Esekia aatheria Nyomba ya Ngai
(2Ane 18:1-3)
29
1 Esekia aarî na ûkûrû bwa mîanka mîrongo îîrî na îtaano rîra aatuîkire mûnene, na aathana arî Njerusaremu mîanka mîrongo îîrî na kenda. Gina eetagwa Abiya mwarî wa Sakaria. 2 Aarûtha bûra kûbatîîrue mbere ya Mwathani, wata kîûyûûe Ndaundi.3 Mweriini wa mbere wa mwanka wa mbere wa wathani bwake, aarugûra mîrango ya Nyomba ya Mwathani na amîcookeeria. 4 Aathûngîria athînjîri ba Ngai na Arawi ndeeni, abeethîrania agu kîaragooni rûteere rwa uumîîro bwa riûa. 5 Rîru abeera, “Nthikîîriani biû Arawi, îîtherieni îîndî na bûtherie Nyomba ya Mwathani, Ngai wa ba abaagu. Bûrute into bionthe bira bitarî bitheru Nyomba ya Ngai. 6 N'ûntû ba baaba beetû bataarî eetîgua, i baarûthire ûthûûku meethooni ma Mwathani Ngai wetû na bamûtiganîria. I baûndûkîîrie Mwathani na gîkaro gîake mûgongo. 7 Bainga kinya mîrango ya kanyomba ka mûthûngîîro ka Nyomba ya Ngai na booria taa. Bataabîîthia macoco kana baruta biewa bia kûbîîthia nwa birîkû bantû ara atheru kîrî Ngai wa Isiraeri. 8 Kwoogu, mûthûûro wa Mwathani n'ûkinyûkîîte îgûrû rîa Njunda na Njerusaremu, n'abatuîkithîîtie gîntû gîa kûmakania, gîa kûrigaria, wa bûra bûkwona na meetho meenu. 9 I ntûma ba baaba baûragirwe na rûûyiû na nthaka cietû na aarî na eekûrû beetû barî mîgwate.
10 “Îîndî ndîbaanga kûrûtha kîrîîkanîro na Mwathani, Ngai wa Isiraeri, kaingo mûthûûro wake ûrutarutwa kuuma kîrî tiû. 11 Nthaka ciakwa, bûtigaatiganîrie ngûgî cienu îîndî, n'ûntû i biû Mwathani athuurîîte bûmûtûmîkîra bûrî nyomba yake, bûtuîka aruti ngûgî baake bûmûrutîra ngûgî na bûbîîthia macoco.”
12 Rîru Arawi baba beethuuranîra kûruta ngûgî,
kuuma mwîrîga wa Koathi baarî,
Maathi mwana wa Amasai na Njoeri mwana wa Asaria.
Kuuma mwîrîga wa Merari baarî,
Kisi mwana wa Abundi na Asaria mwana wa Njearereri.
Kuuma mwîrîga wa Ngerisoni baarî,
Njoa mwana wa Sima na Endeni mwana wa Njoa.
13 Kuuma kîrî nciarwa cia Erisafani kwarî,
Simuri na Njeyeri.
Kuuma kîrî nciarwa cia Asabu,
Sakaria na Matania.
14 Kuuma nciarwani cia Emani,
Njeiyeri na Simei.
Kuuma nciarwani cia Njenduthuni baarî,
Semaya na Usieri.
15 Rîra beethîraniirie aruagina na beetheria, baathûngîra kûtheria Nyomba ya Mwathani bakîthingataga watho bwa Mwathani wa ta bûra mûnene aathanîîte. 16 Athînjîri ba Ngai baathûngîra Nyomba ya Mwathani kûmîtheria. Baaruta into ome bira boonire biri na mûgiro gûku Nyomba ya Mwathani baaruta agu ome ya Nyomba ya Mwathani. Rîru Arawi babikamata babiumagarûkia ome ya taûni babiira kîbondeeni gîa Kindironi. 17 Baanjîîria kûtheria ntugû ya mbere ya mweri wa mbere, na ntugûûni ya inyanya ya mweri ûyu baakinya mûthûûngîîro wa Nyomba ya Mwathani. Gwa kagiita ga ntugû ciingî inyanya baatheria Nyomba ya Mwathani yongwa, baarîîkia ntugû ya îkûmi na ithanthatû ya mweri wa mbere.
18 Rîru baathûngîra kîrî mûnene Esekia bamwîra, “Tûkûtheria Nyomba ya Mwathani yonthe, kîthînjîro kîa igongwana bia kûbîîthua na into biakîo bionthe, na meetha ya kwaigîîra mîgaate ya kûrutîra Ngai, na into biayo bionthe. 19 Tûkûthuuranîra na twatheria into bionthe bira mûnene Aasi aarutire n'ûntû bwa kûrega gwîtîgîka gwake rîra aarî mûnene. Îîndî birî mbere ya kîthînjîro kîa Mwathani.”
