Mawatho ma Ndaundi îgûrû rîa Nyomba ya Ngai
28
1 Mûnene Ndaundi eethîrania atongoria bonthe ba Isiraeri naagu Njerusaremu, ba mîîrîga, atongoria ba ikundi bira biatûmîkagîra mûnene, atongoria ba ikundi bia acikaarî ngiri, atongoria ba ikundi bia acikaarî magana, arûngamîîri ba ûtonga bunthe na nyamû cionthe cia ndîîthia cia mûnene na cia aana baake amwe na atongoria ba nyomba ya mûnene, ncamba na acikaarî bonthe bara baarî îgweta.2 I rîo mûnene Ndaundi aarûngamire auga, “Biû aruayia na antû baakwa, nthikîîriani. Ndeerîgagîîra nkorooni yakwa gwaka nyomba ya gûkara Îthandûkû rîa kîrîîkanîro kîa Mwathani, ûkinyo bwa magûrû ma Ngai wetû, na ndaagaiga into bia kûgana bia kûmîaka. 3 Îndî Ngai n'angiriirie, n'ûntû niû ndî muntû wa ndûa na imbîtûûrîîte nthakame inyingî, 4 amwe na ûgu, Mwathani, Ngai wa Isiraeri n'aanthuurire gatîgatî ka mûciî wa baaba ntuîka mûnene wa Isiraeri tene na tene. Aathuurire mwîrîga wa Njunda ûtongoria; na kuumania na mwîrîga ûyu, athuura mûciî wa baaba, na gatîgatî ka aana ba baaba, aakenua i niû ambaiga ntuîka mûnene wa Isiraeri yonthe. 5 Mwathani n'anthaarimîîte na aana baingî, na gatîgatî ka babu bonthe, n'athuurîîte Soromoni mwan'wakwa, akarîra gîtî kîa ûnene bwa Mwathani aatha Isiraeri.”
6 “Mwathani aambîîrire, ‘Mwana waku Soromoni n'we akaambakîra nyomba yakwa na kîarago kîayo, n'ûntû imûthuurîîte atuîka mwan'wakwa, naani ntuîka îthe. 7 Nkaarikithia ûnene bwake tene na tene wegua akaathi na mbere kwathîkîra watho na maathana maakwa wa ta bûra akûrûtha îmunthî.’
8 “Kwoogu îîndî, mbere ya kîûthûrano gîkî gîa Isiraeri yonthe, ngwatanîro ya antû ba Mwathani, na mbere ya Ngai wetû, raithaani bûthikîîrieni watho bunthe bwa Mwathani, Ngai wenu, kaingo bûthi na mbere kwîgwatîra nthîgûrû îno mbega, na bûtigîra nciarwa cienu rûrî rûgai rwao nyuma yenu, tene na tene.
9 “Naawe Soromoni mwan'wakwa, ûmenye Ngai wa abaagu, na ûmûtûmîkîre na nkoro yaku yonthe na mathûgaania maarîîkîîru, Mwathani n'acûnkûûnaga nkoro na n'amenyaga mîbango na mathûgaania ma antû. Wamûceria ûkamwona, îndî wamûtiga agagûteeyanîria tene na tene. 10 Kwoogu îîmenyeere na ûririkane atî, Mwathani i ka akûthuurîîte ûmwakîra nyomba yake întheru. Îgîa na inya ûrûthe ûgu.”
11 Rîru Ndaundi aanenkera Soromoni mwana wake mbica ya mîako yonthe ya Nyomba ya Ngai, tûnyomba twayo, bantû a kwaiga kîgîîna aayo, ngoroba ciayo, tûnyomba twayo twa ndeeni na bantû a gîtî gîa kîao. 12 Amwa mbica cia bunthe bûra aathûgaanagia nkorooni îgûrû rîa rûthingo rûra rwirigîrîîte Nyomba ya Mwathani, na tûnyomba tunthe tûra twamîthiûrûkîîrîîte, na bianda bia kwaiga into bia Nyomba ya Ngai na bianda bia into bira biathûre. 13 Kinya amwaa mataaro ma bûra akaabaanga athînjîri ba Ngai na Arawi bakîruta ngûgî ciao, gûtûmîkîra Nyomba ya Mwathani na kûmenyeera into bionthe bia gûtûmîka ndeeni ya Nyomba ya Mwathani. 14 Amwa kîthimi kîa thaabu kîra kîendekanaga kûrûtha into bionthe bia thaabu bia gûtûmîka ngûgîîni mwanya mwanya, kîthimi gîa fetha, îra yeendekanaga n'ûntû bwa kûrûtha into bia gûtûmîka ngûgîîni mwanya mwanya, 15 ûrito bwa itugî bia thaabu na taa cia bio, ûrito bwa thaabu ya wa kîra gîtugî na taa cia kîo, ûrito bwa fetha, ya kûrûtha gîtugî na taa cia kîo kûringana na mûtûmîîre wa kîra gîtugî, 16 na kîthimi kîa thaabu ya kûrûtha wa îra meetha ya thaabu ira ciaigagîîrwa mîgaate îra yaarutagwa kîrî Ngai, wana kîthimi gîa fetha, ya kûrûtha meetha ya fetha, 17 kinya aaruta mawatho îgûrû rîa kîthimi kîa thaabu întheru îra yendekanaga kûrûtha ûma, tûraî na ikombe, kinya kîthimi kîa thaabu na fetha, îra yendekanaga kûrûtha wa îra mbakûri ya thaabu na ya fetha, 18 na kîthimi kîa thaabu întheru gîa kûrûtha kîthînjîro gîa kûbîîthîria macoco. Amwa kinya mbica yake ya nkaarî ya mbaraathi ya thaabu ya biûmbe bira birî na mathabu bira biambaarîîtie mathabu na gûkunîkîra Îthandûkû rîa Kîrîîkanîro rîa Mwathani. 19 Mamu monthe, mûnene Ndaundi n'amareetire werûûni kûringana na maandîko mara apeerwe i Mwathani. Kaingo ngûgî cionthe îrutwa kûringana na mûbango ûyu.
20 Na mûnene Ndaundi eera Soromoni mwana wake, “Îgia na inya na ûcamba, ûrute ngûgî îno. Ûtikaamake, kana ûkua nkoro, n'ûntû Mwathani Ngai, Ngai wakwa, arî amwe naawe. Atigûtiganîria îndî akeegua arî naawe mwanka rîra ngûgî yonthe îra îkwenda kûrutîrwa Nyomba ya Mwathani îkaarîîka. 21 Athînjîri ba Ngai na Arawi i baabangîre ngûgî ira bakaarutaga ndeeni ya Nyomba ya Ngai. Aruti ngûgî bara barî na ûmenyo bwa mîthemba yonthe bakeegua beethuuranîrîîte gûgûtetheeria ngûgîîni cionthe, na antû bonthe amwe na atongoria baao bakeegua barî ruungu rwa watho bwaku.”