Maruta ma gwaka Nyomba ya Ngai
29
1 Mûnene Ndaundi eera antû bonthe bara baarî oogo, “Soromoni mwan'wakwa, ûra n'we Ngai athuurîîte, i mwana ûmwîthî, na atirî na ûmenyo bwingî. Ngûgî îno n'înene n'ûntû nyomba îra agaaka t'ya muntû, îndî n'ya Mwathani Ngai. 2 Kwoogu indîîrutanîrîîtie kûringana na ûûmbi bwakwa bunthe kwaigîra Nyomba ya Ngai wakwa, kîgîîna kîa thaabu ya kûrûtha into bia thaabu, fetha, ya kûrûtha into bia fetha, rûthuku, rwa kûrûtha into bia rûthuku, îthaga, rîa kûrûtha into bia îthaga, na mîtî ya kûrûtha into bia mîtî. Nkûrûki ya ûgu, inthuuranîrîîte maiga mûthemba wa carindoniki ma kûgemia nyomba, mûthemba wa takwici, maiga ma rangi mwanya mwanya na maiga ma goro. 3 Kaîrî nkûrûki ya bionthe bira ndutîîte n'ûntû bwa nyomba întheru, ndî na kîgîîna gîakwa niû mwene kîa thaabu na fetha, na n'ûntû bwa kwenda Nyomba ya Ngai wakwa ingûkîruta kîrî nyomba îno ntheru ya Ngai. 4 Ndaaruta taranta tani ngiri îgana rîa îkûmi na ciîrî cia thaabu kuuma Ofiri, taranta tani magana maîrî ma mîrongo îthanthatû na ciîrî cia fetha întheru ya gûkaanda nthingo cia nyomba. 5 Na n'ûntû bwa kûrûtha into bia mîthemba yonthe bira bikaarûthwa i mabundi na njara, i mbaigîîte thaabu ya kûrûtha into bia thaabu, na fetha ya kûrûtha into bia fetha. Îîndî n'ûû akeeruta kûrutîra Mwathani biewa na kwîbendera kaingo eebathûra îmunthî kîrî Mwathani?”6 Rîru i rîo atongoria ba mîciî, atongoria ba mîîrîga ya Isiraeri, atongoria ba ikundi bia acikaarî ngiri na atongoria ba ikundi bia acikaarî magana na arûngamîîri ba ngûgî ya mûnene baaruta na kwîbendera. 7 Baarutire into bibi n'ûntû bwa ngûgî ya Nyomba ya Ngai, tani îgana rîmwe na mîrongo mûgwanja cia thaabu, tani magana mathatû na mîrongo îna cia fetha, tani magana mathanthatû mîrongo îîrî cia rûthuku na tani ngiri ithatû magana mana cia îthaga. 8 Bara baarî na maiga ma goro mara marî goro mûno baamarutire meekîrwa kîgîînaani kîa Nyomba ya Mwathani, ruungu rwa ûmenyeeri bwa Njeiyeri, Mûngerisoni. 9 Antû i baakenire n'ûntû baarutaga na kwîbendera, n'ûntû baarutîîre Mwathani na kwîbendera na nkoro ciao cionthe. Mûnene Ndaundi kinya we aakena mûno.
Ndaundi aakumia Ngai
10 Rîru Ndaundi aakumia Mwathani mbere ya mûceemanio unthe, akiugaga, “Ûkumwe tene na tene, woû Mwathani, Ngai wa baaba Isiraeri. 11 Ûnene i bwaku, woû Mwathani, ûrî na inya, ûkumio, ûûmbani na ûnene. N'ûntû bionthe bira birî îgûrû na nthîgûrû i biaku. Woû Mwathani, ûnene i bwaku, naawe ûrîûmûkîîrie, ûrî mûnene îgûrû rîa into bionthe. 12 Ûtonga na gîtîîyo biumaga gwaku, bionthe i woû ûbiathaga. Ûûmbi na inya birî njaraani ciaku, bwa gûûkîîria na kwaa inya bonthe. 13 Îîndî woû Ngai wetû, itûgûgûcookeria nkaatho na gûkumia riîtwa rîaku rîîtheru.
