Asa aathana Njunda
14
1 Abiya aakua na aathikwa Taûni ya Ndaundi. Mwana wake Asa aatuîka mûnene bantû aake, na ntugûûni ciake nthîgûrû nîarî na ûkiri gwa kagiita ka mîanka îkûmi.2 Asa n'aarûthire bwega na bûra kûbatîîrue mbere ya Mwathani Ngai wake. 3 Aaruta ithînjîro bia ngai i ngeni na gûntû wa kûrutîrwa igongwana, aunanga mîbuanaano na itugî bia Asera. 4 Aatha antû ba Njunda bacerie Mwathani, Ngai wa beethe, na baathîkîre mawatho na maathana maake. 5 Aaruta gûntû gwa kûgongera ngai cia mîbuanaano na ithînjîro bia kûbîîthîria macoco taûniini cionthe cia Njunda. Kwoogu ûnene bwake bwegua bûrî na ûkiri kagiitaani ka wathani bwake. 6 N'ûntû nthîgûrû nîarî na ûkiri, naakire taûni imbirigîre na nthingo cia Njunda. Gûtirî we aarûa n'we mîankaani înu, n'ûntû Mwathani naamwere kûnogoka.
7 Eera antû ba Njunda, “Ga twake taûni ino, na tûcithiûrûkirie na nthingo, irî na ibayo, mîîrîga na itugî, îrî na mîrango na mîrîîgo ya cuuma. Nthîgûrû îno nwa yetû, n'ûntû i tûcereetie Mwathani Ngai wetû, twamûceriirie, n'we n'atwete ûkiri nteere cionthe.” Kwoogu baaka, baathi na mbere gûkara bwega.
8 Mûnene Asa aarî na njûûrî ya acikaarî ngiri magana mathatû kuuma Njunda, barî na rong'o inene na matumo, na bangî ngiri magana maîrî na mîrongo înaana kuuma Benjameni, barî na rong'o i niini na nta. Baba bonthe baarî ncamba cia ndûa.
9 Sera Mûethiopia abaithûkîra arî na njûûrî înene ya antû miirioni îmwe na nkaarî cia ndûa magana mathatû, baaya mwanka Maresa. 10 Asa aathi kûrîîkana n'we, na njûûrî ciebanga n'ûntû bwa ndûa kîbondeeni kîa Sefatha akubî na Maresa.
11 Rîru Asa aakayîra Mwathani Ngai wake auga, “Mwathani, gûtirî we ûkari ta woû wa gûteethia bara batarî na inya kîrî bara barî na inya. Tûteethie, itû Mwathani Ngai wetû, n'ûntû i woû twîrîgîîrîîte, na tuumîîrîîte njûûrî îno nene ûûgû riîtwani rîa Mwathani Ngai wetû. Îî Mwathani, ûrî Ngai wetû, ûtikaareke muntû agûcinda.” 12 Kwoogu Mwathani aatura Aethiopia mbere ya Asa na antû ba Njunda. Aethiopia baugia, 13 na Asa na njûûrî yake beengana nabo mwanka Gerari. Baûraga Aethiopia baingî mûno, gûtaatigara nwa ûmwe. Baathiriirue mbere ya Mwathani na njûûrî yake. Njûûrî ya Njunda yaataa into biingî mûno. 14 Njaathiria ntûûra cionthe ira ciathiûrûûkîrîîte Gerari n'ûntû antû ba ntûûra ya Gerari i baarî bakûgwatwa n'ûguaya kuuma kîrî Mwathani. Baataa ntûûra ino cionthe, n'ûntû i kwarî na into biingî ku. 15 Baithûkîra kinya kambî cia arîîthi na baathûkia ng'ondu inyingî, mbûri na nkamîîra. Rîru baacooka Njerusaremu.