19
1 Rîra Njeosafati mûnene wa Njunda aacookire mayîîga nyomba yake ya ûnene Njerusaremu, 2 Njeû ûra kîroria, mwana wa Anani, aathi kûrîîkana nwe, amûûria, “I kî n'ûntû ûgûteethia antû baathûûku na ûgatuma ûcoore na bara bateendeete Mwathani? N'ûntû bwa ûgu, mûthûûro wa Mwathani ûrî îgûrû rîaku. 3 Amwe na ûgu, kûrî na mawega ndeeni yaku, n'ûntû n'wenyangiirie itugî bia ngai ya mûka Asera nthî îno na nkoro yaku nîceragia Ngai.”Njeosafati aathuura agambi
4 Mûnene Njeosafati aatûûra Njerusaremu na aumagarûka kaîrî aathi gûkomana na antû bara aathaga ba kuuma Beeriseba mwanka irîmaani bia Eburaimu, abacookanîîria kîrî Mwathani, Ngai wa biûyûûyû biao. 5 Aathuura agambi nthîgûrû îra aathanaga yonthe, taûni ira ciarî mbirigîre cionthe cia Njunda, na wa îra taûni. 6 Rîru eera agambi babu, “Bûmenyeere bûra bûkûrûtha, n'ûntû bûtikûgiita magamba n'ûntû bwa antû îndî n'ûntû bwa Mwathani, n'ûntû arî amwe naabi bûkîgiita magamba. 7 Îîndî bwîgue bûrî na gûkuthûka Mwathani. Bûgiite magamba bwega, n'ûntû kîrî Mwathani Ngai wetû gûtirî kûgiitanîra magamba bûra kûbatîîrue kana kîmenyano kana ngukumo.”
8 Kinya Njerusaremu, Njeosafati n'aathuurire bamwe ba Arawi na athînjîri ba Ngai na atongoria bamwe ba mîîrîga ya Isiraeri ba kûrutagîra Mwathani ngûgî ya kûgiitaga magamba na kûthiragia matheta. Nabo baakaraga Njerusaremu. 9 Na abaa mataaro mama. “Nwa mwanka bûtûmîke na bûgîîtîgîkaga na nkoro yonthe bûgîkuthûkaga Mwathani. 10 Îgamba rîonthe rîra rîkaaya kîrî biû kuuma kîrî antû ba nthîgûrû yenu bara batwîre taûni inu, wîgue i rîa gwîtûûra nthakame kana mantû mangî meegiî watho kana maathana, ûbatîîrue ûbakaania batikeeyîrie Mwathani. Wegua t'ûûgu mûthûûro wake ûkabûûyîîra amwe na antû beenu. Bwarûtha ûgu, bûtiîyia. 11 Amaria, mûthînjîri ûra mûnene wa Ngai akeegua arî mûtongoria wenu ûntûûni bunthe bwîgiî Mwathani, na Sebandia mwana wa Isumairi, mûtongoria wa mwîrîga wa Njunda, akeegua arî mûtongoria wenu ûntûûni bunthe bwîgiî mûnene, na Arawi bagaatûmîka ta arûngamîri mbere yenu. Rutaani ngûgî na inya, na Mwathani aroethîrwa arî amwe na bara bakaarûtha bwega.”