Mîanka ya mûthia ya Asa
(1Ane 15:17-22)
16
1 Mwankaani wa mîrongo îthatû na îthanthatû wa wathani bwa Asa, Baasa mûnene wa Isiraeri aithûkîra Njunda na airigîra Rama kûrigîîria muntû nwa ûrîkû atikaume kana athûngîra nthîgûrû ya Asa mûnene wa Njunda.2 Rîru Asa aathûkia thaabu na fetha kuuma igîînaani bia Nyomba ya Mwathani na bia nyomba yake ya ûnene aatûmîra Mbeni-Andandi mûnene wa Asîîria, ûra aathanaga taûni ya Ndamasiki. 3 Amwîra “Ga kwîthîrwe na kîrîîkanîro gatîgatî gaakwa na woû, ta kîra kîarî oogo gatîgatî ka baaba na abaagu. Raitha, ingûgûtûmîra thaabu na fetha. Îîndî înyangia kîrîîkanîro gîaku na Baasa mûnene wa Isiraeri kaingo arekana naani.”
4 Mbeni-Andandi eetîganîîria na mûnene Asa na aatûma atongoria ba njûûrî yake kûrûa na Isiraeri. Baatura Iyoni, Ndani, Abeeri-Maimu, na taûni cionthe cia antû ba Nabutarî ira ciaigîîtwe into. 5 Rîra Baasa eegiirue ûgu, aatigana na kwiriga Rama na aatiganîria ngûgî yake. 6 Rîru mûnene Asa eeta antû ba Njunda bonthe, baakamata maiga ma gwaka kuuma Rama na mbaaû ira Baasa aatûmagîra. Aaka nabio Ngeba na Misipa.
7 Kagiitaani gaku kîroria Anani aathi kîrî Asa mûnene wa Njunda, amwîra: “N'ûntû weerîgîîre mûnene wa Aramu bantû akwîrîgîîra Mwathani Ngai waku, njûûrî ya mûnene wa Aramu îkuuma njaraani ciaku. 8 Anga antû ba kuuma Ethiopia na Rîbia bataarî njûûrî înene barî na nkaarî imbingî mûno cia ndûa na athiithia ba mbaraathi baingî? Îndî n'ûntû bwa bûra bwerîgîîre Mwathani, we naabanenkanîîre njaraani cienu. 9 N'ûntû meetho ma Mwathani imakûraitha nthîgûrû yonthe kaingo eekîra inya bara nkoro ciao ciîrutanîrîîtie kîrî Mwathani kûrû. N'ûrûthîîte ûntû bwa waa, kwoogu kuuma îîndî ûkeethagîrwa ûrî na ndûa.” 10 Asa aathûûra i kîroria gîku n'ûntû bwa kuuga ûgu; mwanka amwingîra nceera. Kagiitaani wa gaku, Asa aanjîîria kwinyîîria antû bamwe.
Kwayua na gûkua gwa Asa
(1Ane 15:23-24)
11 Ngûgî cia Asa wathaniini bwake, kuuma mwanjîîrio mwanka mûthia, ciandîkîîtwe îbukuuni rîa ngono cia anene ba Njunda na ba Isiraeri. 12 Mwankaani wa mîrongo îthatû na kenda wa wathani bwake, Asa aagwatwa i mûrimo wa mbayo. Kinya wegua mûrimo wake nwarî ûmûnene, kinya ndwariini yake ataaceria ûteethio kuuma kîrî Mwathani, îndî aaceriirie kuuma kîrî agao. 13 Rîru mwankaani wa mîrongo îna na ûmwe wa wathani bwake, Asa aakua na aanogoka amwe na biûyûûyû biao. 14 Bamûthika nthikooni îra eebînjîrîîte wengwa Taûni ya Ndaundi. Baamûmaamiirie ûrîrî bwakunîkîrîîtwe na tûnyamû twanunkaga bwega na mîthemba ya mîtaa îmîthie, na baabua mwanki ûmûnene mûno n'ûntû bwa kûmûtîîya.