Njothamu mûnene wa Njunda
(2Ane 15:32-38)
27
1 Njothamu aarî na ûkûrû bwa mîanka mîrongo îîrî na îtaano agîtuîka mûnene, na aathana Njerusaremu mîanka îkûmi na îthanthatû. Gina eetagwa Njerusa mwarî wa Sandoki. 2 Aarûtha bûra kûbatîîrue mbere ya Mwathani, wa ta îthe Usia, îndî we ataathûngîra Nyomba ya Mwathani. Amwe na ûgu, antû nwa baathiire na mbere kûrûtha moothûûku. 3 Njothamu aaka kaîrî mwîrîga wa neegûrû wa Nyomba ya Mwathani na aacookeeria mîako îmiingî rûthingooni rwa karîma ga Oferi. 4 Nkûrûki yoogu aaka taûni nthîgûrû ya irîma ya Njunda, na gûntû gwa kwîbitha na ibayo irîmaani bia mîthitû. 5 Aarûa na mûnene wa Amoni na abatura. Na Amoni bamûrîa kiro magana mana cia fetha mwanka ûyu, na tani ngiri îkûmi cia ngano na tani ngiri îmwe cia sayiri. Amoni bamûrîa kîthimi wa gîku mwanka wa îîrî na wa îthatû. 6 Kwoogu Njothamu aathi na mbere kûgîa inya, n'ûntû n'athiire na njîra îra ciagîrîîte mbere ya Mwathani Ngai wake.7 Ngûgî ira ingî cia Njothamu, amwe na ndûa ciake na mantû mara mangî aarûthire, maandîkîîtwe îbukuuni rîa ngono cia anene ba Isiraeri na ba Njunda. 8 Aarî na ûkûrû bwa mîanka mîrongo îîrî na îtaano agîtuîka mûnene, na aathana arî Njerusaremu mîanka îkûmi na îthanthatû. 9 Njothamu aakua na aathikwa Taûni ya Ndaundi. Na mwana wake Aasi aatuîka mûnene bantû aake.