Njosia aakûngwîra Pasaka
(2Ane 23:21-23)
35
1 Njosia aakûngwîra kîatho gîa Pasaka ya Mwathani gûku Njerusaremu, na baathînja kagondu ga Pasaka ntugû ya îkûmi na inya ya mweri wa mbere. 2 Aapa athînjîri ba Ngai ngûgî ciao na abeekîra mwoyo ngûgîîni ya Nyomba ya Mwathani. 3 Na eera Arawi bara baarutanaga Isiraeri yonthe na bara baathereetue n'ûntû bwa gûtûmîkîra Mwathani ata rî, “Igaani îthandûkû rîa kîrîîkanîro rîîtheru Nyomba ya Mwathani îra Soromoni mwana wa Ndaundi t'we mûnene wa Isiraeri aakire. Bûtirîkamata na ituro bienu kaîrî. Îîndî tûmîkîraani Mwathani Ngai wenu na antû baake Isiraeri. 4 Îîbangeeni kûruta ngûgî kûringana na ikundi bia mîciî yenu, kûringana na bûra kwandîkirwe i Ndaundi mûnene wa Isiraeri na mwana wake Soromoni.5 “Bûrûngame bantû ara bûbangîîtwe kûringana na ikundi bienu na gîkundi kîa Arawi kaingo bûteethia bara bakûreeta biewa biao. 6 Thînjaani tûgondu twa Pasaka, n'ûntû bwa kûtherua gwa antû beenu, bûkîthingata bûra Mwathani aathanire gûkûrûkîîra Musa.”
7 Njosia aapa antû bara baarî oogo mbûri na ng'ondu ngiri mîrongo îthatû cia biewa bia Pasaka, na kinya ng'ombe ngiri ithatû, cionthe ciaumîîte ûrîîthiini bwa mûnene. 8 Aruti ngûgî baake kinya bo ibaarutîîre antû, athînjîri ba Ngai na Arawi na kwîbendera. Irikia, Sakaria na Njeiyeri, akaria ba Nyomba ya Ngai, baapa athînjîri ba Ngai biewa bia Pasaka, ng'ondu ngiri ciîrî na magana mathanthatû na ng'ombe magana mathatû. 9 Kinya Konania arî na aruagina Semaya na Nethaneri, na Asabia, Njeyeri na Njosabandi, atongoria ba Arawi, beeyana biewa bia Pasaka mbûri na ng'ondu ngiri itaano na ng'ombe magana mataano kîrî Arawi.
10 Kîatho kîathuuranîrwa na athînjîri ba Ngai baarûngama twanyaani twao barî na Arawi ikundiini biao wa bûra mûnene aathanîîte. 11 Arawi baang'eera ng'ondu cia Pasaka, na bacithînja nabo athînjîri ba Ngai baamincaminca nthakame îra baapeerwe. 12 Arawi baathûrîra wa kîra gîkundi kîa mûciî igongwana bia kûbîîthua bia kûrutîra Mwathani, wa ta bûra kwandîkîîtwe wathooni bwa Musa. Baarûtha na ng'ombe wa ûgu. 13 Bookia nyamû cia Pasaka na mwanki wa bûra kwandîkîîtwe, na baatherûkia biewa biitheru na nyûngû, cûûria, iraî na baagaîra antû bonthe cio na mpwî. 14 Nyuma ya ûûgû, beethuuranîîra nyama ciao bo bongwa na cia athînjîri ba Ngai, tabo nciarwa cia Arûni, n'ûntû ibaarî na ngûgî înene ya kûruta igongwana bia kûbîîthia na mathuunya mwanka ûtugû. Kwoogu Arawi beethuuranîra na baathuuranîra athînjîri ba Ngai tabo nciarwa cia Arûni.
15 Aini ba nyîmbo, tabo aana ba Asabu, ibaarî bantû aago kûringana na watho bwa Ndaundi. Na Asabu na Emani na Njenduthuni ûra aaroragîria mûnene, na akaria bara baakarîîtie mîîrîgaani yonthe bataarûûkîra ngûgî ciao, n'ûntû Arawi bara bangî ibaabathuuranagîra.
16 Kwoogu ntugû înu ngûgî yonthe ya Mwathani yaarutîka ya gûkûngwîra Pasaka ya Mwathani, ta yoo kûruta igongwana bia kûbîîthia kîthînjîrooni kîa Mwathani, wa ta bûra Njosia aathanîîte. 17 Aisiraeri bara baarî oogo baakûngwîra Pasaka ntugû înu na baathi na mbere na kîatho kîa mîgaate îteekîrîîtwe ndawa ya kwimbithia gwa kagiita ga ntugû mûgwanja. 18 Kuuma ntugûûni cia kîroria Samweri gûtooro kwîgua kûrî na Pasaka ta îno Isiraeri. Na gûtirî nwa ûmwe wa anene ba Isiraeri aaro akûngwîra Pasaka ta îno Njosia aakûngwîre, barî na athînjîri ba Ngai, Arawi na antû ba Njunda yonthe na ba Isiraeri na antû bara baatwîre Njerusaremu. 19 Pasaka îno yaakûngwîrwe mwankaani wa îkûmi na înaana wa wathani bwa Njosia.
Gûkua kwa Njosia
(2Ane 23:28-30)
20 Nyuma ya Njosia akûrûtha mama monthe Nyomba ya Ngai, Neko mûnene wa Miisiri eetia kûrûa Karikemisi akubî na muuro wa Yufîrîti, na Njosia aumagarûka kûrûa n'we. 21 Îndî Neko aatûmana atûmwa kîrî we, bamûûria, “N'îtheto rîbi rîrî oogo gatîgatî gaakwa naawe, woû mûnene wa Njunda? Ti woû nkûrûa naawe kagiita gaka, îndî i mûciî ûra ndî na ndûa nau. Ngai ambîîrîîte ndûthe bwa mpwî, kwoogu tiga kûregana na Ngai ûra arî naani, kana akwînyangie.”
22 Amwe na ûgu Njosia ateetîgîîria gûtigana n'we, îndî i ka eegarûrire bûra atakîmenyeka kaingo arûa n'we. Ataathikîîria bûra Ngai augîîte gûkûrûkîîra Neko, îndî ka aathiire kûrwîra na Neko kîbondeeni kîa Megindo.
23 Ageri ba mîgwî baaratha mûnene Njosia. N'we eera aruti ngûgî baake, “Ndutaani aaga, nkûgurarua mûno.” 24 Kwoogu bamûruta nkaarîîni yake ya ndûa, bamwîkîra nkaarîîni îra îngî aarî n'yo na bamûreeta Njerusaremu, ara aakuîrîîre. Aathikwa nthikooni cia beethe, na Njunda yonthe na Njerusaremu bamûrîrîra.
25 Njeremia aatunga nyîmbo cia kîrîro cia Njosia, na mwanka îmunthî aini ba antû arûme na aka i baririkanaga Njosia irîrooni biao. Ino ciatuîka wîthîre ndeeni ya Isiraeri na iciandîkîîtwe irîrooni.