Mikaya aaroria îgûrû rîa kûgwa kwa mûnene Aabu
(1Ane 22:1-28)
18
1 Îîndî Njeosafati eegua arî na ûtonga bwingî na aagîa îgweta. Baatuma ûnyaanya na Aabu gûkûrûkîîra kûbanga ngûrano ya nthaka yake na mwarî wa Aabu. 2 Nyuma ya mîanka îmîkai eendama kûriûngîra Aabu Samaria. Aabu amûthînjîra amwe na antû bara aarî nabo, ng'ondu imbingî na ng'ombe. Rîru Aabu amûûria bathi bagature Ramothi-Ngiriandi. 3 Aabu mûnene wa Isiraeri aûria Njeosafati mûnene wa Njunda ata rî, “Ûkaathi naani tûgature Ramothi-Ngiriandi?”Njeosafati amûcookeria amwîra, “Niû nwa ta woû, na antû baakwa nwa ta baaku; tûkaathi naawe ndûani.” 4 Îndî Njeosafati aacooka eera mûnene wa Isiraeri, “Mbere ûria Mwathani mataaro.”
5 Kwoogu mûnene wa Isiraeri aareeta iroria magana mana bantû amwe na abiûria, “Tûthi tûgature Ramothi-Ngiriandi, kana tûtîîre?”
Bamûcookia bamwîra, “Îthi, n'ûntû Ngai akamînenkanîra njaraani cia mûnene.”
6 Îndî Njeosafati aûria, “Gûtirî kîroria kîngî kîa Mwathani aaga kîra tûûmba kûûria?”
7 Mûnene wa Isiraeri aacookia Njeosafati, “I gûtigeere muntû ûmwe ûra tûûmba kûûria mantû kuuma kîrî Mwathani gûkûrûkîîra we, îndî ntimwendeete n'ûntû gûtirî ûntû andoragîria bwega, îndî rîonthe i bûûthûûku. Nwe i Mikaya mwana wa Imura.”
Njeosafati amûcookeria amwîra, “Mûnene atibatîîrue kuuga ûgu.”
8 Kwoogu mûnene wa Isiraeri eeta ûmwe wa aruti ngûgî baake amwîra, “Reete Mikaya mwana wa Imura nthûti.”
9 Kagiitaani gaku, Aabu mûnene wa Isiraeri na Njeosafati mûnene wa Njunda, beekîra nguo ciao cia ûnene, baakari itîîni bia ûnene rwaraani rwa kûbûûrîra akubî na mwîrîga wa Samaria. Iroria bia Aabu bionthe biaroragia agu mbere yao. 10 Ûmwe wao, Sendekia mwana wa Kenaana, aarûtha ngoci cia cuuma na auga, “Ûûgû i bu Mwathani akuuga: Ûgaatindîka Asîîria na ngoci ino mwanka bathire.” 11 Iroria bionthe biaroragia bûmwe bikiugaga, “Îthi Ramothi-Ngiriandi na ûgaacinda, n'ûntû Mwathani akamînenkanîra njaraani cia mûnene.”
12 Mûtûmwa ûra aarî akûthi gwîta Mikaya aaria n'we amwîra, “Raitha, iroria bira bingî bionthe birîroreria mûnene kûûmbana; ka mîgambo yaku îthiiyanie na yao ûmûrorerie kûûmbana.” 13 Îndî Mikaya amûcookeria amwîra, “Wa ta bûra Mwathani atûûraga mwoyo, nkaamwîra bûra Ngai wakwa akambîîra.”
14 Rîra Mikaya aakinyire, mûnene amûûria, “Mikaya, tûthi tûkarûe na Ramothi-Ngiriandi kana tûtîîre?”
Amûcookeria amwîra, “Îthi na ûkaûmbana n'ûntû bakeeyanwa njaraani ciaku.”
