mûno gîa antû barî na nkamîîra ikamatîîte mîtaa, thaabu îmbingî, na maiga ma goro. Aaya kîrî Soromoni na aaria n'we îgûrû rîa monthe mara aarî namo mathûgaaniani. 2 Soromoni amûcookeria biûria bionthe, gûtirî bu bwarî bûûmo kîrî we kûmwereeca. 3 Rîra mûnene wa Seba oonire ûûme bwa Soromoni, amwe na nyomba ya ûnene îra aakîîte, 4 irio bira biareetagwa meethaani yake, bûra atongoria baake baakari nthî nwe, bûra aruti ngûgî baake baamûtûmîkagîra na nguo ciao, bara baamweyaga biakûnyua na bûra beekîrîîte nguo ciao, na igongwana bia kûbîîthua bira aarutîîre Nyomba ya Mwathani, aarigara.5 Eera mûnene, “Mantû mara ndeegiirue nthîgûrû yakwa îgûrû rîa mantû mara ûrûthîîte na îgûrû rîa ûûme bwaku i ma mma. 6 Îndî nteetîgia bûra baambîîrire mwanka ndaaya ndoona na meetho maakwa. Ûmma, bûra ndeerîîtwe bûtigîkinya nwa nucu ya ûnene bwa ûûme bwaku, n'ûkûrûkîîtie bûra ndeegîîtue na kûraaya. 7 Nwa mwanka antû baaku wîgue bakenaga mûno, bara barûngamaga mbere yaku na bakeegua ntheto cia ûûme ira waragia! 8 Mwathani Ngai waku arookumua, ûra akeneete i woû na agûtuîkithia mûnene wa Isiraeri. Ngai nendeete antû ba nthîgûrû îno na atikooro abatiganîria. Kwoogu n'abanenkereete mûnene ûra ûkabaatha bûra kûbatîîrue na ûtheru.”
9 Rîru aanenkera mûnene Soromoni kîewa gîa kiro ngiri inya na magana mataano cia thaabu, mîtaa na maiga ma goro. Gûteegîîtue kûrî na mîtaa îmîega ta înu mûnene wa mûka wa Seba apeere mûnene Soromoni.
10 Nkûrûki ya ûgu, aruti ngûgî ba Iramu na aruti ngûgî ba Soromoni bara baareetire thaabu kuuma Ofiri baareeta mîtî ya arigamu na maiga ma goro. 11 Mûnene Soromoni aatûmîra mîtî înu kûrûtha nkinyo cia Nyomba ya Mwathani na nyomba ya ûnene, na kinya kûrûthîra aini wandîndî cia ndigi inyingî na ngita. Mbereeni gûtoonekeete mîtî ta înu nthîgûrû ya Njunda.
12 Mûnene Soromoni n'we aanenkera mûnene wa mûka wa Seba gîntû kîonthe kîra eendaga na bira aarombire, aamwere nkûrûki ya bira aamûretereete. Rîru aathi aacooka barî na antû baake nthîgûrû yake.
Ûtonga bwingî bwa Soromoni
(1Ane 10:14-25)
13 Ûrito bwa thaabu bûra Soromoni aagwataga wa kîra mwanka i ta kiro ngiri mîrongo îîrî na itaano, 14 tûtagûtara ûgooti bûra bwarîagwa n'abiacaara na itonga bira binene. Kinya anene bonthe ba Arîbia na ngabana ba nthî i baaretagîra Soromoni thaabu na fetha.
15 Mûnene Soromoni aarûtha rong'o inene magana maîrî, wa îra îmwe yakaandîîtwe na thaabu ya kiro mûgwanja, 16 na ingî i niini magana mathatû, wa îra îmwe yakaandîîtwe na kiro ta ithatû ûgu cia thaabu. Auga cionthe ciaigwe nyomba înene yeetagwa Nyomba ya Mûthitû wa Rebanoni.
17 Mûnene kinya auga gîtî kîa ûnene kîînene kîrûthwe. Kîarûthîîtwe na mûguongo na gîakandwa na thaabu înkembe. 18 Gîtî gîku kîa ûnene kîarî na nkinyo ithanthatû na bantû a gûkinya a thaabu, bira biagwatithanîîtue na gîtî gîku, na wa kîra rûteere rwakîo i kwarî na bantû a kwaigîîra njara na mîbuanaano îîrî ya cimba irûngi nteere cia bantû agu akwaigîîra njara. 19 I kwarî na mîbuanaano ya cimba îkûmi na îîrî nkinyooni inu ithanthatû, îmwe îrî wa kîra rûteere rwa wa îra nkinyo. Gîtî ta gîku gîtaarûthîîtwe kîngî ta kîo ûneneeni nwa bûrîkû. 20 Ikombe bionthe bia mûnene Soromoni bionthe biarî bia thaabu, na into bionthe bia nyomba ya Mûthitû wa Rebanoni biarî bia thaabu îra nkembe, fetha îtaataragwa îrî gîntû ntugûûni cia Soromoni. 21 Soromoni naarî na meeri ciathiiyaga mwanka Tarisisi na aruti ngûgî ba Iramu, iita rîmwe nyuma ya mîanka îthatû meeri inu cia Tarisisi iciayaga ireeteete thaabu, fetha, mîguongo, magûna na tausi.
22 Kwoogu mûnene Soromoni n'acindîîte anene bara bangî bonthe ba nthîgûrû na ûûme na ûtonga. 23 Anene bonthe ba nthîgûrû i baathiiyaga kîrî Soromoni kûthikîîria ûûme bûra Ngai eekîrîîte nkorooni yake. 24 Wa kîra mwanka, bara baayaga i baareetaga biewa biingî: Into bia fetha na thaabu, na nguo, into bia ndûa na mîtaa, na mbaraathi na nyûmbû.
25 Soromoni aarî na tûnyomba ngiri inya twa kwaiga mbaraathi na nkaarî cia ndûa, na athiithia ba mbaraathi ngiri îkûmi na ciîrî. Abagaigîîte taûniini ira nkaarî inu ciaigagwa, na ira iingî nyomba ya mûnene naagu Njerusaremu. 26 Nwe aathaga anene bonthe kwanjîîria muuro wa Yufîrîti, mwanka nthî ya Afirisiti, kûthi mwanka mwankaani wa Miisiri. 27 Mûnene aatûma thaabu na fetha ciingîa ta maiga Njerusaremu, na mbaaû cia mîthithinda nacio ciingîa ta mîkûyû ya Sepera. Mûnene ûyu naatûmire fetha ikara wa ta maiga Njerusaremu, mîtarakwa n'yo yaingîa ta mîkûyû mîaranthî ya irîma. 28 Mbaraathi cia Soromoni ciareetagwa kuuma Miisiri na kuuma nthîgûrû ira ingî cionthe.
Gûkua gwa Soromoni
(1Ane 11:41-43)
29 Ngûgî ira iingî cia Soromoni îgiita rîa wathani bwake, kuuma mwanjîîrio mwanka mûthia, ciandîkîîtwe rûgonooni rwa kîroria Nathani, na îbukuuni rîa ûroria bwa Aiya ûra wa kuuma Siro, na îbukuuni rîa bioneki bia Indo ûra woonaga mantû na kîongo îgûrû rîa Njeroboamu mwana wa Nebati. 30 Soromoni aathire Isiraeri yonthe arî Njerusaremu mîanka mîrongo îna. 31 Rîru aakua na aathikwa Taûni ya îthe Ndaundi, na mwana wake Reoboamu aatuîka mûnene bantû aake.