Njoasi aatuîka mûnene
(2Ane 11:4-16)
23
1 Mwankaani wa mûgwanja Njeoyanda eegua arî na inya na aarûtha kîrîîkanîro na atongoria ba njûûrî ya ikundi bia îgana, tabo Asaria mwana wa Njeroamu, Isumairi mwana wa Njeoanani, Asaria mwana wa Obendi, Maaseya mwana wa Andaya, na Erisafati mwana wa Sikiri. 2 Baathiûrûûka Njunda yonthe na beethîrania Arawi na atongoria ba mîîrîga ya Isiraeri kuuma taûni cionthe. Rîra baayire Njerusaremu, 3 kîrîndî kîonthe kîaiga kîrîîkanîro na mûnene Njoasi barî Nyomba ya Ngai. Rîru Njeoyanda abeera, “Mwana wa mûnene akaathana, wa ta bûra Mwathani eeranîîre îgûrû rîa nciarwa cia Ndaundi. 4 Îîndî ûûgû i bu bûkaarûtha, gîcuncî kîmwe kîa bithatû kîa biû athînjîri na Arawi bara bakeegua barî ngûgîîni ntugû ya Sabatû bagaakaria mîîrîga ya Nyomba ya Ngai, 5 na gîcuncî kîngî kîa ithatû gîkarie nyomba ya mûnene na bara bangî bonthe beegue barî kîaragooni kîa Nyomba ya Mwathani. 6 Gûtikaagîte nwa ûmwe akaathûngîra Nyomba ya Mwathani tatiga athînjîri na Arawi bara barî ngûgîîni. Bo nwa bathûngîre, n'ûntû i baatheru, îndî antû bara bangî bonthe bamenyeere bûra Mwathani aathanîîte. 7 Arawi bonthe bathiûrûûkîîre mûnene, na woora ûmwe waciao agwete mathaga ma ndûa. Ûra akaathûngîra Nyomba ya Ngai n'akaûragwa. Bûkare bûrî akubî na mûnene wa ara akaathi.”8 Arawi na antû bonthe ba Njunda baarûtha wa bûra Njeoyanda ûra mûthînjîri wa Ngai aathanire. Woora mûtongoria aathûkia antû baake, bara baayaga ngûgîîni ntugû ya Sabatû na bara baumaga ngûgîîni, n'ûntû Njeoyanda ûra mûthînjîri wa Ngai ataarekeeretie nwa ûmwe athi mûciî nyuma ya kûrîîkia ngûgî. 9 Rîru aneenkera atongoria ba ikundi bia antû îgana matumo na ngao inene na i niini ira ciarî cia mûnene Ndaundi ira ciarî Nyomba ya Ngai. 10 Aabanga antû bonthe, wa muntû arî na îtumo rîake njaraani, bathiûrûkîîrîîte mûnene. Baabangîîtwe kuuma rûteere rwa iti kûthi rûteere rwa neegûrû rwa Nyomba ya Ngai kûthiûrûkîîra kîthînjîro.
11 Njeoyanda na nthaka ciake baareeta nthaka ya mûnene na bamwîkîra nthûmbî ya ûnene, bamûnenkera kîrîîkanîro kîra kîandîkirwe, na bamûtuîkithia mûnene. Bamwîtûûrîria maguta baugîîria bauga, “Ûrootûûra mûnene!”
12 Rîra mûnene wa mûka Atharia eegiirue gîtuma gîa antû baugîîtie bagîkenagîîra mûnene, aathî kîrî bo gûku Nyomba ya Mwathani. 13 Aaraitha, oona mûnene arûngi akubî na gîtugî gîake mwîrangooni. Atongoria na aringi ba tûrumbeta barî rûteere rwa mûnene, na antû bonthe ba nthîgûrû baakenagîîra bakîringaga tûrumbeta, na aini barî na into bia kwina batongoreetie nyîmbo cia gûkumithia. Atharia akwona ûgu ateembûranga nguo ciake na auga mbu akiugaga, “Gûkunyanîrwa! Gûkunyanîrwa!”
14 Rîru Njeoyanda mûthînjîri wa Ngai aumagarûkia atongoria ba njûûrî ya ikundi îgana, abeera, “Mûruteeni gatîgatî ga acikaarî na muntû nwa ûrîkû ûra akaamûthingata bûmûûrage.” N'ûntû mûthînjîri wa Ngai n'abeerîîte, “Bûtikaamûûragîre Nyomba ya Mwathani.” 15 Kwoogu bamûgwata warîra agîkinya mwîrîgaani wa mbaraathi akubî na nyomba ya mûnene, bamûûragîra oogo.
16 Njeoyanda aarûtha kîrîîkanîro gatîgatî gaake na antû bonthe na mûnene atî bakeegua barî antû ba Mwathani. 17 Rîru antû bonthe baathi nyomba ya kûgongera Mbaari, bamîomborania, beenyangia ithînjîro na mîbuanaano yaayo tûcuncî tûcuncî, na baûragîra Matani ûra aarî mûthînjîri wa Mbaari mbere ya ithînjîro.
18 Rîru Njeoyanda aneenkanîra ûkaria bwa Nyomba ya Mwathani kîrî athînjîri ba Ngai, bara baarî Arawi, bara Ndaundi apeete ngûgî Nyomba ya Ngai ya kûrutîra Mwathani igongwana bia kûbîîthua ta bûra kwandîkîîtwe wathooni bwa Musa, na kwina na nkena, bûra Ndaundi aathanîîte. 19 Aiga akaria mîîrîgaani ya Nyomba ya Mwathani kaingo gûtakîgîta nwa ûmwe akaathûngîra arî na mûgiro wa mûthemba nwa ûrîkû.
20 Nyuma ya ûgu, aathûkia atongoria ba njûûrî ya magana, antû ba gîtîîyo, aathani na antû bonthe ba nthîgûrû înu, bonthe amwe baareeta mûnene kuuma Nyomba ya Mwathani. Bauma Nyomba ya Ngai na mwîrîga wa neegûrû, baathûngîra nyomba ya ûnene na bamûkarithia gîtîîni kîa ûnene. 21 Kwoogu antû bonthe ba nthîgûrû înu baakeneera. Taûni yaakiri ki n'ûntû Atharia n'aarî akûûragwa.