Aasi mûnene wa Njunda
(2Ane 16:1-4)
28
1 Aasi aarî na ûkûrû bwa mîanka mîrongo îîrî, na aathana arî Njerusaremu mîanka îkûmi na îthanthatû. Ataathingata njîra imbega cia ûyûûe Ndaundi, bantû a ûûgû, aarûthire bûra bûtaarî bwega meethooni ma Mwathani. 2 Aathiingatire mîtugo îmîthûûku ya anene ba Isiraeri na aarûtha mîbuanaano ya îthaga ya Mbaari. 3 Aabîîthîria igongwana kîbondeeni kîa mwana wa Inomu na aabîîthia aana baake na mwanki kîrî kîgongwana, kûringana na mîtugo ya mûgiro ya mîgongo îra Mwathani eengatiirie mbere ya antû ba Isiraeri. 4 Aaruta igongwana na aabîîthîria macoco gûntû kûra gûûkîîru, na îgûrû rîa tûrîma, na ruungu rwa mûtî unthe ûmûnene na ûmûririmu.5 Kwoogu Mwathani Ngai wake amûnenkanîra njaraani cia mûnene wa Aramu. Asîîria bamûûmba na baathûkia antû baake baingî barî atae na babareeta Ndamasiki. Na kinya aaneenkanîrwa njaraani cia Peka mûnene wa Isiraeri, ûra aamûcindire na aûraga antû baake baingî mûno. 6 Peka mwana wa Remaria aûragire acikaarî ngiri îgana na mîrongo îîrî ntugû îmwe bonthe bara baarî ncamba, n'ûntû Njunda n'yatiganîrîîtie Mwathani, Ngai wa beethe. 7 Sikiri, Mûeburaimu, ncamba ya ndûa aûraga Maaseya nthaka ya mûnene, Asirikamu ûra aarûngamîrîîte ngûgî nyomba ya mûnene, na Erikana mûtongoria wa baîrî kuuma kîrî mûnene. 8 Antû ba Isiraeri baagwata antû ngiri magana maîrî kuuma kîrî aruagina tabo Njunda barî mîgwate, na i kwarî na aka, nthaka na aarî, na baataa into biingî bira baacookire nabio Samaria.
9 Kîroria kîa Mwathani kîra gîetagwa Ondendi i kîarî oogo, kîaumagarûka gûkomana na njûûrî îcookeete Samaria, kîabeera, “Raitha, n'ûntû Mwathani, Ngai wa ba abaagu naathûûrîîtue i Njunda, i kîo gîatûmire abanenkanîra njaraani cienu. Îndî bûbathirîîtie na mûthûûro ûmûnene ûra ûkinyîîte îgûrû. 10 Na îîndî bûrîbanga gûtuîkithia antû arûme na aka ba Njunda na Njerusaremu nkombo cienu. Wana biû bûtikwona bwîyîîtie kîrî Mwathani Ngai weenu? 11 Îîndî nthikîîriani! Cookiani aruanyûkwe na aaranyûkwe babu bûthûkîîtie barî nkombo, n'ûntû mûthûûro wa Mwathani ûrî îgûrû rîenu.”
12 Rîru atongoria bamwe ba Eburaimu tabo Asaria mwana wa Njeoanani, Mberekia mwana wa Mesiremothi, Njeisikia mwana wa Sarumu, na Amasa mwana wa Andirai baakaania babu baumîîte ndûani. 13 Babeera, “Bûtikaareete agwate babu gûkû, n'ûntû bûbu bûgaatûma twîgua tûrî na mabîtia mbere ya Mwathani. Ka bûkwenda kwongeera meeyia meetû na mabîtia? N'ûntû mabîtia meetû i maanene, mûthûûro wa Mwathani ûrî îgûrû rîa Isiraeri.”
14 Kwoogu acikaarî baatiga agwate na bira baataîte mbere ya atongoria na kîrîndî kîonthe. 15 Kwoogu atongoria bara bagweteetwe mariîtwa baathûkia agwate, na beekîra bara baarî ûtheri gatîgatîîni kaao nguo kuumania na bira baataîte. Babaa nguo na iraatû, biakûrîa na biakûnyua, na beekîra bara baagurarîîtue maguta irondaani. Bara bonthe bataarî na inya baakamatwa na mang'ooi. Kwoogu babacookia Njeriko kwa antû baao, taûni ya nkîndû. Rîru baacooka Samaria.
16 Kagiitaani gaku mûnene Aasi aatûmana kîrî mûnene wa Asîîria akîendaga ûteethio 17 n'ûntû Aendomu ibaarî bakwithûkîra Njunda kaîrî na babagwata mîgwate. 18 Afirisiti nabo ibaarî kûthûngîra taûni ira ciarî mîaranthî ya irîma ya rûteere rwa uumîîro bwa riûa na rwanda rwa naiti rwa Njunda. Na i baarî bakûgwata taûni cia Bethi-Semesi, Aiyaroni, Ngenderothi, Soko irî na ntûûra cia cio, Timuna na ntûûra ciayo, na Ngimuso na ntûûra ciayo, na baathi baatûûra noogo. 19 Mwathani n'arî kwîndamia Njunda n'ûntû bwa Aasi mûnene wa Isiraeri, n'ûntû n'aarûthîîte mantû maathûûku Njunda na eethîrwa atarî mwîtîgua kîrî Mwathani. 20 Kwoogu rîra Tigirathi-Pireseri mûnene wa Asîîria aathiire kîrî we, amwinyîîria bantû akûmûteethia. 21 Aasi aathûkiirie into bimwe kuuma Nyomba ya Mwathani na kuuma nyomba cia mûnene na kuuma nyomba ya atongoria abinenkanîra kîrî mûnene wa Asîîria. Îndî bûbu bûtaamûteethia nwa ata.
22 Kagiitaani gaake ka thîîna, mûnene Aasi i rîo aaregire gwîtîgîka kîrî Mwathani nkûrûki. 23 Aarutîra ngai cia Ndamasiki igongwana, bara baamûturîîte. Na baugire, “N'ûntû ngai cia mûnene wa Asîîria i ciabateethiirie, ngacirutîra igongwana kaingo inteethia.” Îndî i cio ciamûgwîthiirie na ciagwîthia Isiraeri yonthe.
24 Aasi eethîrania into bia Nyomba ya Ngai amwe abirebûranga tûcuncî tûcuncî, na ainga mîrango ya Nyomba ya Mwathani na eerûthîra ithînjîro koonaani cionthe cia Njerusaremu. 25 Taûniini cionthe cia Njunda aaka gûntû kûra gûûkîîru gwa kûbîîthîria ngai ira ingî igongwana na aathûûria Mwathani Ngai wa beethe.
26 Mantû mara mangî ma wathani bwake na njîra ciake cionthe, kuuma mwanjîîrio mwanka mûthia, maandîkîîtwe îbukuuni rîa ngono cia anene ba Njunda na Isiraeri. 27 Aasi aakua na aathikwa taûni ya Njerusaremu, îndî ateekîrwa nthikooni cia anene ba Isiraeri. Na mwana wake Esekia aatuîka mûnene bantû aake.