17
1 Mwana wake Njeosafati aatuîka mûnene bantû aake na eebîkîra inya atigaaturwe n'Isiraeri. 2 Aiga acikaarî ba ndûa taûni ira ciarî mbirigîre na nthingo cionthe cia Njunda na aiga akaria nthîgûrû ya Njunda na taûni cionthe cia antû ba Eburaimu ira îthe Asa aatuunyanîîte. 3 Mwathani naarî amwe na Njeosafati n'ûntû ntugûûni ciake cia mbere aathiire na mîthiîre îra ûyûûe Ndaundi aathiiyaga n'yo. Ataagonga Mbaari 4 îndî aaceriirie Ngai wa ûyûûe na aathingata maathana maake bantû a kûthingata mîkarîre ya antû ba Isiraeri. 5 Mwathani aarûngîka ûnene bwake; na antû ba Njunda bonthe baaretera Njeosafati biewa. Kwoogu eethîrwa na ûtonga bwingî na gîtîîyo. 6 Nkoro yake nîerutanîrîîtie gûtûmîkîra Mwathani. Nkûrûki ya ûgu, aaruta gûntû gwa kûgongera ngai cia ûrongo na itugî bia Asera biauma Njunda.7 Mwankaani wa îthatû wa wathani bwake, Njeosafati aatûma atongoria baake Mbeni-Airi, Obandia, Sakaria, Nethaneri na Mikaya kûrutana watho bwa Mwathani taûni cia Njunda. 8 I kwarî na Arawi bana bara baarî nabo, tabo Semaya, Nethania, Sebandia, Asaeri, Semiramothi, Njeonathani, Andoniya, Tobija and Tobi-Andonija na mûthînjîri wa Ngai Erisama na Njeoramu. 9 Baarutana Njunda yonthe, baathûkia îbuku rîa watho bwa Mwathani; baathiûrûûka taûni cionthe cia Njunda na baarutana antû.
10 Gûkuthûka Mwathani kwaûyûra mooneneeni monthe ma nthî ira ciathiûrûkîrîîte Njunda, na bataarûa na Njeosafati. 11 Afirisiti bamwe baaretera Njeosafati biewa, na fetha îrî ûgooti, na Aarabu baareeta ntûrûme ngiri mûgwanja cia magana mûgwanja na nthenge ngiri mûgwanja na magana mûgwanja. 12 Njeosafati aagîta inya nkûrûki, aaka gûntû gwa kwîbitha na gûntû gwa kwaigwa into Njunda yonthe. 13 Naarî na into biingî taûni cia Njunda. Na kinya aiga ncamba cia ndûa cia acikaarî Njerusaremu. 14 Ûûgû i bu baagana kûringana na mîciî ya beethe,
kuuma Njunda, atongoria ba ikundi bia ngiri:
Andina mûtongoria, aarî na acikaarî ba ndûa ngiri magana mathatû;
15 n'we ûra aamûthingatîîte aarî mûtongoria wa ndûa Njeoanani na aathaga gîkundi gîa acikaarî ngiri magana maîrî na mîrongo înaana.
16 Ûyu ûngî aarî Amasia mwana wa Sikiri, ûra weerutire n'ûntû bwa ngûgî ya Mwathani, arî na gîkundi gîa acikaarî ngiri magana maîrî.
17 Kuuma mwîrîgaani wa Benjameni:
N'Erianda, ncamba ya ndûa, ûra aarî na acikaarî ngiri magana maîrî barî na nta na rong'o.
18 Ûyu ûngî aarî Njeosabandi arî na acikaarî ngiri îgana rîmwe na mîrongo înaana bara beebogeete into bia ndûa.
19 Baba i bo antû bara baatûmîkagîra mûnene, tûtagûtara bara aigire taûni ira ingî mbirigîre na nthingo Njunda yonthe.