15 Mûnene amûûria, “I maita magana ngaakwîra waaragie mantû ma ûmma riîtwani rîa Mwathani?”
16 N'we Mikaya auga, “Ndaroonire antû ba Isiraeri bonthe banyagaarîrîîte irîmaani ta ng'ondu itarî na mûrîîthi, na Mwathani auga, ‘Antû baba batirî na mûtongoria. Tigaani wa kîra ûmwe athi mûciî na ûkiri.’ ”
17 Mûnene wa Isiraeri eera Njeosafati, “Ntikwîrire atindoragîria mantû meega, i maathûûku akî?”
18 Mikaya aathi na mbere kuuga, “Kwoogu thikîîria kiugo kîa Mwathani: I ndaroonire Mwathani akari gîtîîni gîake kîa ûnene na njûûrî ya îgûrû îrûngi rûteere rwake rwa ûrîo na rwa ûmotho. 19 Nwe Mwathani aûria, ‘N'ûû akeeneeria Aabu mûnene wa Isiraeri athi akarûe na Ramothi-Ngiriandi kaingo aûragîrwa noogo?’
“Ûmwe acookia ûû, ûra ûngî akauga ûûgû. 20 Mûthiani, kîrundu kîaya mbere, kîarûngama mbere ya Mwathani kîauga, ‘Nkamweneeria.’ Mwathani akîûria, ‘Ûkaamweneeria ata?’ 21 Nakîo kîamûcookia kîamwîra, ‘Nkaathi ntuîke kîroria kîa ûrongo tûnyuani twa iroria biake bionthe.’
“Mwathani akîîra, ‘Ûkaûmba kûmweneeria, îthi ûrûthe ûgu.’ 22 Kwoogu îîndî Mwathani n'eekîrîîte kîrundu kîa ûrongo tûnyuani twa iroria bibi biaku. Mwathani n'agweteete mpanga îgûrû rîaku.”
23 Rîru Sendekia mwana wa Kenaana aathi akubî na Mikaya amûringa rwî rwa ûthiû. Amûûria, “I njîra îrîkû Kîrundu wa Mwathani aayîîre agînkûrûka aaya kwaria naawe?”
24 Mikaya amûcookia amwîra, “Ûkaamenya mantû mama ntugû îra ûkaathûngîra kwîbitha kanyomba ka ndeeni.”
25 Rîru mûnene wa Isiraeri aathana auga, “Gwataani Mikaya bûmûcookie kîrî Amoni ngabana wa taûni îno na Njoasi mwana wa mûnene, 26 na buuge, ‘Mûnene ariuga bwingîre muntû ûyû nceera na bûtikaamûrûmie nwa mbi nwanga mûgaate na rûûyî mwanka rîra mûnene agacooka mayîîga.’ ”
27 Mikaya auga, “Wona wacooka mayîîga nkaamenya ti Mwathani warîîtie naani.” Acooka ongeera auga, “Gwataani mîgambo yakwa, biû bwinthe!”
Gûkua kwa Aabu
(1Ane 22:29-35)
28 Kwoogu mûnene wa Isiraeri na Njeosafati mûnene wa Njunda baathi kûrûa na Ramothi-Ngiriandi. 29 Mûnene wa Isiraeri eera Njeosafati, “Niû ntiîkîra nguo cia ûnene nkîthûngîra ndûani, îndî woû ûgeekîra nguo yaku ya ûnene.” Kwoogu mûnene wa Isiraeri aathi ndûani atarî na nguo ya ûnene kaingo atamenyekana.
30 Îîndî mûnene wa Aramu naarî akwatha atongoria baake ba nkaarî cia ndûa abeera, “Bûtikaarûe na muntû ûngî nwa ûrîkû, arî mûnene kana ûmûniini, tatiga mûnene wa Isiraeri wenka.” 31 Rîra atongoria ba nkaarî cia ndûa boonire Njeosafati, baathûgaania n'we mûnene wa Isiraeri. Kwoogu baûndûkania n'we kûmûtura, îndî Njeosafati auga mbu, na Mwathani amûteethia. Ngai abagarûra baarekana n'we. 32 Rîra atongoria ba nkaarî cia mbaraathi boonire ti mûnene wa Isiraeri, baatiga kwîngana n'we.
33 Îndî mûcikaarî ûmwe aathûûgîîria mûgwî wa ûgu aaratha mûnene wa Isiraeri gatîgatî ga ituro biake. Mûnene ûyu eera mûthiithia wake wa mbaraathi, “Garûka ûndute ndûani, nkûgurarua.” 34 Ndûa yaanenea ntugû înu yonthe. Mûnene Aabu eetiirîkanîîtie nkaarîîni yake ya ndûa araithîîte Asîîria mwanka ûgoro. Rîru riûa rîkîthwa aakua.