20 Rûûni rûkîîrî mûnene Esekia aûka, eeta atongoria ba taûni înu amwe beetia baathi Nyomba ya Mwathani. 21 Baareeta ncamba mûgwanja cia ng'ombe, ntûrûme mûgwanja, nthenge mûgwanja irî kîgongwana kîa wîyia bwa ûnene, kîa Nyomba ya Ngai na kîa wîyia bwa Njunda. Mûnene aatha athînjîri ba Ngai, tabo nciarwa cia Arûni, bacirutîre kîthînjîrooni kîa Mwathani. 22 Kwoogu baathînja ncamba, na athînjîri ba Ngai baathûkia nthakame bamîmincaminca kîthînjîrooni na baathînja ng'ondu na baamincaminca nthakame yacio kîthînjîrooni, rîru baathînja ntûrûme na baamincaminca nthakame yacio kîthînjîrooni kinya ku. 23 Mbûri cia kîgongwana n'ûntû bwa wîyia ciareetirwe mbere ya mûnene na kîûthûrano, na baciaigîîra njara. 24 Rîru athînjîri ba Ngai bacithînja baaruta nthakame yacio kîthînjîrooni îrî ya kîgongwana n'ûntû bwa wîyia n'ûntû bwa kûtheria Isiraeri yonthe, n'ûntû mûnene n'aathanîîte kîgongwana gîa kûbîîthua na kîgongwana kîa wîyia kîrutwe n'ûntû bwa Isiraeri yonthe.
25 Kaîrî mûnene Esekia aiga Arawi Nyomba ya Mwathani barî na tamburini, inanda, na wandîndî cia ndigi inyingî na ngita wa ta bûra Ndaundi aabanganîîtie na Ngandi ûra oonagîra mûnene mantû na Nathani kûringana na watho bwa Mwathani gûkûrûkîîra iroria biake. 26 Kwoogu Arawi baarûngama na into bia gwini bia Ndaundi, na athînjîri ba Ngai barî na tûrumbeta. 27 Esekia aathana kûrutwe kîgongwana gîa kûbîîthua kîthînjîrooni. Kûruta kîgongwana gûkwanjîîria, kwinîra Mwathani naku kwanjîîria, kwathingatîîrwa i tûrumbeta na into bia kwina bia Ndaundi mûnene wa Isiraeri. 28 Kîrîndî kîonthe kîendamîîra kûgonga Mwathani, aini bakiinaga na aringi ba tûrumbeta bakîringaga. Mama monthe maathi na mbere mwanka kûruta kîgongwana gîa kûbîîthia kwarîîkia.
29 Rîra baarîîkiirie kûruta igongwana, mûnene na muntû wonthe baarî n'we agu baaturia maru na baagonga. 30 Mûnene Esekia na atongoria baake baatha Arawi bakumie Mwathani na nyîmbo cia Ndaundi na cia Asabu ûra oonaga mantû na kîongo. Kwoogu baina nyîmbo cia gûkumia barî na gîkeno na beendamîîra baagonga.
31 Rîru Esekia abeera, “Îîndî bûkwîbathûra kîrî Mwathani. Ncûûni bûreete igongwana na biewa bia nkaatho Nyomba ya Mwathani.” Kwoogu kîrîndî gîku kîareeta igongwana na biewa bia nkaatho, na bara bonthe baarî na wîru bwa nkoro bwa kûruta baareeta igongwana bia kûbîîthua. 32 Îthaabu rîa igongwana bia kûbîîthua bira kîrîndî gîku kîareetire rîarî ncamba cia ng'ombe mîrongo mûgwanja, ng'ondu îgana na ntûrûme magana maîrî, cionthe irî cia kîgongwana gîa kûbîîthua kîrî Mwathani. 33 Nyamû ira ciathereetue irî igongwana ciarî ncamba cia ng'ombe magana mathanthatû na ng'ondu ngiri ithatû. 34 Îndî athînjîri ba Ngai ibaarî baakai mûno ba kûthînja nyamû inu cionthe cia igongwana bia kûbîîthua. Kwoogu antû bara bangî ba kuuma mîciî yao babateethia mwanka rîra athînjîri bara bangî beetheriirie babateethia kûrîîkia ngûgî. Arawi i bo beebaigîîte barî batheru nkûrûki ya athînjîri bara bangî ba Ngai. 35 I kwarî na igongwana bia kûbîîthua kwa wingî, amwe na mathuunya ma kîgongwana kîa ngwatanîro na i kwarî na igongwana bia biakûnyua bira biarutanîîrue na kîgongwana gîa kûbîîthua.