Esira 1

ESIRA

Sairas eetîgîîria agwate bacooka

1 Mwankaani wa mbere wa Sairas mûnene wa Pasia, Mwathani kaingo aûyûria kiugo gîake kîra kîarîîtue i Njeremia, auruga nkoro ya Sairas mûnene wa Pasia aarûtha watho nthîgûrû îra aathaga yonthe na abuandîka.

2 Ûûgû i bu Sairas mûnene wa Pasia akuuga,

“Mwathani, Ngai wa îgûrû, n'ampeete moonene monthe ma nthî. N'anthuurîîte mmwakîra Nyomba Njerusaremu ndeeni ya nthîgûrû ya Njunda. 3 Biû bwinthe bûrî antû baake bûcooke Njerusaremu ndeeni ya Njunda gwaka nyomba îno ya Mwathani, Ngai wa Isiraeri, ûra ûtûûraga Njerusaremu. Na Ngai wenu aroegua arî amwe naabi! 4 Na antû ba gûntû kûngî kunthe kûra matigari maûmba kwîgua matwîre bakamwa thaabu na fetha, into, ndîîthia, amwe na igongwana bia kwîbendera n'ûntû bwa Nyomba ya Ngai ndeeni ya Njerusaremu.”

5 Rîru Ngai auruga nkoro cia athînjîri na Arawi na atongoria ba mîîrîga ya Njunda na Benjameni gûcooka Njerusaremu n'ûntû bwa gûcookeeria Nyomba ya Mwathani. 6 Na atûûri baao bonthe baateetheeria na kweyana into biao bia thaabu, fetha, into, ndîîthia, na amwe na biewa bia goro, biringanîrîtwe na igongwana bionthe bia kwîbendera. 7 Na nkûrûki, mûnene Sairas aaruta into bira biarî Nyomba ya Mwathani, bira Nebukandinesa aakamatîîte kuuma Njerusaremu na abiaiga ndeeni ya nyomba ya ngai yake. 8 Sairas mûnene wa Pasia auga bireetwe i Mithirendathi mwaigi kîgîîna, ûra aabitarîîre Sesibasa mûnene wa Njunda.

9 Bibi i bio into bira Sairas aarutire: mbakûri mîrongo îthatû irûthîîtwe na thaabu, mbakûri ngiri îmwe irûthîîtwe na fetha, tûraî twa kûruga mîgaate mîrongo îîrî na kenda tûrûthîîtwe na fetha, 10 mbakûri mîrongo îthatû irûthîîtwe na thaabu, tûbakûri tûniini magana mana ma îkûmi tûrûthîîtwe na fetha, na into bingî ngiri îmwe.

11 Into bionthe ngiri itaano na magana mana bia thaabu na fetha bianeenkanîîrwe kîrî Sesibasa kaingo abicookia Njerusaremu rîra agwate baacookire noogo kuuma Mbabironi.