Gûkûngwîra kîatho gîa Pasaka
30
1 Esekia aatûmana kîrî Isiraeri yonthe na Njunda na kinya aandîkîra antû ba Eburaimu na ba Manase baarûa, akîbeetaga baaya Nyomba ya Mwathani Njerusaremu gûkûngwîra Pasaka ya Mwathani, Ngai wa Isiraeri. 2 Mûnene na atongoria baake na kîrîndî kîonthe kîra kîarî Njerusaremu baabanga gûkûngwîra Pasaka mweriini wa îîrî. 3 Batikîûmba gûgîkûngwîra kagiita kara gaakîo mweriini wa mbere n'ûntû athînjîri ba Ngai bateetheereetie bwa kûgana, na antû bataarî bakwîthîrana Njerusaremu. 4 Wegua ûrî mûbango ûmwega kîrî mûnene na kîrîndî kîonthe. 5 Kwoogu baugîîria Isiraeri yonthe, kuuma Beeriseba rûteere rwa neegûrû kûthi Ndani rûteere rwa naiti, bagîîtaga antû baaya Njerusaremu bakûngwîra Pasaka ya Mwathani, Ngai wa Isiraeri. Îtaakûngwîrîîtwe gwa ntugû imbingî kûringana na bûra kwandîkîîtwe.6 Atongoria baake baathi Isiraeri yonthe na Njunda barî na baarûa kuuma kîrî mûnene na aruti ngûgî baake bûra mûnene aabaathîîte, na ciaugaga,
“Antû ba Isiraeri, cookaani kîrî Mwathani, Ngai wa Îburaîmu, Isaka na Isiraeri, kaingo abûcookeera biû bûtigeere, biû bûmonyokeete kuuma njaraani cia anene ba Aramu. 7 Bûtigaakare ta ba abaagu na aruanyûkwe, bara baaregire gwîtîgîka kîrî Mwathani, Ngai wa beethe, kaingo aatuîkithia nthîgûrû yao maganjo ûûgû bûkwona. 8 Bûtikaûmie biongo ta bûra ba abaagu baakari, îndî îînenkanîreeni kîrî Mwathani. Ncûûni nyomba yake, îra athereetie tene na tene. Tûmîkîraani Mwathani Ngai wenu, kaingo mûthûûro wake ûkauma kîrî biû. 9 Bwacookera Mwathani, aruanyûkwe na aana beenu bakeeguîrwa kîao i bara babagwete mîgwate na bagaacooka nthîgûrû îno, n'ûntû Mwathani Ngai wenu nwa ûtugi na kîao. Atibuuthatîria mûgongo wegua bûkamûcookera.”
10 Atûmwa baathi kuuma taûni kûthi îra îngî nthîgûrû ya Eburaimu na ya Manase, mwanka woo Seburuni, îndî antû babathekeera na babanyûrûûnta. 11 Amwe na ûgu, bamwe ba Aseri, Manase na Seburuni beenyiia baathi Njerusaremu. 12 Kinya Njunda Ngai n'ateethiirie antû baake abaa ngwatanîro ya mathûgaania n'ûntû bwa kûrûtha bûra mûnene na atongoria baake baathanîîte, kûringana na kiugo kîa Mwathani.
13 Kwoogu kîrîndî kiingî gîa antû gîakomana taûni ya Njerusaremu mweriini wa îîrî n'ûntû bwa gûkûngûîra kîatho kîa mîgaate îtarî miimbithie. 14 Baaragania ithînjîro bionthe Njerusaremu na bakûûranga kinya ithînjîro bia macoco babita kîguuruuni gîa Kindironi.
15 Baathînja gatûrûme ga Pasaka ntugû ya îkûmi na inya ya mweri wa îîrî. Athînjîri ba Ngai na Arawi bara bateethereetie beegua nthoni nabo beetheria na baareeta igongwana bia kûbîîthua Nyomba ya Mwathani. 16 Rîru baathûkia twanya twao Nyomba ya Ngai wa ta bûra kwandîkîîtwe wathooni bwa Musa mûruti ngûgî wa Ngai. Athînjîri ba Ngai baamincaminca nthakame kîthînjîrooni kuuma igongwanaani bira biaretetwe n'Arawi. 17 N'ûntû baingî kîrîndîîni gîku bateethereetie, Arawi i bo baûragire tûgondu twa Pasaka n'ûntû bwa kûtheria antû bonthe bara baarî na mûgiro kaingo babatheria kîrî Mwathani. 18 Kinya wegua baingî ba antû bara baumîîte Eburaimu, Manase, Isakaari na Seburuni bateethereetie, nwa baarîîre Pasaka, kîînyume na bûra kwandîkîîtwe wathooni. Îndî Esekia abarombera akiugaga, “Mwathani ûra mwega aroorekera kîra ûmwe 19 weerekereetie nkoro yake gûceria Mwathani Ngai wa beethe, kinya wegua ti mûtheru kûringana na mawatho ma Nyomba ya Ngai.” 20 Na Mwathani eegua Esekia na ooria antû.
21 Aisiraeri bara baarî Njerusaremu baakûngwîra Kîatho kîa mîgaate îteekîrîîtwe ndawa ya kwimbithia mîgaate gwa kagiita ga ntugû mûgwanja bakeneete mûno, Arawi nabo na athînjîri ba Ngai bakiinagîra Mwathani wa îra ntugû, na into bia gûkumithia Mwathani.
22 Esekia akaathîîria Arawi bonthe bara baarutire ngûgî ya Mwathani bwega. Gwa kagiita ga ntugû inu mûgwanja baarîa kîatho gîku na baaruta biewa bia ngwatanîro na baakumia Mwathani Ngai wa beethe.
23 Rîru kîrîndî kîonthe gîetîganîîria gûkûngwîra kîatho gîku ntugû ingî mûgwanja, kwoogu gwa kagiita ga ntugû ciingî mûgwanja baakûngwîra bakeneete. 24 N'ûntû Esekia mûnene wa Njunda aanenkeere kîrîndî gîku ncamba cia ng'ombe ngiri îmwe na ng'ondu ngiri mûgwanja, na aanenkera atongoria baake ncamba ngiri îmwe na mbûri na ng'ondu nacio ngiri îkûmi. Kwoogu athînjîri ba Ngai baingî beetheria. 25 Kîrîndî kîonthe kîa Njunda gîakûngwîra, amwe na athînjîri ba Ngai na Arawi na bonthe bara beethîranîîte kuuma Isiraeri, amwe na ageni bara baatwîre Isiraeri na bara baatwîre Njunda bara baayîîte kîathooni. 26 I kwarî na gîkeno kîînene Njerusaremu, n'ûntû kuuma ntugûûni cia Soromoni mwana wa mûnene Ndaundi wa Isiraeri gûteethîrwa na ûntû ta bûbû Njerusaremu. 27 Athînjîri ba Ngai na Arawi baarûngama kûthaarima antû, na Ngai abeegua, n'ûntû maromba maao i maakinyire îgûrû, gîkaro gîake kîîtheru.