11
1 Rîra Reoboamu aakinyire Njerusaremu, eethîrania antû ba mwîrîga wa Njunda na ba mwîrîga wa Benjameni bara baarî ncamba cia ndûa ngiri îgana na mîrongo înaana ba kûrûa na mîîrîga ya neegûrû ya Isiraeri, kaingo bacookanîîria ûnene bwa Reoboamu. 2 Îndî kiugo kîa Mwathani kîayîîra Semaya mûruti ngûgî wa Ngai: 3 “Îra mûnene Reoboamu wa Njunda, mwana wa Soromoni na Isiraeri yonthe îra îrî Njunda na Benjameni, 4 Mwathani ariuga ûûgû, ‘Bûtikaathi kûrûa na aruanyûkwe. Wa kîra ûmwe n'enûke, n'ûntû i niû nkûrûtha ûûgû.’ ” Kwoogu baathîkîra biugo bia Mwathani baacooka bataathi kûrûa na Njeroboamu.Reoboamu airiga taûni na nthingo
5 Reoboamu aatûûra Njerusaremu na aaka taûni imbirigîre na nthingo Njunda. 6 Aakire Bethireemu, Etamu, Tekoa, 7 Bethi-Suri, Soko, Anduramu, 8 Ngathi, Maresa, Sibu, 9 Andoraimu, Rakisi, Aseka, 10 Sora, Aiyaroni, na Eburoni. Ino i cio taûni ira ciairigîîrwe na nthingo Njunda na Benjameni. 11 Eekîra nthingo cia cio inya na eekîra atongoria ba ndûa ku, bakeeyagwa irio, maguta ma mîceituuni na ndibei. 12 Eekîra rong'o na matumo taûni inu cionthe, na aciîkîra inya nkûrûki. Kwoogu oona Njunda na Benjameni i gûtûûra irî ruungu rwake.
13 Athînjîri ba Ngai na Arawi bara baarî Isiraeri yonthe kuuma iteere biao bionthe baathi kîrî we. 14 Arawi baatiga kinya gûntû kwao gwa kûrîîthia na into biao, baaya Njunda na Njerusaremu n'ûntû Njeroboamu na nthaka ciake i baarî bakûbarega ta athînjîri ba Mwathani. 15 Na aathuura athînjîri baake wengwa bagûtûmîka gûntû kûra kûgongagîrwa na kinya kîrî mîbuanaano ya mbûri na kayaû îra aarûthîîte. 16 Bara baathuuranîrîîte nkoro ciao gûceria Mwathani Ngai wa Isiraeri, baathingata Arawi Njerusaremu kûrutîra Mwathani Ngai wa beethe igongwana. 17 Beekîra ûnene bwa Njunda inya na baagwatîîra Reoboamu mwana wa Soromoni gwa kagiita ka mîanka îthatû, bakîthiiyaga na mîthiîre ya Ndaundi na Soromoni.
Mûciî wa Reoboamu
18 Reoboamu aagûra Maarathi, ûra aarî mwarî wa nthaka ya Ndaundi Njerimothi na mwekûrû wake Abiairi, mwarî wa mûthaka wa Eriabu mûthaka wa Njesii. 19 Baaciara aana ba antû arûme tabo, Njeusi, Semaria na Saamu. 20 Rîru aagûra Maaka mwarî wa Abusaromu, ûra baaciarire n'we Abiya, Atai, Sisa na Seromithi. 21 Reoboamu eenda Maaka mwarî wa Abusaromu nkûrûki ya eekûrû baake bara bangî na aka ba kwaiga. Bonthe, aarî na eekûrû îkûmi na banaana na aka ba kwaiga mîrongo îthanthatû, aana ba antû arûme mîrongo îîrî na banaana na aarî mîrongo îthanthatû.
22 Reoboamu aathuura Abiya mwana wa mwekûrû wake Maaka atuîka mûtongoria gatîgatî ka aruagina, kaingo amûtuîkithia mûnene. 23 Aarûtha mantû na ûûme, aanyagaaria nthaka ciake nthî cionthe cia Njunda na Benjameni, na kîrî taûni ira mbirigîre na nthingo cionthe. Abaa biakûrîa biingî na abagûrîra eekûrû baingî.