15
1 Kîrundu wa Ngai ayîîra Asaria mwana wa Ondendi. 2 Aumagarûka aathi gûkomana na Asa, amwîra, “Nthikîîriani, woû Asa na antû ba Njunda bonthe na Benjameni. Mwathani arî amwe naabi rîra bûrî akubî n'we. Bwamûceria, bûkamwona, îndî bwamûtiganîria, n'we akabûtiganîria. 3 Gwa kagiita kaaraaya Isiraeri îtaarî na Ngai wa mma, îtaarî na mûthînjîri wa Ngai wa kûbarutana na îtarî na watho. 4 Îndî barî thîînaani yao baagarûkîra Mwathani, Ngai wa Isiraeri, na bamûceria, bamwona. 5 Ntugûûni inu gûtaarî kwega kûthiiyanga, n'ûntû antû bonthe bara baatûîre nthîgûrû inu i baarî thîînaani înene. 6 Mûgongo waathiragua i mûgongo ûra ûngî na taûni îmwe n'yo îkathirua i taûni îra îngî, n'ûntû Ngai aabathîînagia na njîra cionthe. 7 Îndî biû, gîtaani inya na menya bûkua nkoro, n'ûntû bûkaarîwa ngûgî yenu.”8 Rîra Asa eegiirue mîgambo înu na ûroria bwa Asaria mwana wa kîroria Ondendi, aagîa na kûûmîîria. Aaruta ngai cia ûrongo nthîgûrû ya Njunda na Benjameni na kuuma taûni ira aagwete irîmaani bia Eburaimu. Aacookeeria kîthînjîro kîa Mwathani kîra kîarî mbere ya kanyomba ka mûthûngîîro ka Nyomba ya Mwathani.
9 Rîru eethîrania antû ba Njunda bonthe na ba Benjameni na antû ba kuuma Eburaimu, Manase na Simioni bara baatûûraga gatîgatî kaao, n'ûntû baingî ibaarî bakûûya kîrî we kuuma Isiraeri rîra boonire Mwathani Ngai wake naarî amwe n'we. 10 Beethîrana Njerusaremu mweriini wa îthatû wa mwanka wa îkûmi na îtaano wa wathani bwa Asa. 11 Ntugû înu baarutîra Mwathani kîgongwana kîa ng'ombe magana mûgwanja, ng'ondu ngiri mûgwanja na mbûri kuumania na bira baataîte. 12 Baathûngîra kîrîîkanîrooni gîa gûceria Mwathani, Ngai wa beethe, na nkoro ciao cionthe. 13 Na beetîganîîria bonthe bara bakaarega gûceria Mwathani, Ngai wa Isiraeri, ka bakaûragwa, arî ûmûniini kana ûmûnene, mûka kana muntû mûrûme. 14 Baathiîtia kîrî Mwathani na kayû kaanene, baugîîria na tûrumbeta na ngoci. 15 Antû ba Njunda bonthe baakeneera mûthiîtio ûyu n'ûntû baacuthiîtîîtie na nkoro yonthe. Baaceria Mwathani na wîru, na bamwona. Kwoogu Mwathani abaa ûkiri nteere cionthe.
16 Mûnene Asa aaruta kinya Maaka ûyûûe wa mûka gîtîîni kîa ûnene n'ûntû n'aarûthîîte mûbuanaano wa mûgiro wa Asera. Asa aatemanga mûbuanaano ûyu, acurebûranga na acubîîthîria kîbondeeni gîa Kindironi. 17 Wana wegua ti gûntû kunthe gwa kûgongera ngai cia ûrongo kwenyangiirue Isiraeri, Asa n'arî mwîtîgua nkorooni yake kîrî Mwathani mûtûûrîreeni wake unthe. 18 Naareetire Nyomba ya Mwathani thaabu na fetha na into bia gûtûmîra bira we na îthe baathûrîrîîte Mwathani.
19 Gûteethîrwa kûrî na ndûa kaîrî mwanka mwankaani wa mîrongo îthatû na îtaano wa wathani bwa Asa.