Mûnene Esekia aacookanîîria ngûgî ya athînjîri
31
1 Rîra kîatho kîarîîkire, Aisiraeri bara baarî agu baumagarûka taûni cia Njunda, baathithiranga itugî bia maiga na baatemanga itugî bia ngai wa mûbuanaano Asera. Beenyangia gûntû kûra gûûkîîru wa kûgongera ngai cia mîbuanaano na ithînjîro Njunda yonthe, Benjameni, Eburaimu na Manase. Bakûrîîkia kûbiînyangia bionthe, Aisiraeri baacooka taûni ciao na nthî yao.2 Esekia aagaania athînjîri na Arawi ikundi wa kîra gîkundi gîkîrutaga ngûgî yakîo kîrî kîa athînjîri ba Ngai kana kîa Arawi. Ngûgî inu i ta, kûruta igongwana bia kûbîîthua na igongwana bia ngwatanîro, gûtûmîka, gûcookia nkaatho na kwina nyîmbo cia gûkumia mîîrîgaani ya gîkaro kîa Mwathani. 3 Mûnene aaruta kuuma intooni biake igongwana bia kûbîîthua bia wa kîra ntugû rûkîîrî na ûgoro, na kinya bia kûruta kîgongwana gîa ntugû cia Sabatû, na igongwana bia kûyiûka kwa mîeri na bia biatho bira biingî biathûre wa ta bûra kwandîkîîtwe wathooni bwa Mwathani. 4 Na aatha antû bara baatûûraga Njerusaremu beeyane icuncî bia athînjîri ba Ngai na Arawi kaingo beenenkanîra wathooni bwa Mwathani. 5 Watho bûkûrutwa ûgu, Aisiraeri beeyana na wîru rwîrua rwao rwa mbere na irio, ndibei înjerû, maguta na ûkî na bionthe bira biumaga mîndaani. Baareeta kwa wingî icuncî bia îkûmi bia into bionthe. 6 Antû ba Isiraeri na Njunda bara baatûûraga taûni cia Njunda kinya bo baareeta icuncî bia îkûmi bia ng'ombe ciao na ng'ondu, na icuncî bia into biitheru babineenkanîra kîrî Mwathani Ngai wao, na babiûmba ithûmba. 7 Baanjîîrie kûrûtha ûûgû mweriini wa îthatû na baarîîkia mweriini wa mûgwanja. 8 Rîra Esekia na atongoria baake baayire boona ithûmba bibu, baakumia Mwathani na baathaarima antû ba Isiraeri.
9 Esekia aûria athînjîri ba Ngai na Arawi mantû meegiî ithûmba bibu, 10 na Asaria mûthînjîri ûra mûnene wa Ngai, wa kuuma mûciî wa Sandoki, acookia auga, “Kuuma antû bakwanjîîria kûreeta maruta maao Nyomba ya Mwathani, itwîthîrîîtwe tûrî na biiganu bia kûrîa na biingî bia gûtigaria, n'ûntû Mwathani n'athaarimîîte antû baake, na bibi biingî ûûgû biatigara.”
11 Rîru Esekia aaruta watho kûrûthwe tûnyomba twa kwaiga into gûku Nyomba ya Mwathani, na kwarûthwa ûgu. 12 Rîru na njîra ya wîtîgîka baathûngîria maruta, icuncî bia îkûmi na biewa biathûre. Konania, Mûrawi, n'we aagaigirwe kaanyaani ga gûcûûbîra into bibi, na mûruagina Simei mûniini wake. 13 Njeiyeri, Asasia, Naathi, Asaeri, Njerimothi, Njosabandi, Erieri, Isimakia, Maathi na Benaya i bo baarî arûngamîri barî ruungu rwa Konania na mûruagina Simei. Baathuurîîtwe i mûnene Esekia na Asaria arî mûtongoria ûra aarî mûnene Nyomba ya Ngai.
14 Kore mwana wa Imuna Mûrawi, mûkaria wa mwîrîga wa uumîîro bwa riûa, n'we aamenyagîîra biewa bia kwîbendera bira biarutagîrwa Ngai, na kûgaîra Arawi bara bangî igongwana bira biathûrîrîîtwe Mwathani na kinya biewa bira biathûre. 15 Endeni, Miniamini, Njesua, Semaya, Amaria na Sekania bamûteetheeria na njîra ya gwîtîgîka taûniini cia athînjîri ba Ngai, kûgaîra athînjîri bara bangî kûringana na ikundi biao, baakûrû na baaniini bûmwe.
16 I baagaîrîîre kinya antû arûme ba kuuma ûkûrû bwa mîanka îthatû gwîtia bonthe bara baathûngagîra Nyomba ya Mwathani wa ta bûra kûbatîîrue kûruta ngûgî ya kîra ntugû, na bara mariîtwa maao maandîkîîtwe gîkundiini kîa mîîrîga yao. 17 Na baagaîra athînjîri ba Ngai bara baandîkîîtwe ikundiini bia mîîrîga yao na kinya kîrî Arawi ba kuuma ûkûrû bwa mîanka mîrongo îîrî gwîtia, kûringana na ngûgî ciao na ikundi biao. 18 Baatarirwe amwe na twana twao tunthe, eekûrû baao, nthaka ciao na aarî baao, na muntû wonthe, n'ûntû ibeerutanîîrie kwîtheria.
19 Kîrî athînjîri, tabo nciarwa cia Arûni, bara baatwîre mûndaani wa nthî îra yarî akubî na taûni ciao kana taûni îngî wa yonthe îra, antû arûme baandîkîîtwe na mariîtwa kûgaa icuncî kîrî muntû mûrûme wonthe gatîgatî ka athînjîri ba Ngai na Arawi bara baandîkîîtwe gîkundiini kîa mîîrîga yao.