Njeoasi aathana Njunda
(2Ane 23:30-35)
36
1 Nyuma ya gûkua kwa Njosia antû ba nthîgûrû ya Njunda baathûkia mwana wake Njeoaasi bamûtuîkithia mûnene Njerusaremu bantû a îthe. 2 Njeoasi aarî na ûkûrû bwa mîanka mîrongo îîrî na îthatû agîtuîka mûnene, na aathanire arî Njerusaremu mîeri îthatû. 3 Neko mûnene wa Miisiri amûruta wathaniini Njerusaremu na aaraacimithia Njunda kûrea ûgooti bwa kiro ngiri ithatû na magana mana cia fetha na kiro mîrongo îthatû na inya cia thaabu. 4 Rîru mûnene wa Miisiri aatuîkithia Eriakimu, mûruagina wa Njeoaasi, mûnene wa Njunda na Njerusaremu na aagarûra riîtwa rîake Eriakimu rîatuîka Njeoyakimu. Îndî Neko aira Njeoasi Miisiri.Njeoyakimu mûnene wa Njunda
(2Ane 23:36-24:7)
5 Njeoyakimu aarî na ûkûrû bwa mîanka mîrongo îîrî na îtaano agîtuîka mûnene, na aathanire Njerusaremu mîanka îkûmi na ûmwe. Aarûtha ûthûûku meethooni ma Mwathani Ngai wake. 6 Nebukandinesa mûnene wa Mbabironi amwithûkîra na amwîkîra mpengû cia cuuma amwira Mbabironi. 7 Nebukandinesa kinya aathûkia into kuuma Nyomba ya Mwathani na abiaiga nyomba yake ya ûnene Mbabironi.
8 Ngûgî ira ingî cia îgiita rîa wathani bwa Njeoyakimu, mantû ma îgi mara aarûthire na monthe mara moonekire kîr'we, maandîkîîtwe îbukuuni rîa ngono cia anene ba Isiraeri na Njunda. Na mwana wake Njeoyakini aatuîka mûnene bantû aake.
Njeoyakini mûnene wa Njunda
(2Ane 24:8-17)
9 Njeoyakini aarî na ûkûrû bwa mîanka îkûmi na înaana agîtuîka mûnene, na aathana Njerusaremu mîeri îthatû na ntugû îkûmi. Aarûtha ûthûûku meethooni ma Mwathani. 10 Mwanka ûkîthira, mûnene Nebukandinesa aatûmana aareetwa Mbabironi, amwe na into bia goro kuuma Nyomba ya Mwathani, na aatuîkithia Sendekia, mûruagina wa Njeoyakini mûnene wa Njunda na Njerusaremu.
Sendekia mûnene wa Njunda
(2Ane 24:18-20; Njere 52:1-3a)
11 Sendekia aarî na ûkûrû bwa mîanka mîrongo îîrî na ûmwe agîtuîka mûnene, na aathana arî Njerusaremu mîanka îkûmi na ûmwe. 12 Aarûtha ûthûûku meethooni ma Mwathani Ngai wake na ateenyiia kîrî kîroria Njeremia, ûra aaragia kiugo kuuma kîrî Mwathani. 13 Kinya aûmîria mûnene Nebukandinesa kîongo, ûra aatûmîîte athiîtia riîtwani rîa Ngai. Aatuîka ûmûûmo kîongo na aûmia nkoro yake na ataûndûkîra Mwathani, Ngai wa Isiraeri. 14 Nkûrûki ya ûgu, atongoria bonthe ba athînjîri ba Ngai na antû baatuîka t'eetîgua nkûrûki, baathingata mîtugo îrî mûgiro ya mîgongo îra yaabathiûrûkîrîîte na beekîra Nyomba ya Ngai mûgiro, îra aathereetie Njerusaremu.
Kûgwa kwa Njerusaremu
(2Ane 25:1-21; Njere 52:3b-11)
15 Mwathani, Ngai wa beethe, aatûmana mûgambo kîrî bo gûkûrûkîîra atûmwa baake kaîrî na kaîrî, n'ûntû n'eegagua antû baake kîao na kinya gîkaro gîake. 16 Îndî baanyûrûnta atûmwa ba Ngai, baabûthîîria mîgambo yake na baathekeera iroria biake mwanka mûthûûro ûmûnene wa Mwathani waûkîîra kîrî antû baake na gûtaarî na gîa gûcuoria. 17 Kwoogu abaretera mûnene wa Mbabironi, ûra aûragîîre nthaka ciao na rûûyiû Nyomba ya Ngai, na ateegîîrua nwa nthaka kana mwarî kîao, akûrû na bara bathiru inya. Ngai abanenkanîra bonthe kîrî Nebukandinesa. 18 Aakamata into bionthe kuuma Nyomba ya Ngai aira Mbabironi, biinene na biiniini, na igîîna bia Nyomba ya Mwathani na igîîna bia mûnene na atongoria baake. 19 Baabîîthia Nyomba ya Mwathani na boomoranga rûthingo rwa Njerusaremu, baabîîthia nyomba cia mûnene cionthe na beenyangia into bionthe bia goro gûku.
20 Aakamata matigari bara boonokire rûûyiû abaira Mbabironi barî atae, baatuîka nkombo ciake na cia nthaka ciake mwanka ûnene bwa Pasia bwambîîria kwathana. 21 Gwa kagiita ka mîanka mîrongo mûgwanja, nthîgûrû n'akeneere Sabatû ciayo cia kûnogoka yaarîia kûnogoka kûra îtaarekeetwe înogoka. Mûgambo wa Mwathani waûyûra ûra aarîîtie gûkûrûkîîra kîroria Njeremia.
Sairas mûnene wa Pasia arekeeria antû ba Mwathani bacooka Njerusaremu
22 Mwankaani wa mbere wa Sairas mûnene wa Pasia, kiugo kîa Mwathani kîaûyûra kîra kîarîîtue gûkûrûkîîra kîroria Njeremia. Mwathani aariingithiirie nkoro ya Sairas mûnene wa Pasia augîîria ûneneeni bwake bunthe na aandîka 23 ûûgû, “Niû Sairas mûnene wa Pasia ndiuga ûûgû,
Mwathani, Ngai wa îgûrû, n'ampeete moonene monthe ma nthîgûrû na n'anthuurîîte mmwakîra nyomba Njerusaremu îra îrî ya Njunda. Biû bwinthe bara bûrî baake nwabûcooke Njerusaremu na Mwathani Ngai akeegua arî amwe naabi.”