Usia mûnene wa Njunda
(2Ane 14:21-22; 15:1-7)
26
1 Rîru antû bonthe ba Njunda baathûkia Usia, ûra aarî na ûkûrû bwa mîanka îkûmi na îthanthatû, na bamûtuîkithia mûnene bantû a îthe Amasia. 2 N'we aakire taûni ya Erothi kaîrî na amîcookia Njunda nyuma ya Amasia agûkua.3 Usia aarî na ûkûrû bwa mîanka îkûmi na îthanthatû agîtuîka mûnene, na aathana arî Njerusaremu mîanka mîrongo îtaano na îîrî. Gina eetagwa Njekoria wa kuuma Njerusaremu. 4 Aarûtha bûra kûbatîîrue meethooni ma Mwathani, wa ta bûra îthe Amasia aarûthîîte. 5 Aaceria Ngai ntugûûni cia Sakaria, ûra aamûrutanire mantû ma gûkuthûka Ngai. Rîra rîonthe aaceragia Mwathani, Ngai n'atûmaga athi na mbere bwega.
6 Aathi kûrûa na Afirisiti na oomoranga nthingo cia taûni cia Ngathi, Njabune na Asindondi. Rîru aaka taûni ira ciarî akubî Asindondi kaîrî na kûra kûngî gatîgatî ga Afirisiti. 7 Ngai amûteethia gûcinda Afirisiti, na Aarabu bara baatûîre Guri-Mbaari, na kinya Ameuni. 8 Aamoni baaretera Usia ûgooti, na nkuma yake yaatamba kûraaya mwanka Miisiri, n'ûntû n'aarî kûgîta inya mûno.
9 Usia aaka ibayo Njerusaremu mwîrîgaani ûra ûrî koonaani, mwîrîgaani wa kîbonde na ara rûthingo rwakoomokereete, na abiirigîra. 10 Kinya aaka ibayo rwanda na eenja ithima biingî, n'ûntû naarî na nyamû cia ndîîthia inyingî mîaranthî ya irîma na gûntû kûra kwaranîru. N'arî na antû ba kûruta ngûgî mîndaani na mîndaani ya mîcabiibû irîmaani na nthî ira noru, n'ûntû n'endeete kûrîma.
11 Usia n'arî na njûûrî înene na îndutane bwega, baathiyaga ikundi ikundi, kûringana na îthaabu rîra baatarîîtwe i Njeyeri ûra mwandîki na Maaseya mûrûngamîîri bara baarî wathooni bwa Anania, ûmwe wa atongoria ba mûnene. 12 Îthaabu rîonthe rîa atongoria ba mîîrîga ya antû ba ndûa baarî ngiri ciîrî na magana mathanthatû. 13 Ruungu rwa wathani bwao i kwarî na njûûrî ya antû ngiri magana mathatû ma mûgwanja na magana mataano, njûûrî îrî inya ya gûteethia kûrûa na anthû. 14 Usia aanenkera njûûrî înu yonthe rong'o, matumo, nkoobia cia kûrigîîria, tûbuuti twa îthaga, nta, na maiga ma kûgera na gîkûtha. 15 Gûku Njerusaremu aarûtha maacini cia ndûa ira ciarûthîîtwe n'antû baarî na ûtea, cia kwaigîîrwa îgûrû rîa ibayo na koonaani n'ûntû bwa kûgera mîgwî na maiga mara manene. Nkuma yake yataamba kûûraaya, n'ûntû n'ateethagua mûno mwanka aagîa na inya.
16 Îndî nyuma ya Usia kûgîta inya, eekumia na bûbu bwatûma agwa. Aatuîka ti mwîtîgua kîrî Mwathani Ngai wake, na njîra ya kûthûngîra Nyomba ya Mwathani kûbîîthia macoco kîthînjîrooni kîa macoco wengwa. 17 Asaria ûra mûthînjîri arî na athînjîri ba Mwathani bangî banaana baûmîîru bamûthingata gûku ndeeni. 18 Bamûrigîîria bamwîra, “Usia, ûtiagîrîîte kûbîîthîria Mwathani macoco. Înu i ngûgî ya athînjîri, nciarwa cia Arûni, bara baathûrîîtwe kûbîîthia macoco. Uma Nyomba ya Ngai, n'ûntû wîthîrîîtwe ûtarî mwîtîgua, na ûtitîîywa i Mwathani Ngai.”
19 Usia, ûra aarî na rûgîo njaraani eethuranîrîîte kûbîîthia macoco, aathûûra. Athûûrîrîîte athînjîri ba Ngai mbere yao woogu arî mbere ya kîthînjîro kîa macoco Nyomba ya Mwathani, mûtigiri wamûgwata kîreera gîake. 20 Rîra Asaria mûthînjîri ûra mûnene wa Ngai na athînjîri bara bangî baamûraithire, boona atî arî na mûtigiri kîongo gîake, bamuumagarûkia na mpwî. Ûmma, kinya we neendaga kuuma mûno, n'ûntû Mwathani n'amûringîîte. 21 Mûnene Usia eegua arî na mûtigiri mwanka ntugû îra aakuire. Ta aarî muntû wa mûtigiri, aakaraga nyomba mwanya îra aarigîîrue kûruta ngûgî, na kinya kûthûngîra Nyomba ya Mwathani. Mwan'wake Njothamu n'we aaraithagîra nyomba ya mûnene na akîathaga antû ba nthîgûrû înu.
22 Mantû mara mangî Usia aarûthire îgiita rîa wathani bwake, kuuma mwanjîîrio mwanka mûthia, maandîkîîtwe i kîroria Isaya mwana wa Amoci. 23 Usia aakua na aathikwa. Îndî ataathikwa nthikooni cia anene aathikirwe kîthakaani wagu akubî, kîra kîarî kîa anene, n'ûntû antû baugire, “N'araarî na mûtigiri.” Na Njothamu mwana wake aatuîka mûnene bantû aake.