Mwathani acinda Asîîria
(2Ane 18:13-37; 19:14-19, 35-37; Isa 36:1-22; 37:8-38)
32
1 Nyuma ya mamu monthe Esekia aarûthire na akîathîkagîra Ngai na njîra ya gwîtîgîka, Senakeribu mûnene wa Asîîria aithûkîra Njunda. Aacîgîîria taûni ira ciarî mbirigîre na maiga abangîîte kwîgwatîra cio. 2 Rîra Esekia oonire Senakeribu akûûya na n'abangîîte kûrûa na Njerusaremu, 3 aaria na atongoria baake na acikaarî ba ndûa îgûrû rîa kûrigîîria rûûyî kuuma ithimaani ome ya taûni, na bamûteethia. 4 Gîkundi gîa antû baingî kîethîrana, na baingîîria ithima bionthe na tûmiuro tûra twagiitagîîra nthî înu. Baûria “N'ata anene ba Asîîria baûmba kûûya bakeethîra rûûyî rwingî?” 5 Rîru aaruta ngûgî na inya aacookeeria rûthingo gûntû kûra kwomokeete, na aaka ibayo ku. Aaka rûthingo rûûngî ome ya rûru na eekîra miro ya Taûni ya Ndaundi inya. Aarûtha kinya mathaga ma ndûa maingî na rong'o.6 Aathuura atongoria ba njûûrî ya ndûa bagûtongoria antû na abeethîrania gwake kîaragooni mwîrîgaani wa taûni. Rîru abaûmîîria na mîgambo îno, 7 “Îguani bûrî na inya na ûcamba. Bûtikaamake kana bûkua nkoro n'ûntû bwa mûnene wa Asîîria na njûûrî înene îra arî n'yo, n'ûntû ûra tûrî n'we arî na inya înene nkûrûki yake. 8 Wee arî na inya ya mwîrî akî, îndî tiû tûrî na Mwathani Ngai wetû wa gûtûteethia na kûrûa ndûa cietû.” Na antû baagîa na inya kuumania na bûra Esekia mûnene wa Njunda augire.
9 Nyumaani, rîra Senakeribu mûnene wa Asîîria na njûûrî yake yonthe baathiûrûkîrîîte Rakisi, aatûma atongoria baake Njerusaremu kîrî Esekia mûnene wa Njunda na antû bonthe ba Njunda bara baarî noogo na ntûmwa îkuuga ûûgû,
10 “Niû Senakeribu mûnene wa Asîîria ndîûria bwaigîîte mwîrîgîîro wenu kîrî ûû n'ûntû bûkari Njerusaremu încîgîîrie? 11 Rîra mûnene Esekia akûbwîra Mwathani Ngai wetû akabwonokia kuuma njaraani cia mûnene wa Asîîria, n'akûbûta, abûrekia bûkua i yûûra na bûûta. 12 Esekia wengwa ataarutaruta gûntû kûra gûûkîîru na ithînjîro bia ngai ûyû, akîîraga Njunda na Njerusaremu, atî nwa mwanka bagonge barî mbere ya kîthînjîro kîmwe na babîîthîrie igongwana ku?
13 Ka bûtaiyî bûra n'yû na ba baaba twarûthîîre antû bonthe ba nthî ira ingî? Ngai cia mîgongo înu iciaûmbire kwonokia nthî yao kuuma njaraani ciakwa? 14 N'ûû wa ngai inu cionthe cia mîgongo îno ba baaba baathiriirie aûmba kwonokia antû baake kuuma kîrî niû? N'ata îndî ngai wenu aûmba kûbwonokia kuuma njaraani ciakwa? 15 Kwoogu îîndî bûtikaareke Esekia abweneeria na abûta na njîra îno. Menyaani bûmwîtîgia, n'ûntû gûtirî ngai wa mûgongo nwa ûrîkû kana ûnene aaroonokia antû baake kuuma njaraani ciakwa kana cia ba baaba. Ngai wenu nwe akaaremwa nkûrûki kûbwonokia njaraani ciakwa!”
