Amasia mûnene wa Njunda
(2Ane 14:2-20)
25
1 Amasia aanjîîrie kwathana arî na ûkûrû bwa mîanka mîrongo îîrî na îtaano na aathana arî Njerusaremu mîanka mîrongo îîrî na kenda. Gina eetagwa Njeoandini wa kuuma Njerusaremu. 2 Amasia aarûtha bûra kûbatîîrue mbere ya Mwathani, îndî ti na nkoro yonthe. 3 Akûgîta inya ûneneeni, aûraga atongoria bara baûragire îthe ûra aarî mûnene. 4 Îndî ataûraga nthaka ciao, kûringana na bûra kwandîkîîtwe îbukuuni rîa watho bwa Musa, ara Mwathani aathanire auga, “Aciari batiûragwa n'ûntû bwa aana baao, kana aana baûragwa n'ûntû bwa beethe; wa muntû agaakua n'ûntû bwa meeyia maake wengwa.”5 Amasia eethîrania antû ba Njunda amwe ababaanga kûringana na mîîrîga ya beethe barî ruungu rwa atongoria ba njûûrî ya magiri na ba magana, bakuuma Njunda yonthe na Benjameni. Rîru aatara bara baarî na ûkûrû bwa mîanka mîrongo îîrî gwîtia na oona antû ngiri magana mathatû ncamba bara bakîûmba kûrûa bagîtûmagîra îtumo na rong'o. 6 Kinya aakombora antû ngiri îgana ba ndûa kuuma Isiraeri aarea kiro magana mana cia fetha. 7 Îndî mûruti ngûgî wa Ngai aaya kîrî we amwîra, “Îî mûnene, ûtikaathi na njûûrî ya Isiraeri, n'ûntû Mwathani atirî na Isiraeri na antû bonthe ba Eburaimu. 8 Wana wathi warûa na ûcamba ndûani, Ngai agakûgwîthia mbere ya anthû, n'ûntû Ngai arî na inya ya gûteethia na kûgwîthia.”
9 Amasia aûria mûruti ngûgî wa Ngai, “Îîndî n'ata tûkaarûtha îgûrû rîa kiro magana mana cia fetha ira ndaarîire n'ûntû bwa njûûrî ino cia Isiraeri?” 10 Kwoogu Amasia aarekeeria njûûrî inu ciaumîîte Eburaimu abeera beenûke mîciî. I baathûûrire n'antû ba Njunda na baathi mîciî bathûûri mûno. 11 Amasia eebîkîra wîru na atongoreeria njûûrî yake baathi kîbondeeni kîra gîetagwa kîa mwonyo, ara aûragîîre antû ngiri îkûmi ba kuuma Seiri.
12 Njûûrî ya Njunda kinya yoo yaagwata antû ngiri îkûmi barî mwoyo, babeetithia îgûrû rîa rwara rwa iiga kathûmbîri babaarûkia mparaani bonthe baatuîkaanga tûcuncî tûcuncî.
13 Kagiitaani gaku njûûrî îra Amasia aacookiirie, aarega kûthi n'yo ndûani, yaithûkîra taûni cia Njunda, kuuma Samaria mwanka Bethi-Oroni, na baûraga antû ngiri ithatû ku, na baataa into biingî.
14 Rîra Amasia aacookire aumîîte kûûraga Aendomu, aacooka na ngai cia antû ba Seiri. Acirûngîka irî ngai ciake, na acigonga na acirutîra igongwana bia kûbîîthua. 15 Mûthûûro wa Mwathani gwakana îgûrû rîa Amasia, na aatûma kîroria kîrî we, ûra aamûûriirie, “I kî n'ûntû ûkûûria mantû kuuma kîrî ngai cia antû baba, ira itakîûmba kwonokia antû baao kuuma njaraani ciaku?”
16 Akîaragia woogu mûnene amûûria, “Ga tûkûthuurîîte ûtuîka mûtaari wa mûnene? Kira! I kî n'ûntû ûkwenda kwîbûragithia?” Kwoogu kîroria gîakira îndî kîamwîra, “Inkûmenya Ngai nabangîîte gûkûûraga, n'ûntû bwa kûrûtha ûûgû na kûrega kûnthikîîria.”
17 Nyuma ya mûnene Amasia akwaria na ataari baake, aatûmana ntûmwa îno kîrî Njoasi mûnene wa Isiraeri ûra aarî mwana wa Njeoasi, ûyûûe wa Njeû, îkiugaga, “Ncû, tûrûe.”
18 Îndî Njoasi mûnene wa Isiraeri aacookeria Amasia mûnene wa Njunda amwîra, “Kîthaka kîrî mîîgua kîa Rebanoni i gîatûmanire kîrî mûthithinda wa Rebanoni kîauga, ‘Nenkanîra mwarî waku agûrwe i nthaka yakwa.’ N'yo nyamû ya kîthaka yaakûrûkîîra waagu yaakinyanga kîthaka gîku. 19 Wîbîîraga n'ûturîîte Endomu, na îîndî nûgwîkumia. Îndî îîndî kara mûciî! I kî n'ûntû ûkuuria thîîna gwîcereria kûûra wengwa na kinya Njunda?”
20 Amwe na ûgu, Amasia ataathikîîria, n'ûntû i Ngai aarûthaga bu kaingo abanenkanîra njaraani cia Njoasi, n'ûntû i baarombire ngai cia Endomu. 21 Kwoogu Njoasi mûnene wa Isiraeri aithûkîra Amasia mûnene wa Njunda baarwîra Bethi-Semesi naagu Njunda. 22 Njûûrî ya Njunda yaturwa i njûûrî ya Isiraeri, na bonthe baatoorooka beenûka. 23 Njeoasi mûnene wa Isiraeri aagwatîra Amasia mûnene wa Njunda, mwana wa Njoasi, mwana wa Aasia, Bethi-Semesi. Rîru Njoasi amûreeta Njerusaremu na oomora rûthingo rwa Njerusaremu kuuma mwîrîga wa Eburaimu kûthi Mwîrîgaani ûra ûrî Koonaani bantû a ûraaya bwa biiti magana mathanthatû. 24 Aathûkia thaabu yonthe na fetha na into bionthe bira bionirwe Nyomba ya Ngai, bira biamenyagîîrwa n'Obendi-Endomu, amwe na igîîna bia nyomba ya mûnene, na mîgwate, rîru aacooka Samaria.
25 Amasia mwana wa Njoasi mûnene wa Njunda aatûûrire mîanka îkûmi na îtaano nyuma ya gûkua kwa Njeoasi mwana wa Njeoaasi, mûnene wa Isiraeri. 26 Ngûgî ira ingî cia Amasia, kuuma mwanjîîrio mwanka mûthia, ciandîkîîtwe îbukuuni rîa ngono cia anene ba Njunda na Isiraeri. 27 Kuuma îgiita rîra aagarûkire aatiga Mwathani bamûbîndîra njûri Njerusaremu, na aatoorokera Rakisi, îndî baatûma antû bamûthingata mwanka Rakisi na bamûûragîra noogo. 28 Baacookia mwîrî wake ûkamatîîtwe na mbaraathi na aathikwa amwe na beethe Taûni ya Ndaundi.