Îromba rîa Njeosafati
20
1 Nyuma ya ûûgû, Amoabu na Aamoni barî amwe na Ameuni baaya kûrûa na Njeosafati. 2 Antû bamwe baaya beera Njeosafati, “Njûûrî înene n'îîyîîte gûkwithûkîra yuumîîte Endomu, kuuma rûgongo rûra rûngî rwa îria, na îîndî barî Asasoni Tamari.” (T'yo Eni-Gendi). 3 Rîru Njeosafati aaguaya mûno, na eebanga kûromba Mwathani, na augîîria gûtîîrîra kûrîa biakûrîa nthîgûrû ya Njunda yonthe. 4 Antû ba Njunda beethîrana amwe gûcwa ûteethio kuuma kîrî Mwathani, kuuma taûni cionthe cia Njunda baaya gûcwa Mwathani.5 Rîru Njeosafati arûngama kîûthûranooni gîa antû ba Njunda na ba Njerusaremu kîaragooni kîaimbia kîa Nyomba ya Mwathani, 6 na auga,
“Îî Mwathani, Ngai wa ba baaba, ti woû Ngai ûra arî îgûrû? Mathaga moonene monthe ma mîgongo. Inya na ûûmbani birî njaraani ciaku, na gûtirî we aûmba kûrûngama kîînyume naawe. 7 Woû Ngai wetû, ûteengatiirie bara baatwîre nthîgûrû îno mbere ya antû baaku Isiraeri na wamînenkanîra tene na tene kîrî nciarwa inu cia Îburaîmu mûcoore waku? 8 Batwîre ku na bagwakîra bantû akûgongagîrwa, na bauga, 9 ‘Ûthûûku bûkaaya gûtûûyîîra, ndûa, mîrimo, kana yûûra, tûkarûgama mbere yaku aaga mbere ya nyomba îno riîtwa rîaku rîkumagîrua na tûgakûrîrîra tûrî thîînaani cietû na ûgatwîgua ûtwonokie.’
10 Na îîndî raitha, antû ba Amoni, na ba Moabu na ba kîrîma gîa Seiri, bara ûtaareka Isiraeri baithûkîra nthî yao rîra baumîîte Miisiri, kwoogu ka baûndûkire na bataabathiria, 11 îîndî barîtûrea na kûûya gûtwîngatia kuuma gûntû kûra watwere rûrî rûgai rwetû. 12 Îî Ngai wetû, ûtibagambithia ma? N'ûntû tûtirî na inya ya kûrûa na njûûrî îno nene îtuithûkîrîîte, tûtiiyî n'aata tûkaarûtha, îndî i woû tûraithîîte îgûrû.”
13 Antû arûme bonthe ba Njunda, barî na eekûrû baao na aana baao na tûgenke, baarûngama agu mbere ya Mwathani. 14 Kîrundu wa Mwathani aayîîra Njaasieri mwana wa Sakaria, ûra aarî mwana wa Benaya, wa Njeyeri, mwana wa Matania, Mûrawi wa nciarwa cia Asabu, arûngi kîrîndîîni.
15 Auga, “Thikîîria, mûnene Njeosafati na bonthe bara batwîre Njunda na Njerusaremu. Mwathani arîbwîra ûûgû, ‘Bûtikaamake kana bûkua nkoro n'ûntû bwa njûûrî îno nene ûû, n'ûntû ndûa t'yenu, îndî n'ya Ngai. 16 Rûû bwîndame bûkarûe nabo. Bagaatwa bataambîîte na kîrîma gîa Sisi, na bûkaboona mûthiani wa kîbonde, rwanda rwa Njerueri. 17 Bûtiirûa ndûa îno. Bûthûkie twanya twenu, bûrûngame ki, na bûkoona bûra Mwathani akabûûmbanîra, biû Njunda na Njerusaremu. Bûtikaamake, na bûtigaakue nkoro, rûû buumagarûke bûkarûe nabo, na Mwathani akeegua arî amwe naabi.’ ” 18 Njeosafati eenîka kîongo na aatiirithia ûthiû bwake nthîgûrû, na antû bonthe ba Njunda na Njerusaremu beegwîthia nthî mbere ya Mwathani bamûgonga. 19 Rîru Arawi bamwe ba kuuma mîîrîgaani ya Koathi na Kora baarûngama na baakumia Mwathani, Ngai wa Isiraeri na tûyû tûûraaya.
