Aasia mûnene wa Njunda
(2Ane 8:25-29; 9:21-28)
22
1 Antû ba Njerusaremu baatuîkithia Aasia, nthaka îra niini ya Njeoramu, mûnene bantû aake, n'ûntû gîkundi kîa njûûrî kîra kîayaniirie na Aarabu kambîîni, ibaarî kûûraga nthaka ira nkûrû cionthe. Kwoogu Aasia mwana wa Njeoramu mûnene wa Njunda aanjîîria kwathana. 2 Aasia aarî na ûkûrû bwa mîanka mîrongo îîrî na îîrî agîtuîka mûnene, na aathanire arî Njerusaremu mwanka ûmwe. Gina eetagwa Atharia, wa mwana wa Omuri. 3 Kinya we aathiingatire mîthiîre îmîthûûku ya mûciî wa Aabu, n'ûntû gina n'we aamûrutanaga kûrûtha moothûûku. 4 Aarûtha ûthûûku meethooni ma Mwathani, ta bûra mûciî wa Aabu warûthîîte, n'ûntû îthe wa Aasia agûkua i bo baatuîkire ataari baake, na i bo baatûmire agwa cwe. 5 Kinya aathingata mataaro maao aathiiyania na Njoramu mwana wa Aabu mûnene wa Isiraeri kûrûa na Acaeri mûnene wa Aramu Ramothi-Ngiriandi. Asîîria baaguraria Njoramu, 6 kwoogu aacooka Njesireeri kworia ironda bira aagurarîîrue ndûani Rama bakîrûa na mûnene Acaeri. Rîru Aasia mwana wa Njeoramu eendama Njesireeri kwona Njoramu mwana wa Aabu n'ûntû n'aagurarîîtue.7 Gûkûrûkîîra ndiûnga ya Aasia kîrî Njoramu, Ngai areeta kûthira kwa Aasia. Rîra Aasia aakinyire, baumagarûka na Njoramu gûkomana na Njeû mwana wa Nimusi, ûra Mwathani aatûûrîrîîtie maguta athiria mûciî wa Aabu. 8 Njeû wa akîthiragia mûciî wa Aabu, eethîra atongoria ba Njunda na nthaka cia aruagina ba Aasia, bara baatûmîkagîra mûnene, na abaûraga. 9 Rîru aaceria Aasia, na antû baake bamûgwatîra Samaria, naara eebithîîte. Bamûreeta kîrî Njeû na bamûûraga. Bamûthika n'ûntû baugire, “Nwa rûrîîyo rwa Njeosafati ûra aaceragia Mwathani na nkoro yake yonthe.” Gûtaarî nwa ûmwe watigarîîte mûciî wa Aasia akîûmba kwathana.
10 Rîra Atharia gina wa Aasia oonire atî mwana wake agûkua, n'aathiriirie rûciaro runthe rwa ûnene rwa mûciî wa Njunda. 11 Îndî Njeoseba mwarî wa mûnene Njeoramu aathûkia Njoasi mwana wa Aasi amwonokia kuuma gatîgatî ka aana ba mûnene bara baarî akubî kûûragwa, amwaiga amwe na mûmenyeeri wake nyomba ya kûraara. N'ûntû Njeosabathi, mwarî wa mûnene Njeoramu, mwekûrû wa Njeoyanda mûthînjîri wa Ngai, aarî mwaragina wa Aasia, aitha mwana Atharia atikaamwone aaya kûmûûraga. 12 Njoasi aakarire nabo arî mwithe Nyomba ya Ngai gwa kagiita ka mîanka îthanthatû Atharia akîathaga nthîgûrû înu.