2 MANTÛ MA KARAAYA
Soromoni aromba ûûme
(1Ane 3:1-15)
1
1 Soromoni mwana wa Ndaundi eerûngîkire ûneneeni bwake n'ûntû Mwathani Ngai wake n'arî amwe n'we na amûûkîîria nkûrûki.2 Rîru Soromoni aarîria antû ba Isiraeri bonthe, atongoria ba njûûrî cia ndûa ba magiri na ba magana, agaambi, na atongoria bonthe ba Isiraeri na atongoria ba mîciî. 3 Soromoni na kîrîndî kîonthe kîra aarî nakîo, baathi Ngibeoni bantû a kûgongera, n'ûntû îrema rîa kûrîîkanaga rîa Ngai rîra Musa mûruti ngûgî wa Mwathani aarûthîîte arî rwanda irîarî oogo. 4 Îndî Ndaundi n'aarî akûreeta îthandûkû rîa kîrîîkanîro rîa Ngai kuuma Kiriathi-Njearimu ariira bantû ara aarîthuuranîrîîte, n'ûntû n'arî akûrîambîra îrema Njerusaremu. 5 Îndî kîthînjîro kîa rûthuku kîra Mbesareri mwana wa Uri, mwana wa Uuri, aarûthîîte kîarî Ngibeoni mbere ya îrema rîa Kûrîîkanaga rîa Mwathani. Kwoogu Soromoni na kîrîndî gîku bakîgîîra. 6 Soromoni eetia agu kîthînjîrooni kîa rûthuku mbere ya Mwathani, kîra kîarî îremaani rîa kûrîîkanaga, na aarutîra igongwana bia kûbîîthia ngiri îmwe îgûrû rîakîo.
7 Ûtugû bûbu Ngai aumîîra Soromoni, na amwîra, “Romba wa kîra ûkeenda, nani ngakwaa.” 8 Soromoni aacookeria Mwathani amwîra, “Nwonaniirie wendo bûûnene kîrî baaba Ndaundi na nûntuîkithîîtie mûnene bantû ake. 9 Îîndî Mwathani Ngai, ka wîrane bwaku na baaba Ndaundi bûûyûre, n'ûntû n'ûntuîkithîîtie mûnene wa antû baingîîte ta tîîri ya nthî. 10 Kwoogu mpa ûûme na ûmenyo, kaingo ntongoria antû baba, n'ûntû n'ûû aûmba kwatha antû baba baaku baingîîte ûûgû?”
11 Ngai eera Soromoni, “N'ûntû bûbû i bu wendi bwa nkoro yaku na ûtiraromba into, ûtonga kana gîtîîyo, kana anthû baaku bakua, na n'ûntû ûtiraromba ûtûûro bûûraaya îndî waromba ûûme na ûmenyo bwa kwatha antû baakwa bara ndagûtuîkithia mûnene wao, 12 n'ûntû bwoogu ûkeewa ûûme na ûmenyo. Na kinya ngakwa into, ûtonga na gîtîîyo, kîra gûtarî mûnene ûra aarî mbere yaku aaroegwa na gûtirî we akaaya nyuma yaku agaakîona.” 13 Kwoogu Soromoni auma Ngibeoni gûntû gûku gwa kûgongera, kuuma îremaani rîa Kûrîîkanaga, aathi Njerusaremu. Na aathana Isiraeri.
Soromoni eethîrania into bia Ndûa
14 Soromoni eethîrania nkaarî cia ndûa na mbaraathi. Aarî na nkaarî cia ndûa ngiri îmwe na magana mana na mbaraathi ngiri îkûmi na ciîrî. Aciaiga taûni ira ciaigagwa nkaarî inu, na ingî ciaigwa kwa mûnene naagu Njerusaremu. 15 Mûnene aatûma thaabu na fetha ciingîa ta maiga Njerusaremu, na mbaaû cia mîthithinda nacio ciingîa ta mîkûyû ya Sepera mîaranthî ya irîma. 16 Mbaraathi ira Soromoni aarî nacio ciareteetwe kuuma Miisiri na Kue; aringi biacaara ba mûnene bacigûra. 17 Nkaarî cia ndûa ira baareetaga kuuma Miisiri, îmwe yaumaga sekeri magana mathanthatû cia fetha, mbaraathi îmwe n'yo îkarutîrwa sekeri îgana rîa mîrongo îtaano; na nwabo beendagîria anene bonthe ba Aiti wana anene ba Aramu.