16 Atongoria ba Senakeribu baaria nkûrûki kîînyume na Mwathani Ngai na kîînyume na mûruti ngûgî wake Esekia. 17 Mûnene aandîka kinya baarûa akîrumangaga Mwathani, Ngai wa Isiraeri, akiugaga ûûgû, “wa ta bûra ngai cia antû ba nthîgûrû ira ingî itoonokia antû baacio kuuma njaraani ciakwa, nwa ta bu ngai wa Esekia atakîonokia antû baake kuuma njaraani ciakwa.” 18 Rîru atongoria ba Asîîria baugîîria antû ba Njerusaremu bara baarî rûthingooni baarûa înu na Kîîyaundi bakîbamakia bamakania kaingo bagwata taûni. 19 Baaria mantû ma Ngai wa Njerusaremu ta bûra baaragia îgûrû rîa ngai cia antû bara bangî ba nthîgûrû, ira irûthîîtwe na njara cia antû.
20 Rîru mûnene Esekia na kîroria Isaya mwana wa Amoci baaromba baarîrîra Ngai arî îgûrû n'ûntû bwa ûûgû. 21 Na Mwathani aatûma mûraîka, ûra aûragire atongoria ba ndûa bonthe na aathani na atongoria bonthe kambîîni ya mûnene wa Asîîria. Kwoogu Senakeribu aacooka nthîgûrû yake arî na îgi. Na rîra aathiire nyomba ya ngai wake, aana bamwe baake bamûûraga na rûûyiû.
22 Kwoogu Mwathani oonokia Esekia na antû ba Njerusaremu kuuma njaraani cia Senakeribu mûnene wa Asîîria na kuuma njaraani cia anthû baake bonthe. Abakaria nteere cionthe. 23 Baingî baareetera Mwathani biewa Njerusaremu na baaretera Esekia mûnene wa Njunda biewa bia goro. Kuuma rîru kûthi mbere aatîîywa mûno i mîgongo yonthe.
24 Ntugûûni inu Esekia aayua becû akua. Aaromba Mwathani, n'we amwîgua na amwonia rwano. 25 Îndî nkoro ya Esekia yaagîa na gwîkumia atoonania nkaatho akwîguîrwa kîao, n'ûntû bwoogu mûthûûro wa Mwathani wegua ûrî îgûrû rîake, Njunda na Njerusaremu. 26 Rîru Esekia eerira gwîkumia bwa nkoro yake, na antû ba Njerusaremu baarûtha bu. Kwoogu mûthûûro wa Mwathani ûtaaya kîrî bo îgiitaani rîa Esekia.
27 Esekia n'aarî na ûtonga bwingî na n'atîîyîîtwe. N'ebaigîrîîte igîîna bia thaabu na fetha ciake na bia maiga ma goro, tûnyamû tûra tûnuunkaga bwega, rong'o na into biega bia mîthemba yonthe. 28 Aaka kinya nyomba cia kwaiga maketha ma irio, ndibei yaimbia na maguta, na airiga biugû bia mîthemba mwanya mwanya bia ng'ombe, na biaga bia ng'ondu. 29 Aaka taûni inyingî na aagîa na ng'ondu inyingî na ng'ombe, n'ûntû Ngai namwete ûtonga bwingî mûno.
30 Esekia n'we aingire mûthîîra wa neegûrû wa muuro wa Ngioni na eerekeeria rûûyî bwa iti rûteere rwa ûthwîro bwa riûa bwa Taûni ya Ndaundi. N'aûmbanire ûntûûni bunthe bûra aarûthire. 31 Îndî rîra atûmwa baatûmirwe n'athani ba Mbabironi kûmûûria mantû ma biama bira bionekeete nthîgûrû înu, Ngai amûtiga akîmûthima amenya bunthe bûra bwarî nkorooni yake.
32 Mantû mara mangî Esekia aarûthire îgiita rîa wathani bwake na ngûgî cia kwîrutanîria maandîkîîtwe kîonekiini gîa kîroria Isaya mwana wa Amoci îbukuuni rîa ngono cia Anene ba Njunda na Isiraeri. 33 Esekia aakua na aathikwa rûteere rwa neegûrû rwa nthiko cia ûnene rûra rwathûrîrîîtwe Ndaundi na anene bara bangî ba gîtîîyo. Rîra aakuire, antû ba Njunda na bonthe bara bakaraga Njerusaremu bamûthika na gîtîîyo. Na mwana wake Manase aatuîka mûnene bantû aake.