Njosia mûnene wa Njunda
(2Ane 22:1-2)
34
1 Njosia aarî na ûkûrû bwa mîanka înaana agîtuîka mûnene, na aathana arî Njerusaremu mîanka mîrongo îthatû na ûmwe. 2 N'aarûthire bûra kûbatîîrue mbere ya Mwathani, aathingatire njîra cia ûyûûe Ndaundi, atakwathûkîra bwa ûrîo kana bwa ûmotho.3 Mwankaani wa înaana wa wathani bwake, wa arî mûniini, n'aanjîîrie gûceria Ngai wa kîûyûûyû gîake Ndaundi nainya. Mwankaani wake wa îkûmi na îîrî wathaniini bwake aambîîria kûtheria Njunda na Njerusaremu, aaruta gûntû kûra gûûkîîru wa kûgongera ngai cia mîbuanaano, itugî bia Asera, ngai cia mîbuanaano ya gûcaa na mîbuanaano ya ngai i ngeni. 4 Ithînjîro bia Mbaari biomboranua acûûbîrîte, eenyangia ithînjîro bia macoco bira biarî îgûrû yabio, na aunanga itugî bia Asera. Aagwîthia kinya mîbuanaano ya gûcaa na mîbuanaano ya kûûmba ya cuuma. Rîru acigiitanga tûcuncî tûcuncî na acithia mûtu acunyagaaria îgûrû rîa nthiko cia bara baacigongaga. 5 Aabîîthîria mîîndî ya athînjîri ba ngai inu ithînjîrooni biao, na njîra înu, aatheria Njunda na Njerusaremu. 6 Taûniini cia nthîgûrû ya Manase, Eburaimu na Simioni, kûthi bwa Nabutarî, na maganjo mara maacithiûrûkîrîîte, 7 aunanga ithînjîro na itugî bia Asera na aathithira mîbuanaano yaatuîka mûtu na eenyangia ithînjîro bia macoco bionthe Isiraeri. Rîru aacooka Njerusaremu.
8 Mwankaani wa îkûmi na înaana wa wathani bwa Njosia, akûrîîkia kûtheria nthîgûrû na Nyomba ya Ngai, aatûma Safani, mwana wa Asaria, na Maaseya mwathi wa taûni, amwe na Njoa mwana wa Njeoasi, mwandîki wa mûnene, baathi gûcookeeria Nyomba ya Mwathani Ngai wake.
9 Baathi kîrî Irikia mûthînjîri ûra mûnene na bamwa mbia ira ciareteetwe Nyomba ya Ngai, ira Arawi bara baakaragia mîraango beethîranîîtie kuuma kîrî antû ba Manase, Eburaimu na matigari monthe ma Isiraeri na kuuma kîrî antû bonthe ba Njunda na Benjameni na bara baatûîre Njerusaremu. 10 Rîru bacinenkanîra njaraani cia antû bara baathuurîîtwe kûraithîra ngûgî Nyomba ya Mwathani. Antû baba baarea aruti ngûgî bara baacookeerie na baacookanîîria Nyomba ya Ngai. 11 Kinya baanenkanîra mbia kîrî mabundi ma mbaaû na ba maiga cia kûgûra maiga maacae, na mbaaû cia mata na mbaaû ira nene cia kwimba mîako îra anene ba Njunda baarî bakûrekeeria yaagwa yatuîka îganjo.
12 Antû babu baaruta ngûgî na njîra ya gwîtîgîka. Bara baabarûngamîrîîte baarî Njaathi na Obandia, Arawi ba rûrîîyo rwa Merari, na Sakaria na Mesuramu nabo baarî nciarwa cia Koathi. Arawi bonthe bara baarî na ûtea bwa kûringa into bia kwina 13 i bo baacûûbagîra bara baakamataga into na aruti ngûgî bonthe ba ngûgî mwanya mwanya. Bamwe ba Arawi baarî aandîki na akaria ba mîrango na arûngamîîri.
Îbuku rîa watho rîoneka
(2Ane 22:3-20)
14 Bakîrutaga mbia ira ciareteetwe Nyomba ya Mwathani, Irikia ûra mûthînjîri wa Ngai oona Îbuku rîa watho bwa Mwathani rîra rîeyanîîtwe gûkûrûkîîra Musa. 15 Irikia eera Safani ûra mwandîki, “Nkwona îbuku rîa watho Nyomba ya Mwathani.” Rîru Irikia aanenkera Safani rîo.
