Njoasi aacookeeria Nyomba ya Ngai
(2Ane 12:1-16)
24
1 Njoasi aarî na ûkûrû bwa mîanka mûgwanja rîra aatuîkire mûnene, na aathana mîanka mîrongo îna arî Njerusaremu. Gina eetagwa Sibia, wa kuuma Beeriseba. 2 Njoasi aarûthire bûra kûbatîîrue mbere ya Mwathani mîankaani yonthe îra Njeoyanda aarî mûthînjîri wa Ngai. 3 Njeoyanda aathuurîra Njoasi eekûrû baîrî, na aagîa na nthaka na aarî.4 Kagiita kamwe Nyumaani, Njoasi aabaanga gûcookeeria Nyomba ya Mwathani. 5 Eeta athînjîri ba Ngai amwe na Arawi abeera, “Îthiini taûni cia Njunda bwîthîranie mbia kuuma kîrî Aisiraeri bonthe cia gûcookeeria Nyomba ya Ngai wenu cia wa mwanka wa mwanka, na bûrûthe ûntû bûbu na mpwî.” Îndî Arawi bataarûtha bu na mpwî. 6 Kwoogu mûnene eeta Njeoyanda mûthînjîri ûra mûnene wa Ngai amûûria, “I kî n'ûntû ûtiraûria Arawi bareeta ûgooti kuuma Njunda na Njerusaremu bûra beerirwe i Musa mûruti ngûgî wa Mwathani na kîrîndî gîa Isiraeri n'ûntû bwa Îrema rîa Kîrîîkanîro?”
7 Îîndî nthaka cia mûka ûra mûthûûku Atharia ibaarî bakwomora baathûngîra Nyomba ya Ngai na baatûmîra into bira biathûrîrîîtwe Ngai kûgonga Mbaari.
8 Kûringana na watho bwa mûnene, îthandûkû rîarûthwa, na rîaigwa ome ya mwîrîga wa Nyomba ya Mwathani, 9 na kwaugîîrua Njunda na Njerusaremu atî i babatîîrue kûreeta kîrî Mwathani ûgooti bûra Musa mûruti ngûgî wa Ngai eekîîre Aisiraeri barî rwanda. 10 Atongoria bonthe na antû bonthe baakena na baareeta ûgooti bwao boorokeria îthandûkûûni mwanka rîaûyûra. 11 Na rîonthe rîra îthandûkû rîru rîa mbia rîaûyûraga, rîareetagwa kîrî aruti ngûgî ba mûnene n'Arawi. Mwandîki wa mûnene na mûtongoria wa mûthînjîri wa Ngai ûra mûnene bakoonoria bakarîcookia bantû ara rîakaraga. Baarûthaga ûgu wa kîra ntugû, na beethîrania mbia inyingî mûno. 12 Mûnene na Njeoyanda bagacinenkanîra kîrî antû bara baarutaga ngûgî Nyomba ya Mwathani, na baandîka abundi ba gwaka na maiga na bagûtuma na mbaaû na kinya abundi ba cuuma na rûthuku ba gûcookeeria Nyomba ya Mwathani.
13 Mabundi maaruta ngûgî nainya, na ngûgî ya gûcookeeria yaathi na mbere. Baaka Nyomba ya Ngai kaîrî wa bûra yaakari na bamîrûngîka. 14 Rîra baarîîkiirie, baareeta mbia ira ingî ciatigarire kîrî mûnene na Njeoyanda, na baatuma into bia Nyomba ya Mwathani nacio. Into bia gûtûmîka kûgonga na bia igongwana bia kûbîîthua, na kinya mbakûri cia macoco na into bira bingî bia thaabu na fetha. Na baarutaga igongwana bia kûbîîthua Nyomba ya Mwathani ntugû cionthe kagiitaani ka Njeoyanda.
15 Îndî Njeoyanda aakûra, na aakua arî na ûkûrû bwa mîanka îgana na mîrongo îthatû. 16 Aathikwa nthikooni cia anene Taûni ya Ndaundi, n'ûntû bwa mawega mara aarûthîrîîte Isiraeri na Ngai na Nyomba ya Ngai.
17 Nyuma ya gûkua kwa Njeoyanda, atongoria ba Njunda baaya beenyiia kîrî mûnene Njoasi, baatûma abathikîîria. 18 Baatiganîria Nyomba ya Mwathani, Ngai wa beethe, baagonga itugî bia Asera na ngai cia mîbuanaano. N'ûntû bwa ûthûûku bûbû, mûthûûro wa Ngai wayîîra antû ba Njunda na Njerusaremu. 19 Wana wegua Mwathani naatûmire iroria kîrî antû babu babacookia kîrî we, na wegua ibaabaroreerie, bataathikîîria.
20 Rîru Kîrundu wa Ngai aayîîra Sakaria mwana wa Njeoyanda mûthînjîri wa Ngai. Aarûngama mbere ya antû abeera, “Mwathani arîûria ûûgû, ‘I kî n'ûntû bûtakwathîkîra maathana maakwa? Bûtiikara bwega, n'ûntû ibûûntiganîrîîtie, naani nkabûtiganîria.’ ”
21 Îndî bamûbîndîra njûri, na kuumania na watho bwa mûnene Njoasi bamûûragîra ome ya Nyomba ya Mwathani na maiga. 22 Mûnene Njoasi ataaririkana wega bûra Njeoyanda îthe wa Sakaria oonanîîtie kîrî we îndî i ka aûragire mwana wake. Na Sakaria agîkua augire, “Mwathani aroona ûûgû na akarîithia.”
23 Mûthiani wa mwanka, njûûrî ya Asîîria yaithûkîra Njoasi. Baakinya Njunda na Njerusaremu na baûraga atongoria bonthe ba antû, na bairîra mûnene wa Ndamasiki bionthe bira baataîte. 24 Wana wegua njûûrî ya Aaramu yayîîte na antû baakai, Mwathani naatûmire bacinda njûûrî înene n'ûntû Isiraeri i baatiganîrîîtie Mwathani, Ngai wa beethe. Kwoogu mûnene Njoasi aakaanûkua na njîra înu. 25 Asîîria bakîthi, baatigire bakûguraria Njoasi mûno. Atongoria baake wengwa bamûbîndîra njûri n'ûntû bwa gûtûûra nthakame ya mwana wa Njeoyanda mûthînjîri wa Ngai, bamûûragîra ûrîrî bwake. Kwoogu aathikwa Taûni ya Ndaundi, îndî bataamûthika nthikooni cia anene. 26 Bara baamûbîndîîre njûri baarî Sabandi mwana wa Simeathi mwekûrû Mûamoni, na Njeosabandi, mwana wa Simurithi mwekûrû Mûmoabu. 27 Mantû ma nthaka ciake, moororia maingî îgûrû rîake, na mantû ma gûcookeerua kwa Nyomba ya Ngai maandîkîîtwe îbukuuni rîa ngono cia anene. Na Amasia mwana wake aatuîka mûnene bantû aake.