Isiraeri yaûmîria Reoboamu Kîongo
(1Ane 12:1-20)
10
1 Reoboamu aathi Sekemu, n'ûntû Aisiraeri bonthe i baarî bakûthi noogo kûmûtuîkithia mûnene. 2 Rîra Njeroboamu mwana wa Nebati ûra aarî akûthi Miisiri atoorokeete Soromoni eegiirue ûgu, aacooka. 3 Kwoogu baatûmana Njeroboamu, rîru we na Isiraeri bonthe baathi kîrî Reoboamu bamwîra, 4 “Abaagu n'aatwaîkiirie mîrigo îmîrito, îîndî tûûthîrie ngûgî imbûmo cia abaagu, na tûgagûtûmîkîra.” 5 Abeera, “Îthiini bûûye kaîrî nyuma ya ntugû ithatû.” Kwoogu antû baathi.6 Rîru mûnene Reoboamu aûria akûrû bara baatûmîkagîra îthe Soromoni rîra aarî mwoyo ûkûrû, abaûria, “Bûrîndoria ncookeria antû baba ata?”
7 Bamûcookeria bamwîra, “Ûkaaya kwîgîîrua antû baba kîao na ûkabakenia, na ûkabaarîria bwega, bagaatûûra barî aruti ngûgî baaku.”
8 Îndî Reoboamu aaregana na mataaro mara akûrû baamwere na aathi kûûria nthaka ûkûrû bara aakûranîîtie nabo na baamûtûmîkagîra. 9 Abaûria, “N'aata bûkûndoria ncookerie antû baba bambîîra, ‘Tûûthîrie mîrigo îmîrito îra abaagu aatwaîkiirie?’ ” 10 Nthaka ira ciamwîra, îra antû babu bagûkwîra atî ûbaûthîrie mûrigo ûmûrito ûra abaagu aabaîkiirie ûûgû, “Kaara gaakwa ga kaaraira i kanene nkûrûki ya kauna ka baaba. 11 Baaba aabwîkîîre îcoki rîîrito, wana i nkaarîritûia nkûrûki. Baaba aabûturire na mîthanju, nkaabûtura na mîthanju îrî na mîîgua.”
12 Nyuma ya ntugû ithatû, Njeroboamu barî na antû bara bonthe baacooka kwa Reoboamu, wa bûra mûnene aabeerîîte bacooke nyuma ya ntugû ithatû. 13 Mûnene n'we abacookeria athûûri na akîreganaga na mataaro mara apeetwe n'akûrû. 14 Aathingata mataaro ma nthaka abeera, “Baaba aabwaîkiirie mîrigo îmîrito na ga nkaamîritûia nkûrûki. Baaba aabûturire na mîthanju, nkaabûtura na mîthanju îrî na mîîgua.” 15 Kwoogu mûnene ataathikîîria antû, n'ûntû ûntû bwaumîîte kîrî Ngai, kûûyûria mûgambo wa Mwathani ûra aarîrîîtie Njeroboamu mwana wa Nebati gûkûrûkîîra kîroria Aiya ûra wa kuuma Siro.
16 Rîra Isiraeri yonthe yoonire atî mûnene n'aregire kûbathikîîria, bamûcookeria bamûûria,
“I rûgai rûbi tûrî naru kîrî Ndaundi,
I gacuncî kabi tûrî nako kîrî mwana wa Njesii?
Wa kîra ûmwe acooke gwake, biû Isiraeri!
Îîndî menyeera mûciî waku woû Ndaundi.”
Kwoogu Isiraeri bonthe baacooka bwa kwao. 17 Îndî Reoboamu aathi na mbere kwatha Aisiraeri bara baatwîre taûni cia Njunda.
18 Rîra mûnene Reoboamu aatûmire Andoramu, ûra aarî mûrûngamîîri wa ngûgî cia taka, antû ba Isiraeria bamûûraga na maiga. Mûnene Reoboamu augia aatwa nkaarî yake ya ndûa aatoorokera Njerusaremu. 19 Kwoogu antû ba mîîrîga ya neegûrû ya Isiraeri îtûûraga yûûmîrîîtie rûrîîyo rwa Ndaundi kîongo mwanka îmunthî tûrî.