Abiya aathana Njunda
(1Ane 15:1-8)
13
1 Mwankaani wa îkûmi na înaana wa wathani bwa Njeroboamu, Abiya aatuîka mûnene wa Njunda. 2 Aathana mîanka îthatû arî Njerusaremu. Gina eetagwa Mikaya mwarî wa Urieri wa Ngibea.Gwaûka ndûa gatîgatî ka Abiya na Njeroboamu. 3 Abiya aathi ndûani na njûûrî ya ncamba cia acikaarî ngiri magana mana. Njeroboamu n'we eethuuranîra kûrûa n'we athuurîîte njûûrî ya ncamba cia acikaarî ngiri magana manaana. 4 Rîru Abiya aarûngama îgûrû rîa kîrîma gîa Semaraimu, kîra kîrî nthîgûrû ya irîma ya Eburaimu, na auga, “Njeroboamu na Isiraeri yonthe, nthikîîriani! 5 Ka bûtaiyî atî Mwathani, Ngai wa Isiraeri, nanenkanîrîîte ûnene bwa Isiraeri kîrî Ndaundi na nciarwa ciake tene na tene na njîra ya kîrîîkanîro gîa tene na tene.a 6 Amwe na ûgu Njeroboamu mwana wa Nebati, mûruti ngûgî wa Soromoni mwana wa Ndaundi, aûmîria mûnene wake kîongo. 7 Na antû baakari woogu bataarî kîîrîgî bamwîthîranîra, nabo baatha Reoboamu mwana wa Soromoni kûrûtha bûra bo beendaga, n'we atikîrega n'ûntû aarî mwana na ataiyî mantû.
8 “Na îîndî n'ûkûbanga kûregana na ûnene bwa Mwathani, bûra bûrî njaraani cia nciarwa cia Ndaundi. Ûmma bûrî njûûrî înene na bûrî na tûyaû twa thaabu tûra Njeroboamu aarûthire tûtuîka ngai cienu. 9 Bûteengatiirie athînjîri ba Mwathani, nthaka cia Arûni, na Arawi, na bwerûthîra athînjîri ta antû ba nthî ingî? Ûra wonthe ûûyaga kwîtheria na ncamba ya kiumîri na ntûrûme mûgwanja nwa atuîke mûthînjîri wa into bibu bûgwîta ngai.
10 “Îndî tiû, Mwathani n'we Ngai wetû, na tûtimûtiganîrîîtie. Athînjîri ba Ngai bara batûmîkagîra Mwathani n'aana ba Arûni, na Arawi bakîbateethagîîria. 11 Wa kîra rûkîîrî na ûgoro barutagîra Mwathani igongwana bia kûbîîthua na mwanki na macoco mara manunkaga bwega, bakabanga mîraini ya mîgaate meethaani ya thaabu îra nkeembe, na ûgoro rîonthe bakamenyeera taa ira irî gîtugîîni gîa kûrûngîka taa kîa thaabu kaingo ikara igîankanaga. I tûthingataga bûra Mwathani Ngai wetû eendaga, îndî biû i bûmûtiganîrîîtie. 12 Raithaani, Ngai arî naati, n'we mûtongoria wetû. Athînjîri baake barî na tûrumbeta twao bagaatûringa kaingo twambîîria kûrûa naabi. Îî biû Aisiraeri, bûtikaarûe na Mwathani, Ngai wa biûyûûyû bienu, n'ûntû bûtiûmbana.”
13 Njeroboamu n'aarî agûtûma acikaarî baake bamwe baithûkîra njûûrî ya Njunda baumîîte bwa nyuma, kwoogu arî mbere ya Njunda njûûrî înu îngî n'yo nîaumîîte bwa nyuma. 14 Rîra Njunda baagarûkire na boona i baithûkîîrwe mbere na nyuma, baarîrîra Mwathani. Athînjîri baaringa tûrumbeta twao 15 na njûûrî ya Njunda baaringa nkururo cia ndûa. Rîra baaringire gîtuma, Ngai acinda Njeroboamu na Isiraeri yonthe mbere ya Abiya na Njunda. 16 Njûûrî ya Isiraeri baakuthûka antû ba Njunda, na Ngai abanenkanîra njaraani ciao. 17 Abiya na njûûrî yake baatura Aisiraeri mûno, baûraga acikaarî ba Isiraeri, ngiri magana mataano bara baarî bamwe ba acikaarî bara baarî ncamba gatîgatî ga Isiraeri. 18 Ûgu i bu Aisiraeri baacindirwe îgiita rîru, na antû ba Njunda baacinda, n'ûntû ibeerîgîîre Mwathani, Ngai wa booyûûe. 19 Abiya eengana na Njeroboamu na njûûrî yake, na amûtuunya taûni cia Betheri, Njesana na Eburoni, na ntûûra ira ciaithiûrûkîîte. 20 Njeroboamu atoorogwata inya îgiitaani rîa Abiya. Na Mwathani amûkaanûkia n'we aakua.
21 Îndî Abiya aathi na mbere kûgwata inya. Aagûra aka îkûmi na bana na aagîa na aana ba antû arûme mîrongo îîrî na baîrî na aarî îkûmi na bathanthatû.
22 Ngûgî ira ingî cia wathani bwa Abiya, bûra aarûthire na bûra augire, ciandîkîîtwe ngonooni cia kîroria Indo.