Miisiri yaithûkîra Njunda
(1Ane 14:25-28)
12
1 Rîra wathani bwa Reoboamu bwarûgamire na bwagîa inya, aatiganîria watho bwa Mwathani, aatiganîria Mwathani, we na Isiraeri bonthe bara baarî n'we. 2 Mwankaani wa îtaano wa wathani bwa mûnene Reoboamu, Sisaki mûnene wa Miisiri aithûkîra Njerusaremu n'ûntû i baarî gûtuîka t'etîgua kîrî Mwathani. 3 Mûnene ûyu aayire na nkaarî cia ndûa ngiri na magana maîrî, athiithia ba mbaraathi ngiri mîrongo îthanthatû, na acikaarî baingî batatarîka kuuma Miisiri: Amwe na ba kuuma Rîbia, Asukii na Aethiopia. 4 Aagwata taûni ira ciarî mbirigîre na nthingo cia Njunda na aaya mwanka Njerusaremu.5 Rîru kîroria Semaya aaya kîrî Reoboamu na kîrî akûrû ba Njunda bara beethîreene Njerusaremu bakuthûkîîte Sisaki, abeera, “Mwathani ariuga ûûgû, ‘I bûntiganîrîîtie; kwoogu naani i mbûtiganîrîîtie njaraani cia Sisaki.’ ”
6 Atongoria ba Isiraeri na mûnene beenyiia bauga, “Mwathani n'akûrûtha bûra kûbatîîrue.”
7 Rîra Mwathani oonire bakwînyiia, kiugo gîkî kîa Mwathani kîayîîra Semaya gîkiugaga, “N'ûntû bakwînyiia, ntibathiria îndî nkabakûûra îgiita rîtarî rîraaya na mûthûûro wakwa ûtiitûûrwa Njerusaremu gûkûrûkîîra Sisaki. 8 Îndî bakeegua barî ruungu rwake, kaingo bamenya mwanya ûra ûrîo gatîgatî ga gûntûmîkîra na gûtûmîkîra anene ba nthî ira ingî.”
9 Kwoogu Sisaki mûnene wa Miisiri aithûkîra Njerusaremu, aathûkia igîîna bia Nyomba ya Mwathani na igîîna bia nyomba ya mûnene, aathûkia into bionthe. Aathûkia kinya rong'o cia thaabu ira Soromoni aarûthîîte. 10 Kwoogu mûnene Reoboamu aarûtha rong'o cia rûthuku bantû acio, na acinenkanîra kîrî akaria, bara baakaragia mûrango wa nyomba ya mûnene. 11 Rîonthe rîra mûnene aathiiyaga Nyomba ya Ngai, akaria baathiyaga n'we bakamatîîte rong'o, rîru bagacicookia nyomba ya kwaiga into bia ndûa.
12 N'ûntû bwa bûra eenyiirie mûthûûro wa Mwathani kîrî we wagwîrîîra, kwoogu ataamûthiria kûrû. Nkûrûki ya ûgu, mantû maakara ta makûbua Njunda.
Gûkua kwa Reoboamu
13 Kwoogu Reoboamu eerûngîka Njerusaremu na aathi na mbere kwathana. Reoboamu aanjîîrie kwathana arî na mîanka mîrongo îna na ûmwe, aathana mîanka îkûmi na mûgwanja arî Njerusaremu, taûni îra Mwathani aathuurîîte kuuma mîîrîgaani yonthe ya Isiraeri kaingo agongagîrwa oogo. Gina eetagwa Naama Mûamoni. 14 N'arûthire ûthûûku n'ûntû ataaceria Mwathani na nkoro yake yonthe.
15 Mantû mara mangî Reoboamu aarûthire îgiita rîa wathani bwake, kuuma mwanjîîrio mwanka mûthia amwe na rûgono rwa mûciî wake, maandîkîîtwe mabukuuni ma Semaya ûra kîroria na ma Indo ûra oonaga mantû na kîongo. Reoboamu na Njeroboamu i baakarire bakîrûaga rîonthe. 16 Rîru Reoboamu aakua na aathikwa Taûni ya Ndaundi. Na Abiya mwana wake aatuîka mûnene bantû aake.