14 “Îîndî, niû ndî ûû, na antû baakwa i baaû, mwanka tûûmbe gûkûneenkera gîntû na kwîbendera? N'ûntû into bionthe biumaga gwaku na bira tûkûrutîrîte nwa bira woû watûnenkeere. 15 Tiû tûrî ageni mbere yaku, na athii wa ta bûra biûyûûyû bietû bionthe biakari. Ntugû cietû nthîgûrû i ta mûgunye ûra ûkûrûkaga na aaga gûtirî wîrîgîîro bwa gûtûûra. 16 Woû Mwathani, Ngai wetû, tûrutîîte into bibi biingî ûûgû kaingo twaka nyomba n'ûntû bwa ûkumio bwa riîtwa rîaku rîîtheru. Bibi biumîîte njaraani ciaku na bionthe i biaku. 17 Inkûmenya Ngai wakwa, atî woû n'ûthimaga nkoro, naawe n'ûkenagua i gwîtîgîka. Naani, ndeeni ya gwîtîgîka gwa nkoro yakwa indutîîte into bibi bionthe na kwîbendera gwakwa, na îîndî inkwona antû baaku bara barî aaga, bakûrutîîre na kwîbendera na gîkeno. 18 Woû Mwathani, Ngai wa Îburaîmu, Isaka na Isiraeri, biûyûûyû bietû, tûma meerekeeria na mathûgaania mama ma antû baba baaku matûûre na nkoro ciao itûûre igwîtîgîîtie rîonthe. 19 Îtîgîîria Soromoni mwan'wakwa agwate watho bwaku na nkoro yake yonthe na aûyûrie mataaro na mawatho maaku monthe kaingo aûmba gwaka nyomba îno ya ûnene îra nthuuranîrîte n'ûntû bwa yo.”
20 Rîru, mûnene Ndaundi eera bonthe bara beethîranîîte, “Kumiani Mwathani, Ngai wenu.” Na bonthe bara beethîranîîte baakumia Mwathani, Ngai wa biûyûûyû biao, baaromba na baagonga Mwathani na baanenkera Mwathani na mûnene Ndaundi gîtîîyo. 21 Baarutîra Mwathani igongwana. Rûûni bamûrutîra igongwana bia kûbîîthua ta ûûgû, ncamba cia ng'ombe ngiri îmwe, ntûrûme ngiri îmwe, tûtûrûme ngiri îmwe, amwe na biewa biao bia biakûnyua na igongwana biingî n'ûntû bwa antû ba Isiraeri bonthe. 22 Kwoogu ntugû înu baarîa na baanyua na gîkeno kîînene mbere ya Mwathani.
Baathuura Soromoni mwana wa Ndaundi rîa maîrî. Bamwîtûûrîria maguta atuîka mûnene riîtwani rîa Mwathani, na Sandoki atuîka mûthînjîri. 23 Rîru Soromoni aakara gîtîîni kîa ûnene kîa Mwathani, bantû a Ndaundi îthe. N'we aûmbana, na mûgongo unthe wa Isiraeri wamwathîkîra. 24 Atongoria bonthe na ncamba cia antû wana kinya aana bonthe ba mûnene Ndaundi baiga wîrane bauga bagaatuîka aathîki kîrî mûnene Soromoni. 25 Mwathani aatûma Soromoni eendwa mûno n'antû bonthe ba Isiraeri, na amwaa mwago wa ûnene wakûrûkîîte mwago wa anene bara bangî bonthe bara baaro athana Isiraeri mbere yake.
Wathani bwa Ndaundi gwookubî
26 Kwoogu Ndaundi, mwana wa Njesii, aarî mûnene wa Isiraeri yonthe. 27 Na kagiita kara aathanire îgûrû rîa Isiraeri kaarî mîanka mîrongo îna, mîanka mûgwanja aathana naagu Eburoni na mîanka mîrongo îthatû na ithatû aathana naagu Njerusaremu. 28 Aakuire arî mûkûûrû kûrû, arî na mîanka îmiingî mûno, na arî na ûtonga na gîtîîyo. Soromoni mwana wake, aatuîka mûnene bantû aake. 29 Mantû ma mûnene Ndaundi kuuma mwanjîîrio mwanka mûthia, maandîkîîtwe mabukuuni ma Kîroria Samweri, mabukuuni ma kîroria Nathani na mabukuuni ma Kîroria Ngandi. 30 Mabuku mamu i makuuga mantû ma wathani bwake, amwe na inya yake, na mantû monthe mara maakarîkire kîrî we, kîrî antû ba Isiraeri, na kîrî moonene monthe ma nthîgûrû ira ingî.