21
1 Rîru Njeosafati aakua aathikwa amwe na beethe Taûni ya Ndaundi. Na mwana wake Njeoramu aathûkia kaanya gaake arî mûnene. 2 Aruagina ba Njeoramu, tabo nthaka cia Njeosafati, baarî Asaria, Njeiyeri, Sakaria, Asariau, Mikaeri na Sefatia. Ino cionthe ciarî nthaka cia Njeosafati mûnene wa Isiraeri. 3 Îthe n'aabaete biewa biingî bia thaabu na fetha bia goro, amwe na taûni ira ciarî mbirigîre na nthingo Njunda, îndî ûnene aapeete Njeoramu n'ûntû n'we aarî kîîmbere gîake.Njeoramu mûnene wa Njunda
(2Ane 8:17-24)
4 Rîra Njeoramu eerikîîrie ûneneeni bwa îthe, aûraga aruagina bonthe amwe na anene bamwe ba Isiraeri. 5 Njeoramu aarî na ûkûrû bwa mîanka mîrongo îthatû na îîrî agîtuîka mûnene, na aathanire arî Njerusaremu mîanka înaana. 6 Aathingatire mîtugo îmîthûûku ya anene ba Isiraeri, wa bûra mûciî wa Aabu waarûthire, n'ûntû aagûrîîte mwarî wa Aabu. Aarûtha ûthûûku meethooni ma Mwathani. 7 Amwe na ûgu Mwathani ataathiria mûciî wa Ndaundi, n'ûntû bwa kîrîîkanîro kîra aarîîkanîrîîte n'we, na neeranîîte n'we akamwaa ûnene amwe na nciarwa ciake tene na tene.
8 Kagiitaani ka Njeoramu, antû ba Endomu i baareganire na ûnene bwa Njunda rîru baathuura mûnene wao. 9 Kwoogu Njeoramu aathi noogo na atongoria ba njûûrî na nkaarî ciake cionthe cia Ndûa. Na ûtugû aathi aithûkîra Aendomu bara baamûthiûrûkîîrîîte. 10 Kwoogu antû ba Endomu batûûraga bareganîîte na Njunda mwanka îmunthî tûrî.
Kagiitaani wa gaku, taûni ya Ribuna kinya yoo nîareganire na wathani bwa Njeoramu, n'ûntû naatiganîrîîtie Mwathani, Ngai wa beethe. 11 Nkûrûki ya ûgu, n'aakîîte kinya gûntû kûra gûûkîîru wa kûgongerwa ngai cia mîbuanaano irîmaani bia Njunda na aatûma antû ba Njerusaremu batuîka t'etîgua kîrî Mwathani na aabîtithia antû ba Njunda njîra.
12 Njeoramu aagwata baarûa kuuma kîrî kîroria Eriya, îkiugaga, “Mwathani Ngai wa abaagu Ndaundi ariuga ûûgû, ‘Ûtithiîte na mîtugo ya abaagu Njeosafati kana ya Asa mûnene wa Njunda. 13 Îndî ûgwete mîtugo îmîthûûku ya anene ba Isiraeri, na watongoria antû ba Njunda na ba Njerusaremu mantûûni ma gûtuîka t'eetîgua kîrî Mwathani wa ta bûra mûciî wa Aabu waarûthire. Waûraga kinya aruanyûkwe, aana ba mûciî wa abaagu, bara baarî beega kîrî woû. 14 Kwoogu îîndî Mwathani arî akubî kûringa antû baaku, nthaka ciaku, eekûrû baaku na kîonthe kîra kîrî gîaku na îringa rîînene. 15 Woû wengwa ûkaayua ndwari înene mûno ya mara mwanka maume ome ntugû inyingî.’ ”
16 Mwathani aatûma Afirisiti na Aarabu bara baatwîre akubî na Akusi barûa na Njeoramu. 17 Baithûkîra Njunda, baathûngîra na baakamata into bionthe bira boonire nyomba ya mûnene, amwe na nthaka ciake na eekûrû baake. Gûtirî nthaka nwa îmwe aatigîrwa tatiga Aasia, ûra aarî mûniini.
18 Nyuma ya mama monthe, Mwathani aaringa Njeoramu na mûrimo wa mara ûtoora. 19 Gwa kagiita kathiîte, mîanka îîrî îkîthira, mara maake mauma ome n'ûntû bwa mûrimo ûyu, na aakua na ûrûrû bûûnene. Antû baake bataabua mwanki wa kûmûtîîya, ta bûra baabuagîra beethe.
20 Njeoramu aarî na ûkûrû bwa mîanka mîrongo îthatû na îîrî agîtuîka mûnene, na aathana arî Njerusaremu mîanka înaana. Gûtirî we aamwîgîîrua kîao agûkua. Aathikirwe Taûni ya Ndaundi, îndî ti nthikooni cia anene.