20 Baûkîîra rûûni karûkîîrî baathi bwa rwanda rwa Tekoa. Bakuumagarûka, Njeosafati aarûngama abeera, “Nthikîîriani, antû ba Njunda na ba Njerusaremu! Îtîgiani Mwathani Ngai wenu na bûgaakara bwega, îtîgiani iroria biake na bûkaûmbana.” 21 Aarîîkia kwaranîria na antû, Njeosafati aataara antû ba kûthi barî mbere ya njûûrî bakiinaga na gûkumia Mwathani n'ûntû bwa wega bwa ûtheru bwake. Bainaga ûûgu,
“Cookeriani Mwathani nkaatho,
n'ûntû wendo bwake i bwa gûtûûra tene na tene.”
22 Bakwanjîîria kwina na gûkumia, Mwathani aarigicania antû ba Amoni na Moabu na ba kîrîma gîa Seiri bara baithûkîrîîte Njunda, na baaturwa. 23 Antû ba Amoni na ba Moabu baûkanîîra na antû ba kuuma kîrîmaani gîa Seiri na baûragana bongwa.
24 Rîra antû ba Njunda baakinyire bantû aûkîîru akûraitha gûntû kûûraaya naagu rwanda, na baaraithîîria njûûrî înene ya anthû, kîra boonire i biimba biao bimaami nthîgûrû na gûtirî nwa ûmwe aamonyia. 25 Rîra Njeosafati na antû baake baathiire gûtaa into biao, beethîra into biingî ta nyamû cia ndîîthia imbingî, into bia mîthemba na mîthemba, nguo na into biingî bia goro, nkûrûki ya bûra bakîûmba gûkamata. I kwarî na into biingî bia gûtaa kûra kwathûkiirie ntugû ithatû kûbiîthîrania. 26 Ntugûûni ya inya beethîrana kîbondeeni kîa Beraka, ara baakumîîrie Mwathani. Gîkî i kîo gîtûmi gîîtagwa Kîbonde kîa Beraka kinya îmunthî.
27 Rîru antû ba Njunda na ba Njerusaremu baacooka Njerusaremu bakeneete batongorereetue i Njeosafati, n'ûntû Mwathani n'aatûmîîte bathekeera anthû baao. 28 Baathûngîra Njerusaremu baathi Nyomba ya Ngai bakîringaga wandîndî cia ndigi inyingî na tûrumbeta.
29 Moonene monthe ma nthîgûrû inu maakuthûka Ngai rîra meegiirue bûra Mwathani aarwîte na anthû ba Isiraeri. 30 Na wathani bwa Njeosafati bwegua bûrî na ûkiri, n'ûntû Ngai namwete ûkiri nteere cionthe.
Mûthia wa wathani bwa Njeosafati
(1Ane 22:41-50)
31 Kwoogu Njeosafati aathana Njunda. Aarî na ûkûrû bwa mîanka mîrongo îthatû na îtaano agîtuîka mûnene wa Njunda, na aathana arî Njerusaremu mîanka mîrongo îîrî na îtaano. Gina eetagwa Asuba mwarî wa Sirii. 32 Aathingatire mîtugo ya îthe Asa na ataamîtiga, aarûtha bûra kûbatîîrue mbere ya Mwathani. 33 Îndî ateenyangia gûntû kûra gûûkîîru wa kûgongagîrwa ngai cia mîbuanaano, na antû bateerekereetie nkoro ciao kîrî Ngai wa beethe.
34 Ngûgî ira ingî cia Njeosafati, kuuma mwanjîîrio mwanka mûthia, ciandîkîîtwe mîririkanaani ya Njeû mwana wa Anani, îra îrî îbukuuni rîa ngono cia anene ba Isiraeri.
35 Nyumaani, Njeosafati mûnene wa Njunda baatuma ndûgû na Aasia mûnene wa Isiraeri, ûra aarî muntû ûmûthûûku. 36 Eetîganîîria n'we gwaka meeri cia biacaara cia kûthi Tarisisi, ira ciakîîrwe Esioni-Ngeberi, 37 Erieseri mwana wa Ndondabau wa Maresa aaroreria Njeosafati, amwîra, “N'ûntû ûgûtuma ndûgû na Aasia, Mwathani akeenyangia kîra bûrûthîîte.” Na meeri inu ciombokana na itaûmba kûthi Tarisisi.