16 Rîru Safani airîra mûnene îbuku rîru na amwîra, “Aruti ngûgî baaku ibakûrûtha monthe mara beerîîtwe barûthe. 17 Mbia ira ciethîraniirue Nyomba ya Mwathani iciranenkanîîrwe kîrî arûngamîîri na aruti ngûgî.” 18 Rîru Safani ûra mwandîki eera mûnene, “Irikia mûthînjîri wa Ngai agûûmpa îbuku.” Na Safani arîthooma mbere ya mûnene.
19 Rîra mûnene eegiirue mîgambo îra yaandîkîîtwe îbukuuni rîa watho, aatembûranga nguo ciake i kîeba. 20 Rîru eeta Irikia, Aikamu mwana wa Safani, Abundoni mwana wa Mika, Safani ûra mwandîki na Asaya ûra aatûmîkagîra mûnene na abaa mawatho abeera, 21 “Îthiini bûûrithîrie kîrî Mwathani bantû aakwa mantû maakwa na ma antû bonthe bara batigeere Isiraeri na Njunda, îgûrû rîa bûra kwandîkîîtwe îbukuuni rîrî rîonekana. Mûthûûro ûra wîtûûrîîtwe îgûrû rîetû n'ûmûnene n'ûntû ba baaba beetû bataathîkîra kiugo kîa Mwathani, bataarûtha kûringana na bûra bunthe bwandîkîîtwe îbukuuni rîrî.”
22 Kwoogu Irikia na bara mûnene aamûtûmîîte nabo baathi kwaria na kîroria kîa mûka gîetagwa Urunda, ûra aarî mwekûrû wa Sarumu, mwana wa Tokathi, mwana wa Asira, ûra aarî mûkaria wa ara nguo cia gûtûmîka Nyomba ya Ngai ciaigagwa na aatûûraga Njerusaremu, ntûûra ya ciîrî.
23 Abeera, “Îraani muntû ûra abûtûmire kîrî niû, 24 Mwathani Ngai wa Isiraeri ariuga, ‘I nthiîte kûreeta mpanga gûntû gûkû, na îgûrû rîa antû bara batwîre aaga ndeete irumi bionthe bira biandîkîîtwe îbukuuni rîra rîathoomirwe mbere ya mûnene wa Njunda. 25 N'ûntû ibantiganîrîîtie na baabîîthîria ngai ciingî macoco na banthûûria na ngûgî cionthe cia njara ciao, kwoogu mûthûûro wakwa ûgeetûûrwa bantû aaga na ûtioreka.’ 26 Îndî îra mûnene wa Njunda, ûra abûtûmîîte bûûria kuuma kîrî Mwathani atî, ûûgû i bu Mwathani, Ngai wa Isiraeri akuuga, ‘Kuumania na mîgambo îra wegiirue, 27 Nkoro yaku n'yainyire, na wenyiia mbere ya Ngai, rîra wegiirue bûra augire îgûrû rîa gûntû gûkû na antû baaku. N'ûntû nwenyiirie mbere yakwa na watembûranga nguo ciaku na warîra mbere yakwa, inkwîgîîtue. 28 Îîndî ngakûnogokia amwe na ba abaagu, na ûkaathikwa na ûkiri. Ûtiona thîîna îra yonthe nkaareeta gûntû gûkû na bara batwîre taûni îno.’ ” Kwoogu baira macookio maake kîrî mûnene.
29 Rîru mûnene eethîrania akûrû ba Njunda na Njerusaremu bonthe. 30 Eetia Nyomba ya Mwathani barî na antû ba Njunda na ba Njerusaremu, amwe na athînjîri ba Ngai na Arawi na antû bonthe kuuma ûra mûniini mwanka ûra mûnene. Aathooma bakîîgagua mîgambo yonthe îra yarî îbukuuni rîa kîrîîkanîro, rîra rîethîrîîtwe Nyomba ya Mwathani. 31 Mûnene aarûngama bantû aake na eerûyia kîrîîkanîro mbere ya Mwathani gîa kûthingata Mwathani na kwathîkîra maathana na mawatho maake, na nkoro yake yonthe, na kwathîkîra biugo bia kîrîîkanîro bira biandîkîîtwe îbukuuni rîru.
32 Kinya aatûma bonthe bara baarî agu Njerusaremu na Benjameni bathiîtia kûthingata kîrîîkanîro. Na bara baatûîre Njerusaremu batûûra kûringana na kîrîîkanîro kîa Ngai, Ngai wa beethe.
33 Njosia aarutaruta ngai cia mîbuanaano kuuma nthî cionthe cia Aisiraeri, na aatûma bonthe bara baatwîre Isiraeri batûmîkîra Mwathani Ngai wao. Ûtûûroni bwa Njosia bunthe, bataatiga kûthingata Mwathani, Ngai wa beethe.