Manase mûnene wa Njunda
(2Ane 21:1-9)
33
1 Manase aarî na ûkûrû bwa mîanka îkûmi na îîrî agîtuîka mûnene, na aathana arî Njerusaremu mîanka mîrongo îtaano na îtaano. 2 Aarûtha ûthûûku mbere ya Mwathani, aathingata mîtugo ya îgi ya mîgongo îra Mwathani aarî akwîngatia mbere ya Aisiraeri. 3 Aacookeeria gûntû kûra gûûkîîru gwa kûgongera ngai cia mîbuanaano kinya aarûngîka itugî bia mîbuanaano ya Asera îra îthe Esekia aarî akwomborania, aarûtha kinya ithînjîro bia Mbaari, na aagonga nthata cia îgûrû. 4 Aaka ithînjîro bia kûgongera mîbuanaano Nyomba ya Mwathani, bira Mwathani augîîte, “Riîtwa rîakwa rîkaagongagîrwa Njerusaremu tene na tene.” 5 Biaragooni birî biîrî bia Nyomba ya Mwathani, aakîra riûa, mweri, nthata na into biingî bia îgûrû ithînjîro. 6 Aaruta aana baake kîgongwana kîbondeeni kîa mwana wa Inomu, aarûtha mantû ma ûgao, kûringia, ûrogi na aaria na irundu bia akuû. Aarûtha moothûûku maingî mbere ya Mwathani, aatûma athûûra.7 Aacaa mûbuanaano acuaiga Nyomba ya Mwathani, îra Ngai eerîîte Ndaundi na Soromoni mwana wake ata rî, “Ndeeni ya nyomba îno, na Njerusaremu, îra nthuurîîte kuuma mîgongooni yonthe ya Isiraeri, riîtwa rîakwa rîkaagongagîrwa ku tene na tene. 8 Ntiireka kaîrî mbayo cia Aisiraeri ciuma nthî îra ndaapeere biûyûûyû bienu, bunka wegua bakaamenyeera kûrûtha bunthe bûra ndaabaathire kûringana na maathana, mawatho na mîtugo yonthe îra beerwe gûkûrûkîîra Musa.” 9 Îndî Manase aabîtithia Njunda na antû ba Njerusaremu njîra, baarûtha moothûûku maanene nkûrûki ya mîgongo îra Mwathani aathiriirie mbere ya Aisiraeri.
10 Mwathani aaria na Manase na antû baake, îndî bataathikîîria. 11 Kwoogu Mwathani abareetera atongoria ba Ndûa ba mûnene wa Asîîria, bara baagwatire Manase mûgwate, bamwîkîra ndwano ya nyiûrû, bamwoga na mpengû cia cuuma na bamwira Mbabironi. 12 Manase arî thîînaani înu eereka Mwathani Ngai wake na eenyiia mûno mbere ya Ngai wa beethe. 13 Na rîra aamûrombire, Mwathani aaringithua i kwerekana gwake na aathikîîria gûkaya gwake, kwoogu amûcookia Njerusaremu ûneneeni bwake. Rîru Manase aamenya atî Mwathani i Ngai.
14 Nyuma ya mantû mama, Manase aacookeeria rûthingo rwa ome rwa Taûni ya Ndaundi, ûthwîro bwa riûa bwa muuro wa Ngioni kîbondeeni gîa Kindironi, kûthi bwa mwîrîga wa makûyû na aathiûrûûkîria karîma ka Oferi, arûîtithia rwaraayîa. Aiga atongoria ba acikaarî taûniini ira ciarî mbirigîre na nthingo cionthe Njunda.
15 Aaruta mîbuanaano ya ngai i ngeni na mûbuanaano kuuma Nyomba ya Mwathani, amwe na ithînjîro bionthe bira aakîîte kîrîmaani kîa Nyomba ya Mwathani na Njerusaremu, na abiruta biauma taûni. 16 Rîru aaka kîthînjîro kîa Mwathani kaîrî na aarutîra kîgongwana kîa ngwatanîro na kîgongwana gîa nkaatho ku, na eera antû ba Njunda batûmîkîre Mwathani, Ngai wa Isiraeri. 17 Amwe na ûgu, antû baathi na mbere kûrutîra igongwana gûntû kûra gûûkîîru, îndî baarutagîra Mwathani Ngai wao wenka.
18 Mantû mara mangî ma wathani bwa Manase, amwe na îromba rîake kîrî Ngai na biugo bîra iroria biamwîrire riîtwani rîa Mwathani, Ngai wa Isiraeri, maandîkîîtwe mabukuuni ma mûririkana ma ngono cia anene ba Isiraeri. 19 Îromba rîake na bûra Ngai aaringithiirue i kwerekana gwake, amwe na meeyia maake monthe na kûrega gwîtîgîka, na gûntû kûra aakire gûntû kûra gûûkîîru na aiga itugî bia Asera na ngai cia mîbuanaano mbere eenyiia, monthe maandîkîîtwe mabukuuni ma iroria. 20 Manase aakua na aathikwa gwake. Na Amoni mwana wake aatuîka mûnene bantû aake.
Amoni mûnene wa Njunda
(2Ane 21:19-26)
21 Amoni aarî na ûkûrû bwa mîanka mîrongo îîrî na îîrî agîtuîka mûnene, na aathana arî Njerusaremu mîanka îîrî. 22 Kinya naagongire na aarutîra igongwana mîbuanaano yonthe îra îthe Manase aarûthîîte. 23 Îndî ateenyiia mbere ya Mwathani ta îthe Manase. Amoni aakûrûkîîria ûthûûku bwake.